JANI MASU!
Kumbi Bayibolu Likambanji Pankhani ya vo Visopa Vichita pa Nkhondu ya ku Ukraine?
Wonani vo alongozgi akutchuka avisopa akamba pankhani ya nkhondu yo yichitika ku Ukraine:
Nyuzipepala ya EUobserver, ya pa 7 March 2022, yingukamba kuti: “Mlongozgi mura wa tchalitchi cha Orthodox ku Russia, Patriarch Kirill wakambapu chechosi cha pankhani ya nkhondu yo Russia yichita. . . . Tchalitchi laki liwandisa nkhani zaboza zakukwaskana ndi charu cha Ukraine ndipu Purezidenti Putin wagwiriskiya ntchitu nkhani zenizi nge chifukwa chakuchitiya nkhondu.”
Nyuzipepala ya AP, ya pa 8 March 2022, yingukamba kuti: “Patriarch Kirill . . . wangukamba mazu nganthazi ngakuŵikiya kuvuli charu cha Russia kuti chachita umampha kuyukiya charu cha Ukraine mwakukamba kuti kuyukiya kwenuku ntchigaŵa chakutuzgiyapu ubudi.”
Nyuzipepala ya Jerusalem Post, ya pa 16 March 2022 yingukamba kuti: “Pa Mandi, Mlongozgi wa tchalitchi cha Orthodox ku Ukraine, Metropolitan Epiphanius, wangutumbika ŵanthu ŵaki kuti alimbani ndi asilikali a ku Russia . . . [Iyu] wangukamba so kuti mbubudi cha kubaya asilikali a ku Russia.”
Pa 24 February 2022, wupu wa UCCRO a ungukamba kuti: “Isi a wupu wa matchalitchi ku Ukraine [Ukrainian Council of Churches and Religious Organizations (UCCRO)], titovya asilikali aku Ukraine ndipuso wosi wo atitivikiliya. Titumbika phamphu lawu pakuvikiliya charucha Ukraine kwa arwani ŵawu ndipu titiŵapemphere.”
Kumbi muwona wuli? Kumbi visopa vo vikamba kuti vilondo Yesu Khristu vikhumbika kuchiska ŵanthu ŵawu kuti alutengi ku nkhondu? Kumbi Bayibolu likambanji?
Mbiri yakukwaskana ndi vo Visopa Vichita pa nkhondu
Mbiri yilongo kuti kanandi chisopa chizomereza nkhondu, kuyiŵikiya kuvuli pamwenga kuchiska ŵanthu kuti alutengi ku nkhondu asani akhumba kujalikisa chimangu. Kwa vyaka vinandi, Akaboni aku Yehova, aja achiwovya ŵanthu kuziŵa kuti kuchita viyo ntchinyengu. Wonani vakuyeruzgiyapu vo ve mu mabuku ngidu.
Nkhani yakuti “The Crusades—A ‘Tragic Illusion’” yilongo kuti tchalitchi cha Katolika ndichu chinguchitiska kuti ŵanthu anandi abayiki pakukamba kuti achitiya uteŵeti Chiuta ndi Khristu
Nkhani yakuti “Tchalitchi cha Katolika mu Afirika” yilongo chakuyeruzgiyapu cha mo chisopa chatondeke kumalisa nkhondu zo zichitika chifukwa chakupambana mtundu, chinanga nkhubaya ŵanthu anandi pa nyengu yimoza.
Nkhani za mutu wakuti “Kodi Zipembedzo N’zimene Zikusokoneza Mtendere?” “Mbali ya Chipembedzo m’Nkhondo za Anthu” ndipuso “Chipembedzo Chichirikiza Mbali Ina” zikonkhoska mo tchalitchi cha Katolika, cha Orthodox ndipuso Pulotesitanti aja achiwovye vigaŵa vosi viŵi pa nkhondu zinandi zo zachitikapu.
Kumbi visopa va Chikhristu vikhumbika kuwovyaku nkhondu?
Vo Yesu wakusambiza: “Uyanjengi munyaku nge mo utijiyanjiya wamweni.” (Mateyu 22:39) “Lutirizgani kwanja arwani ŵinu.”—Mateyu 5:44-47.
