Mulipoti la June 2022, pulezidenti wa World Bank Group wangukamba kuti: “Nkhani za chuma pacharu chosi ze pangozi. Pasonu panu mtengu wa vinthu ukwera ukongwa kweni ŵanthu alivi ndalama zakukwana.”

 Wupu wakuwona va ndalama (International Monetary Fund) ungukamba kuti: “Mtengu wa vakurya ndi mafuta wakwera mwaliŵi ukongwa. Venivi vakwaska ŵanthu wo aja muvyaru vikavu ukongwa.”

 Bayibolu lititiwovya kuvwisa vo vichitiska kuti tikumanengi ndi masuzgu nga chuma, mo tingamaliyana nangu kweniso mo masuzgu ngenanga ngazamumaliya limu.

•   Bayibolu likamba kuti tija “mu mazuŵa ngakumaliya.”—2 Timote 3:1.

•   Yesu wangukamba kuti mu mazuŵa ngakumaliya ngenanga, kwazamuchitika “vinthu vakofya,” pamwenga vinthu vakuchitiska mantha. (Luka 21:11) Ŵanthu achita mantha ukongwa ndi kukwera mtengu kwa vinthu. Ŵanthu afipa mtima ndi mo vinthu viŵiyengi munthazi kweniso asani afiskengi kuphwere mabanja ngawu.

•   Buku la Chivumbuzi likukambiya limu vakukwaskana ndi kukwera mtengu kwa vakurya mazuŵa nganu. “Sonu ndinguvwa vo vavwikanga nge mazu . . . ngakuti: ‘Tirigu wakukwana mwesu umoza wa kwati mtengu waki ndi dinari yimoza, ndipu balire wakukwana miyesu yitatu ya kwati mtengu waki ndi dinari yimoza.’”—Chivumbuzi 6:6.

 Kuti muziŵi vinandi vakukwaskana ndi “mazuŵa ngakumaliya” kweniso vakukwaskana ndi uchimi wa mubuku la Chivumbuzi, woneriyani vidiyo yakuti, Charu Chikusintha Ukongwa Kutuliya mu 1914 ndipuso ŵerengani nkhani yakuti “Kumbi Ŵanthu Anayi wo Akwera Pamahachi Amiyanji?”

•   “Yiwu azamuzenga nyumba ndi kujamu, ndipuso azamulima minda ya mphereska ndi kurya vipasu vaki. Yiwu azamuzenga nyumba kuti wajemu munthu munyaki cha. Ndipuso azamulima kuti waryi munthu munyaki cha.”—Yesaya 65:21, 22.

•   “Pacharu chapasi pazamuja chakurya chinandi; ndipu chazamusapaliya pachanya pa mapiri.”—Salimo 72:16.

•   “Yehova wakamba kuti: ‘Chifukwa cha kukandirizgika kwa ŵanthu wo asuzgika, chifukwa cha kutamantha kwa ŵanthu akavu, ndisokengi kuti ndichitepu kanthu.”—Salimo 12:5. a

 Pambula kuswera yapa, Chiuta wamalisengi masuzgu nga chuma pacharu chosi. Kuti muziŵi mo wazamuchitiya venivi, ŵerengani nkhani yakuti “Kumbi Vingachitika Kuja Akuyanana pa Nkhani ya Chuma?”

 Kweni chinanga mphasonu panu, Bayibolu lingakuwovyani kumalana ndi masuzgu nga kukwera mtengu kwa vinthu. Munthowa wuli? Bayibolu le ndi ulongozgi wakovya wa mo mungagwiriskiya ntchitu ndalama mwazeru. (Nthanthi 23:4, 5; Wakutawula 7:12) Kuti muziŵi vinandi, ŵerengani nkhani yakuti “Vikiliyani Ndalama Ndipuso Katundu Winu” kweniso yakuti “Vo Mungachita Asani Musaniya Ndalama Zimana.”