Pa 13 January mpaka pa 11 February 2024, akuchita masaza nga bola akutuliya mu vyaru vakupambanapambana va mu Africa, anguchichita masaza ngawu nga nambala 34 nga Africa Cup of Nations. Masaza yanga anganguchitikiya ku Côte d’Ivoire, ndipu ŵanthu masauzandi nganandi akutuliya mu vyaru 24 anguchisanilikaku. Pa nyengu yamasaza yeniyi, Akaboni aku Yehova angugwira ntchitu yapade yakupharazgiya ŵanthu wo anguza kwenuku uthenga wa mu Bayibolu. Timashelufu tamabuku takujumpha 120 tinguwikika mu malu ngakupambanapamba mu matawuni ngakulungakulu 5, ko masaza ngenanga ngachitikiyanga.

Ku Abidjan, munyamata munyaki wangufika po penga ka shelufu ndipu wakhumbisiskanga kuto kabuku kakuti Asani Munthu yo Mutanja Watayika. Munyamata uyu wangukamba kuti mubwezi waki wakufwa pambula kuswera. Abali ŵidu ŵati amuŵerenge lemba lakupembuzga la Yohane 5:28, 29 munyamata uyu wanguchiskika ukongwa. Pavuli paki, wangudana abali ŵidu kuti aluti kunyumba yaki kuti akalutirizgi kukambiskana.

Nyengu yinyaki, wapolisi ku Anyama wangufika po penga ka shelufu ka mabuku. Iyu wangukambiya Akaboni kuti watanja kuŵerenga mabuku ngidu, ukongwa nkhani zo zikonkhoska mo vinthu vikulengeke kweniso mo umoyu ukwambiya. Chinanga kuti wengavi nyengu, kweni wanguŵasiliya nambala yaki abali ŵidu kuti akambiskani nayu.

Ada anyaki ku Abidjan, anguchifika po penga kashelufu ndipu angukambiya abali kuti ŵeche achinyamata asambiranga Bayibolu ndi Akaboni aku Yehova kweni anguleka kukambiskana ndi abali ndi azichi. Pati pajumpha vyaka vinandi anguwona kuti Akaboni aku Yehova apambana ukongwa ndi visopa vinyaki. Yiwu angukwaskika kuwona chimangu kweniso kukoliyana ko ŵanthu aku Yehova alongo, ukongwa pa nyengu yo wanthu agaŵikana chifukwa cha ndali. Yiwu wangupempha kuti asambirengi Bayibolu ndipu sonu abali ŵidu asambira nayu mwakujalikiskika.

Tikondwa ukongwa kuti abali ndi azichi ŵidu ku Côte d’Ivoire ŵenga ndi waŵi wakovya ŵanthu a mitundu yakupambanapambana kuvwa “vinthu vikulu vaku Chiuta.”—Machitidu. 2:11.