Ŵanaŵaniyani ivi: Kumbi chisopa cho chikamba kuti chivwiya marangu ngaku Yesu ngakukwaskana ndi kwanja ŵanthu, chikhumbika kuchiska ŵanthu a mutchalitchi chawu kuti abayengi anyawu pa nkhondu? Kuti musaniyi kwamuka ŵerengani nkhani yakuti “Akristu Oona ndi Nkhondo” ndipuso yakuti “Kodi N’zotheka Kukonda Adani Athu?”
Vo Yesu wakusambiza: “Ufumu wangu ngwacharu ichi cha. Asani Ufumu wangu wenga wa charu ichi, mphanyi ateŵeti ŵangu achita nkhondu kuti ndileki kuperekeka.” (Yohane 18:36) “Weyosi yo wapinga lipanga wazamukufwa ndi lipanga.”—Mateyu 26:47-52.
Ŵanaŵaniyani ivi: Asani Akhristu anguchitaku cha nkhondu kuti avikiliyi Yesu, kumbi akhumbika kuchitaku nkhondu pachifukwa chinyaki chechosi? Ŵerengani nkhani yakuti “Kodi Akhristu Ayenera Kumenya Nawo Nkhondo?” kuti muwoni mo Akhristu akwambiriya angulongore kuti alondo mwakugomezgeka chakuwoniyapu ndipuso visambizu vaki.
Kumbi ntchinthu wuli chazamuchitikiya visopa vo vichiska kuti ŵanthu achitengi nkhondu?
Bayibolu lisambiza kuti Chiuta wakana visopa vo vikamba kuti vimiya Yesu kweni vilondo cha vo iyu wasambizanga.—Mateyu 7:21-23; Tito 1:16.
Buku la Chivumbuzi lilongo kuti Chiuta wawona kuti visopa ndivu vikuchitiska nyifwa “za ŵanthu wosi wo akubayika pacharu chapasi.” (Chivumbuzi 18:21, 24) Kuti muziŵi chifukwa chaki, ŵerengani nkhani ya mutu wakuti “Kodi Babulo Wamkulu N’chiyani?”
Yesu wangulongo kuti visopa vosi vo Chiuta wakuvikana vazamunangika chifukwa cha ntchitu zawu ziheni nge mo chimiti chakuvunda cho chipasa vipasu vakuvunda ‘chidumulikiya ndi kuponyeka pamotu.’ (Mateyu 7:15-20) Ŵerengani nkhani ya mutu wakuti “Mapeto a Chipembedzo Chonyenga Ayandikira” kuti muziŵi mo venivi vazamuchitikiya.
Photo credits, kutuwa kumazge kuluta kumaryi: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Mu wupu wa matchalitchi wa UCCRO, (Ukrainian Council of Churches and Religious Organizations), mwe matchalitchi 15 ngo ngasazgapu Orthodox, Chikatolika cha Chigiriki ndi Chiroma, Chipulotesitanti, Evangelical, Ayuda kweniso Asilamu
Mungayanja Kuŵerenga so Nkhani Izi
NKHANI ZINYAKI
Kumbi Chisopa Chikhumbika Kuseleriyamu mu Ndali?
Pacharu chosi, ŵanthu wo akamba kuti alondo Yesu Khristu aseleriyamu ukongwa mu ndali. Kumbi ndivu akhumbika kuchita?
Charu cha Russia Chayukiya Charu cha Ukraine—Kumbi venivi vifiska uchimi wa mu Bayibolu?
Wonani mo masuzgu ngenanga ngazamumaliya
ESSENTIAL BIBLE TEACHINGS
Kumbi Ufumu Waku Chiuta Ntchinthu Wuli?
Pa nyengu ya uteŵeti waki Yesu wasambizanga ukongwa za Ufumu waku Chiuta kuluska nkhani yinyaki yeyosi. Kwa vyaka vinandi akusambira ŵaki nawu apempheranga ukongwa kuti Ufumu waku Chiuta uzi.
VO BAYIBOLU LISAMBIZA
Yesesani Kusambira Bayibolu
Sambirani Bayibolu kwawezi ndi munthu yo wakusambizeningi.
