Chaka chechosi, kuchitika vidilirisi masawuzandi nganandi. Chinanga kuti vidilirisi vinandi vituŵa vanthazi ukongwa cha, kweni vidilirisi vanthazi vinanga vinthu ukongwa, vizisa masuzgu ndipuso ŵanthu atufwa. Nyengu zinyaki, vichitiska tsunami yo yinanga vinthu ukongwa muvigaŵa vo ve kufupi ndi nyanja. Tsunami yichitiska kuti ŵanthu wo aja muvigaŵa vo afwi. Kumbi Bayibolu likukambiya limu kuti kwazamukuŵa vidilirisi vanthazi?

Munkhani iyi tikambiskanengi mafumbu yanga,

•  Kumbi Bayibolu likukambiya limu vakukwaskana ndi vidilirisi?

•  Kumbi vidilirisi vo vichitika mazuŵa nganu vifiska uchimi wa mu Bayibolu?

•  Kumbi uchimi wa mu Bayibolu wakukwaskana ndi vidilirisi ung’anamuwanji kwaku isi?

•  Fundu zaboza zo ŵanthu aŵanaŵana zakukwaskana ndi mauchimi nga mu Bayibolu ndipuso vidilirisi

 Yesu wanguzumbuwa vidilirisi mu uchimi wo ukulembeka mu Bayibolu. Mazu ngaki ngangulembeka mu mabuku ngatatu nga mu Bayibolu. Ndipu vo wakukamba mu mabuku yanga ndi ivi:

 “Mtundu wazamuyukiyana ndi mtundu unyaki, ufumu ndi ufumu unyaki, ndipu kwazamuja nja ndi vidilirisi mumalu ngakupambanapambana.”—Mateyu 24:7.

 “Mtundu wazamuyukiyana ndi mtundu unyaki, ufumu ndi ufumu unyaki; ndipu kwazamuchitika vidilirisi mumalu ngakupambanapambana ndipuso kwazamuja nja.”—Mariko 13:8.

 “Kwazamuchitika vidilirisi vikuluvikulu ndipu mumalu ngakupambanapambana mwazamuja nja ndi milili.”—Luka 21:11.

 Yesu wangukambiya limu kuti “vidilirisi vikuluvikulu” vazamuchitika “mumalu ngakupambanapambana” ndipu pa nyengu yeniyi pe kwazamuchitika so nkhondu, nja ndipuso milili. Asani vosi venivi vazichitika vazamulongore limu kuti tija ‘kukumaliya kwa nyengu yinu,’ pamwenga “mu mazuŵa ngakumaliya.” (Mateyu 24:3; 2 Timote 3:1) Mwakukoliyana ndi vo Bayibolu likamba, “mazuŵa ngakumaliya” ngakwamba mu 1914 ndipu ngechendamali.

 Hinya. Uchimi waku Yesu kusazgapu wo wangukamba wakukwaskana ndi vidilirisi, ukoliyana ukongwa ndi vinthu vo vichitika mazuŵa nganu. Kwambiya mu 1914, vidilirisi vakujumpha 1,950 vabaya ŵanthu akujumpha 2 miliyoni. a Wonani vakuyeruzgiyapu vimanavi ivi vo vachitika pambula kuswera yapa.

 2004—Indian Ocean. Chidilirisi chanthazi ukongwa cha 9.1 chingufika muvyaru vinandi ndipu chikubaya ŵanthu pafufupi 225,000.

 2008—China. Chidilirisi chanthazi ukongwa cha 7.9, chikunanga mizi ndi matawuni ndipu chikubaya ŵanthu pafufupi 90,000, ŵanthu pafufupi 375,000 akupwetekeka kweniso chikunanga nyumba za ŵanthu mamiliyoni nganandi.

 2010—Haiti. Chidilirisi chanthazi ukongwa cha 7.0 limoza ndi vidilirisi vimanavimana, vikubaya ŵanthu akujumpha 300,000 ndipu vikuchitiska kuti ŵanthu anandi asoŵi pakuja.

 2011—Japan. Chidilirisi chanthazi ukongwa cha 9.0 ndipuso tsunami yo yinguchitika vikubaya ŵanthu pafufupi 18,500 kweniso chikuchitiska kuti ŵanthu mahandiredi nganandi asami munyumba zawu. Kampani yakupanga magesi ya Fukushima yingunangika, ndipu pangupangika mpweya wa nyukiliya. Pati pajumpha vyaka 10, venga vakusuzga kuti ŵanthu pafufupi 40,000 awere kunyumba zawu kufupi ndi kumalu ko apangiya magesi chifukwa cha mpweya uheni wenuwu.

 Uchimi wa mu Bayibolu wakukwaskana ndi vidilirisi utitiwovya kuziŵa vo vazamuchitika munthazi. Yesu wangukamba kuti: “Asani mwaziwona vinthu venivi vichichitika, muziziŵi kuti Ufumu waku Chiuta we pafupi.”—Luka 21:31.

 Bayibolu likamba kuti Ufumu waku Chiuta ndi boma chayilu lakuchanya lo Fumu yaki ndi Yesu Khristu. Ufumu wenuwu ndiwu Yesu wangukambiya akusambira ŵaki kuti awupempheriyengi.—Mateyu 6:10.

 Asani Ufumu waku Chiuta waziyamba kulamuliya pacharu chapasi, Chiuta wazamuchitiska kuti masoka ngachilengedu, nge vidilirisi vizileki kupweteka ŵanthu. (Yesaya 32:18) Kweniso wazamuchizga ŵanthu wo apwetekeka ndi vidilirisi kweniso wo asuzgika maŵanaŵanu chifukwa cha vidilirisi. (Yesaya 65:17; Chivumbuzi 21:3, 4) Kuti muziŵi vinandi, ŵerengani nkhani yakuti “Kodi Ufumu wa Mulungu Udzachita Chiyani?”