ASANI mwaŵerenga viganizu viŵi vo vepachanya, nchiganizu nichi cho chiyanana ndi maŵanaŵanu nginu? Ŵanthu anandi achiskika ukongwa ndi mazu ngo Saulo wa ku Tarso yo wadanika so kuti Paulo wangukamba. (Machitidu 17:26, 27) M’Bayibolu musanirika so mazu nganyaki ngakuchiska nge ngenanga. Mwakuyeruzgiyapu, Yesu wangukamba mazu ngakuchiska mu rombu laki. Iyu wangulongo kuti akusambira ŵaki angatumbikika asani angamuziŵa umampha Chiuta.​—Yohane 17:3.

Fundu zo Philo ndi ŵanthu anyaki angukamba zisuskana ndi fundu za m’Bayibolu. Yiwu angukamba kuti tingamuziŵa cha Chiuta chifukwa chakuti ngwambura kuvwisisika. Kumbi uneneska ngwakuti wuli?

Bayibolu likamba mwakuvwika umampha kuti pe vinthu vinyaki vakukwaskana ndi Chiuta vo ŵanthu angavivwisa umampha cha. Mwakuyeruzgiyapu, tingaziŵa cha nyengu yo Chiuta wakujaliyaku, ndipuso unandi wa zeru zaki. Zeru zaki zapachanya ukongwa kuluska za ŵanthu. Chinanga kuti veviyo, tingatondeka cha kumuziŵa umampha Chiuta. Kuŵanaŵaniya ukongwa fundu zenizi kungatiwovya kuti ‘tindere kufupi ndi Chiuta.’ (Yakobe 4:8) Tiyeni tikambiskani vinthu vinyaki vakukwaskana ndi Chiuta vo tingavivwisa  cha. Pavuli paki tikambiskanengi vinthu vo tingayivwisa.

CHIUTA WALIVI CHIYAMBI: Bayibolu likamba kuti Chiuta wajaku “kutuwa kumuyaya mpaka kumuyaya.” (Sumu 90:2) Munthowa yinyaki tingakamba kuti Chiuta walivi chiyambi ndipuso umaliru. Mwaviyo, palivi munthu yo wangavwisa unandi wa vyaka vo Chiuta wajaliyaku.​—Jobu 36:26.

Mo tiyanduliya ndi fundu iyi: Chiuta wakutilayiza kuti wazakutipasa umoyu wambura kumala asani tamuziŵa umampha. (Yohane 17:3) Tigomezga kuti tazamuja ndi umoyu wambura kumara chifukwa chakuti Chiuta ngwamuyaya. Ndi “Fumu yamuyaya” yija yo yingafiska layizgu lenili.​—1 Timote 1:17.

MAŴANAŴANU NGAKU CHIUTA: Bayibolu lititisambiza kuti “palivi yo wangaziŵa vo [Chiuta] waziŵa” chifukwa maŵanaŵanu ngaki ngapachanya ukongwa kuluska ngidu. (Yesaya 40:28; 55:9) Bayibolu lifumba mafumbu ngo ngatitiwovya kuŵanaŵaniya zeru zaku Chiuta. Lititi: “Mbayani wo aziŵa maŵanaŵanu nga Ambuya kuti amulunguchizi?”​—1 Ŵakorinte 2:16, English Standard Version.

Mo tiyanduliya ndi fundu iyi: Chiuta wavwisiya marombu nga ŵanthu mamiliyoni nganandi ngo aromba pa nyengu yimoza. (Sumu 65:2) Iyu wawona chinanga nkhampheta ko kabota pasi. Kumbi vingachitika kuti Chiuta watangwamiki ukongwa ndi kutondeka kuvwisiya ndipuso kumuka marombu ngidu? Awa. Chifukwa maŵanaŵanu ngaki ngapachanya ukongwa. Kukamba uneneska, imwi mwe akuzirwa ukongwa kwaku Chiuta kuluska mpheta zinandi.​—Mateyu 10:29, 31.

NTHOWA ZAKU CHIUTA: Bayibolu lititikambiya kuti ŵanthu ‘angaziŵa cha ntchitu zosi zo Chiuta wauneneska wagwira kutuliya pa chiyambi mpaka pa kumaliya.’ (Wakutaula 3:11) Mwaviyo, tingaziŵa vinthu vosi cha vakukwaskana ndi Chiuta. Zeru zo Chiuta wenazu tingazikonkhosa cha. (Ŵaroma 11:33) Kweni Chiuta wakhumbisiska kuwovya ŵanthu wo akhumba kumukondweska kuti amuziŵi umampha.​—Amosi 3:7.

Mo tiyanduliya ndi fundu iyi: Asani tiŵerenga ndi kusambira Bayibolu, tilutirizgengi kusambira vinthu vifya vakukwaskana ndi Chiuta kweniso mo wachitiya vinthu. Ivi vitiwovyengi kuti nyengu zosi tijengi pa ubwezi wakukho ndi Awuskefwi akuchanya.

