Pa 18 December, 2021, Mubali Dirk Grundmann, wa mu Komiti ya Nthambi ku Central Europe, wangutuzga vigaŵa vakwamba va Bayibolu la Charu Chifya la Malemba Ngakupaturika mu Chineneru Chamanja cha ku German. Ŵanthu pafufupi 800 anguwonere kutuzgika kwa buku la mu Bayibolu la Mateyu ndi Yohane kuziya pa vidiyo stream.

Boma la German linguzomereza kuti Chineneru Chamanja cha ku German chije chineneru kwambiya mu 2002. Kweni, Akaboni aku Yehova angwamba kufwatuliya chineneru chamanja pa unganu wadera ndi wachigaŵa kwambiya cha mu ma 1960. Mazuŵa nganu, apharazgi 571 ateŵete mumipingu 11 ya Chineneru Chamanja cha ku German ndipuso timagulu 21.

Yaka nkhakwamba kuti mabuku nga mu Bayibolu nga Chineneru Chamanja cha ku German ngatuzgiki. Kali, apharazgi ŵenga waka ndi mavesi nga mu Bayibolu ngakufwatulika kuti achitengi sambiru la pakuŵija ndipuso muuteŵeti.

Mpharazgi munyaki wangukamba kuti: “Chifukwa chakuti pengavi Bayibolu losi lamphumphu, kanandi vasuzganga kusaniya fundu za mu Baybolu pamwenga ukaboni wakulongo kuti vo tigomezga vauneneska. Venga so vakusuzga kuti wakusambira Bayibolu waŵanaŵaniyengi fundu ya mu Bayibolu zuŵa lelosi chifukwa chakuti kwenga kwakusuzga kuwonere vesi lelosi pakulija.”

Wakufwatuliya munyaki wangukamba kuti: “Kugwira ntchitu yakufwatuliya Bayibolu lo ndi mazu ngaku Yehova mu nthowa yakuti ŵanthu ambula kuvwa aje paubwezi ndi iyu, nkhwakuziziswa ukongwa. Te akukondwa kuja ndi mwaŵi ukulu wakugwiraku ntchitu yeniyi.”

Tipempha kuti Bayibolu la Charu Chifya la Chineneru Chamanja cha ku German, liwovyi ŵanthu anandi akufwasa kuti aziŵi nthowa yaku Yehova.—Salimo 25:9.