JANI MASU!

2022: Chaka cho Kwachitika Vinthu Vinandi Viheni—Kumbi Bayibolu Likambanji?

JULANI

Mu chaka cha 2022, kanandi tavwanga malipoti ngakukwaskana ndi nkhondu, masuzgu nga vachuma, kweniso masoka ngachilengedu. Ndi Bayibolu pe lo likonkhoska vo vinthu venivi ving’anamuwa.

Kumbi vinthu vo vachitika mu 2022 ving’anamuwanji?

Vinthu vo vachitika chaka chamala visazgiyaku ukaboni wakuti tija mu nyengu yo Bayibolu litiyidana kuti “mazuŵa ngakumaliya.” (2 Timote 3:1) Mazuŵa ngakumaliya ngenanga ngangwamba mu 1914. Wonani mo vinthu vo vichitika mazuŵa nganu vikoliyana ndi vo Bayibolu lingukambiya limu kuti vazamuchitika:

“Nkhondu.”—Mateyu 24:6.

“2022 Ndi Chaka cho Nkhondu Yakofya Yingwambiya So ku Europe.” a

Wonani nkhani ya mutu wakuti “Charu cha Russia Chayukiya Charu cha Ukraine.”

“Nja.”—Mateyu 24:7.

“2022: Chaka cho Kwenga Nja Yikulu Ukongwa.” b

Wonani nkhani ya mutu wakuti “Nkhondo ya ku Ukraine Ikuwonjezera Vuto la Kuchepa Kwa Chakudya Padziko Lonse.”

“Milili.”—Luka 21:11.

“Mulili wa poliyo ungwamba so, mulili wa monkeypox unguwanda ukongwa kweniso mulili wa COVID-19 ungulutirizga kupweteka ŵanthu anandi. Venivi vachitiska kuti ŵanthu aziŵi kofya kwa matenda ngakupasilana kweniso kuti te ambula kuvikilirika.” c

Wonani nkhani ya mutu wakuti “Ŵanthu 6 Miliyoni Akufwa ndi Mulili wa COVID.”

“Vinthu vakofya.”—Luka 21:11.

“Kotcha ukongwa, chilala, motu wakofya, kweniso kusapaliya kwa maji. Ŵanthu anandi aluwengi cha chihanya cha 2022, chifukwa chingunanga vinthu vinandi. Pa nyengu iyi ŵanthu masawuzandi nganandi angufwa, ndipu anyaki mamiliyoni nganandi pacharu chosi nyumba zawu zinguwa.” d

Wonani nkhani ya mutu wakuti “Kwawotcha Ukongwa Pacharu Chosi.”

“Vivulupi.”—Luka 21:9.

“Ŵanthu angukwiya ukongwa chifukwa cha masuzgu nga vachuma, ukongwa chifukwa cha kukwera mtengu kwa vinthu, ndipu venivi vinguchitiska kuti mu 2022 ŵanthu achitengi viwoneseru vinandi vakususkana ndi boma.” e

Wonani nkhani ya mutu wakuti “Kumbi Bayibolu Likambanji Pankhani Yakukwera Mtengu kwa Vinthu Pacharu Chosi?”

Kumbi chaka chamawa kuchitikengenji?

Palivi munthu yo wangaziŵiya limu vo vichitikengi mu 2023. Kweni vo tiziŵa vakuti pambula kuswera yapa, Ufumu waku Chiuta, pamwenga kuti boma lakuchanya, ndiwu wazamusintha vinthu pacharu chapasi. (Daniyeli 2:44) Boma lenili lazamutuzgapu masuzgu ngosi ngo ngachitiska kuti ŵanthu asuzgikengi ndipu lazamuwonesesa kuti khumbu laku Chiuta lichitika pacharu chapasi.—Mateyu 6:9, 10.

Titikuchiskani kuti mulondongi ulongozgi waku Yesu Khristu kweniso ‘mulutirizgi kuja masu’ kuti muwonengi mo vinthu vo vichitika mucharu ichi vifiskiya mauchimi nga mu Bayibolu. (Mariko 13:37) Kambiskanani ndi yumoza wa Akaboni aku Yehova kuti muziŵi vinandi vakukwaskana ndi mo Bayibolu lingakuwovyiyani sonu, kweniso mo lingakuwovyiyani kuti yimwi ndi banja linu mulindizgengi vinthu vamampha vo vichitikengi kunthazi.

a AP News, “2022 Was Year the Horror of War Returned to Europe,” by Jill Lawless, December 8, 2022.

b World Food Programme, “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.

d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.

e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.