Chinanga kuti pe vinthu vinyaki vo tingaleka kuvwisa vakukwaskana ndi Chiuta, kweni tingatondeka cha kumuziŵa umampha. M’Bayibolu mwe fundu zinandi zo zingatiwovya kuti timuziŵi umampha Chiuta. Tiyeni tiwoni fundu zinyaki izi:

ZINA LAKU CHIUTA: Bayibolu lititikambiya kuti Chiuta wakujipasa zina. Iyu watiti: “Ndini Yehova, lenili ndilu zina langu.” M’Bayibolu, zina laku Chiuta lisanirika maulendu 7,000. Palivi zina linyaki lo lisanirika maulendu nganandi viyo m’Bayibolu.​—Yesaya 42:8.

Mo tiyanduliya ndi fundu iyi: Murombu laki, Yesu wangukamba kuti: “Awuskefwi akuchanya, zina linu lipaturiki.” (Mateyu 6:9) Kumbi namwiso muzumbuwa zina laku Chiuta asani muromba? Yehova wakhumbisiska kuti wazitaski ŵanthu wo atumbika zina laki.​—Ŵaroma 10:13.

KO CHIUTA WAJA: Bayibolu likamba kuti pe malu ngaŵi ngakujapu. Charu chapasi cho tijamu ndipuso kuchanya ko kuja vakulengeka vauzimu. (Yohane 8:23; 1 Ŵakorinte 15:44) M’Bayibolu mazu ngakuti “kuchanya” kanandi ngakamba malu ngo kuja vakulengeka vauzimu vo mbangelu kweniso Mulengi.​—1 Ŵakaronga 8:43.

 Mo tiyanduliya ndi fundu iyi: Vititiwovya kumuziŵa umampha Chiuta. Tiziŵa kuti Mulengi widu ndi nthazi ŵaka yo yisanirika peposi cha. Yehova we ndi malu ngaki ngo waja. Kweni “palivi chakulengeka cho Chiuta wangaleka kuchiwona.”—Ŵahebere 4:13.

MIJALIDU YAKU CHIUTA: Bayibolu lititikambiya kuti Yehova we ndi mijalidu yamampha ukongwa. Ilu likamba kuti, “Chiuta nchanju.” (1 Yohane 4:8) Chiuta wakamba boza cha. (Tito 1:2) Iyu ngwalisungu, watanjiya cha ndipuso wakwiya liŵi cha. (Chituwa 34:6; Machitidu 10:34) Ŵanthu anandi akayikiya kuti Mulengi wangaja paubwezi wakukho ndi ŵanthu wo atimupasa ulemu.​—Sumu 25:14.

Mo tiyanduliya ndi fundu iyi: Tiziŵa kuti tingaja pa ubwezi ndi Yehova. (Yakobe 2:23) Asani tayiziŵa umampha mijalidu yaku Yehova, tisuzgikengi cha kuvwisa nkhani za m’Bayibolu.

Bayibolu litimukonkhoska umampha ukongwa Yehova Chiuta. Iyu ngwambula kuvwisisika cha ndipu wakhumba kuti timuziŵi umampha. Bayibolu lititilayizga kuti: ‘Asani titimupenja, timusaniyengi.’ (1 Mikoka 28:9) Mukhumbika kuŵerenga nkhani za m’Bayibolu ndi kulunguruka kuti mumuziŵi umampha Chiuta. Asani muchita ivi, Bayibolu likamba kuti, Chiuta “wanderengi kufupi ndi imwi.”​—Yakobe 4:8.

Nyengu zinyaki mungajifumba kuti, ‘Pakuti ndivwisa vosi cha vakukwaskana ndi Mulengi, sonu vingachitika wuli kuti ndije nayu pa ubwezi?’ Ŵanaŵaniyani fundu iyi: Asani munthu ndi dokotala, kumbi mabwezi ngaki nangu ngakhumbika kuja madokotala? Awa! Nyengu zinyaki dokotala wangaja ndi mabwezi ngo ngakusambira ntchitu yaudokotala cha. Chinanga kuti ntchitu zo agwira zakupambana kweni angaja paubwezi wakukho. Chakukhumbika ukongwa nchakuti weyosi waziŵi mijalidu ya mubwezi waki, vo watanja ndi vo watinkha. Mwakuyanana waka, Bayibolu lingakuwovyani kumuziŵa umampha Yehova, ndipuso vo mungachita kuti muje nayu paubwezi.

Bayibolu le ndi fundu zakuvwika umampha zakukwaskana ndi Mulengi zo zingatiwovya kuti timuziŵi umampha. Kumbi mungayanja kuziŵa vinandi vakukwaskana ndi Yehova Chiuta? Akaboni aku Yehova asambira ndi ŵanthu Bayibolu kunyumba zawu. Titikupemphani kuti mukumani ndi Akaboni aku Yehova wo aja kuchigaŵa chinu pamwenga lutani pa webusayiti yidu ya www.dan124.com/tog.