Arara anandi a boma achita vinthu vachinyengu ndipu yeniyi ndisuzgu yikulu ukongwa pacharu chosi ndipu venivi vichitiska kuti paje masuzgu nganandi. a Mwakuyeruzgiyapu, mu nyengu ya mulili wa COVID-19, arara a boma muvyaru vinandi aŵambanga milandu yakuti akhuphuka chifukwa cha kuba ndalama zo zaperekekanga kuti ziwovyi ŵanthu pakulimbana ndi mulili. Vinthu va chinyengu venivi vatondekesanga ŵanthu kuti alonde chovyu chakuchipatala cho akhumbikanga ndipu venivi vachitiskanga kuti ŵanthu anandi asuzgikengi kweniso kufwa.

 Vakuchitika va chinyengu valuta panthazi ukongwa. David Cameron, yo wenga nduna ku United Kingdom, wangukamba kuti: “Chinyengu ndi mutatavu ukulu ukongwa ndipu vyaru vosi vichita jalidu lenili.”

 Kweni, te akusimikiza kuti vinthu vosi vachinyengu vo maboma ngachita vimalengi pambula kuswera yapa. Chifukwa wuli? Wonani vo Bayibolu likamba vakukwaskana ndi vo Chiuta wazamuchita.

 Mu Bayibolu mwe mazu yanga ngo Chiuta wangukamba. Iyu wangukamba kuti: “Ini Yehova, nditanja urunji; Nditinkha unkhungu kweniso vinthu vambula urunji.” b (Yesaya 61:8) Chiuta wawona asani ŵanthu asuzgika chifukwa cha vinthu vachinyengu vo ŵanthu anyaki achita. (Nthanthi 14:31) Iyu walayizga kuti: “Chifukwa cha kukandirizgika kwa ŵanthu wo asuzgika, . . . ndisokengi kuti ndichitepu kanthu.”—Salimo 12:5.

 Kumbi Chiuta wachitengenji? Mumalu mwakusintha vinthu mu maboma nga ŵanthu, iyu wajalikiskengi boma laki lakuchanya lo lidanika kuti “Ufumu waku Chiuta.” (Mariko 1:14, 15; Mateyu 6:10) Bayibolu likamba kuti: “Chiuta wakuchanya wazamujalikiska ufumu wo. . . wazamuphwanya ndi kutuzgapu maufumu ngosi ngenanga, ndipu ufumu wenuwu pe ndiwu wazamuŵaku mpaka muyaya.” (Daniyeli 2:44) Mwaviyo, Chiuta wazamugwiriskiya ntchitu Ufumu wenuwu kuti wamalisi vinthu vosi vachinyengu vo tiwona mazuŵa nganu.

 Kumbi tiziŵa wuli kuti mu Ufumu waku Chiuta mwazamuŵavi vinthu vachinyengu? Wonani fundu izi.

1.  1. Nthazi. Nthazi zosi za Ufumu uwu zazamutuliya kwaku Chiuta Wanthazizosi.—Chivumbuzi 11:15.

    Ntchifukwa wuli venivi vakukhumbika: Kuti boma la ŵanthu liyendengi umampha, lithemba ndalama zo ŵanthu apereka. Kanandi venivi vichitiska kuti ŵanthu achitengi vinyeda, abengi ndipuso agwiriskiyengi ntchitu ndalama zo mwambula kwenere. Kweni Ufumu uwu utovyeka ndi Chiuta wanthazizosi, ndipu wazamufiska chechosi cho ŵanthu akhumba.—Salimo 145:16.

2.  2. Wakulamuliya. Chiuta wakusankha Yesu Khristu kuti waje Wakulamuliya wa Ufumu wenuwu.—Daniyeli 7:13, 14.

    Ntchifukwa wuli venivi vakukhumbika: Chinanga mbakulamuliya amampha ukongwa nawu angachichizgika ndi munthu munyaki kuti achiti vinthu viheni. (Wakutawula 7:20) Mwakupambana ndi akulamuliya ŵenaŵa, Yesu wangulongo kuti ŵanthu angamuchichizga cha kuti walonde vinyeda. (Mateyu 4:8-11) Kusazgiyapu yapa, iyu waŵanaŵaniya ŵanthu ŵaki chifukwa chakuti watiŵayanja ukongwa ndipu watiŵakhumbiya vamampha.—Salimo 72:12-14.

3.  3. Marangu. Marangu nga Ufumu waku Chiuta ngamampha ukongwa ndipu ŵanthu wo atingavwiya akondwa.—Salimo 19:7, 8.

    Ntchifukwa wuli venivi vakukhumbika: Marangu nga ŵanthu ngakusuzga kungavwisa, ngakusuzga kungalondo ndipu nganyaki ngaja ngamampha cha chifukwa ngapereka so mwaŵi wakuti ŵanthu achitengi vinthu vachinyengu. Kweni, marangu ngaku Chiuta ngamampha ukongwa ndipu ngakovya. (Yesaya 48:17, 18) Kusazgiyapu yapa, marangu yanga ngachiska munthu kuti wachitengi vo ngakamba. (Mateyu 22:37, 39) Chiuta waziŵa vo ve mumtima ndipu wakuŵika marangu ngo wakhumba kuti ŵanthu angalondongi ndi mtima wosi chifukwa chakuti atimuyanja.—Yeremiya 17:10.

 Titikupemphani kuti muziŵi vinandi vakukwaskana ndi malayizgu nga mu Bayibolu ngakukwaskana ndi boma lo mwazamuŵavi vinthu vachinyengu.

•   Ŵerengani nkhani yakuti “Ufumu wa Mulungu Ndi Boma Lopanda Chinyengo” kuti muziŵi vifukwa vitatu vo tikambiya kuti mu Ufumu waku Chiuta mwazamuŵavi chinyengu.

•   Woneriyani vidiyo yakuti Kumbi Ufumu Waku Chiuta Ntchinthu Wuli? kuti muziŵi vinandi vakukwaskana ndi boma laku Chiuta ndipuso vo lazamuchita pacharu chapasi.

•   Yesani kwamba kusambira Bayibolu kwawezi mwakuchita kukambiskana kuti muwoni mo mungayanduliya ndi malayizgu nga mu Bayibolu.