Ŵanthu wosi 15 a mu Komiti Yakuwona va Wanangwa wa Ŵanthu ya United Nations (CCPR) asuska mwanthazi vo boma la Kyrgyzstan lichita pakuswa wanangwa wa Akaboni aku Yehova wakuchita vinthu vakukwaskana ndi chisopa chawu mu vigaŵa vitatu va charu cho. Papegi 7 la chikalata cha wupu wa CCPR, penga mazu ngakuti boma la Kyrgyzstan lipereki “ndalama zakukwana zachipepesu” kwa Akaboni ndipuso “achiti vosi vakwenere kuti azileki kuswa so wanangwa wawu munthazi.” Yaka nkhachiŵi kuti wupu wa CCPR ususki vo boma la Kyrgyzstan lichita pakuswa wanangwa wa Akaboni.

Gulu lakwamba la Akaboni aku Yehova ku Kyrgyzstan lingulembesa mu 1993, ndipu aja zika ya mucharu cho kwambiya mu 1998. So kwa vyaka vinandi, Akaboni aja achisopa mwawanangwa mucharu cho. Kweni pati pajumpha vyaka 10, komiti yakuwona vachisopa ya SCRA (State Committee on Religious Affairs) yingukana kuti Akaboni aku Yehova alembesi chisopa chawu kumwera kwa Kyrgyzstan muchigaŵa cha Osh, Naryn ndi Jalal-Abad. Venivi vinguchitika chinanga kuti abali angupempha mwakuwerezawereza kuti alembesi. Chifukwa chakuti, wupu wa SCRA ungukana kuti Akaboni aku Yehova alembesi muvigaŵa venivi, abali ndi azichi akanizika kuti achitengi vinthu vakukwaskana ndi vo agomezga, kuchita maunganu nga chisopa ndi ngadera, kuja ndi vinthu pamwenga kugwiriskiya ntchitu katundu pakusopa. Mwaviyo, wupu wa CCPR unguwona kuti boma la Kyrgyzstan linguchita vinthu mwasankhu pakukaniza Akaboni aku Yehova kuchita vinthu vakukwaskana ndi chisopa chawu muvigaŵa vitatu venivi.

Wupu wa CCPR ulindizga arara a ku Kyrgyzstan kuti “achiti vosi vakwenere kuti azileki kuswa so wanangwa wawu munthazi.” Boma la Kyrgyzstan le ndi mazuŵa 180 ngakuti liziŵisi wupu wa CCPR vakukwaskana ndi vo lichitengi ndi cheruzgu chenichi.

Tiziŵa cha asani apolisi aku Kyrgyzstan avwiyengi vo wupu wa CCPR likukamba ndipuso asani angazomereza abali ndi azichi ŵidu muvigaŵa venivi kuchita vinthu vakukwaskana ndi kusopa. Kweni akaswiri akuwona vawanangwa wa ŵanthu a ku Forum 18, aja achiwona mwakuphwere vo vichitikiya abali ndi azichi ŵidu ndipu angukamba kuti komiti ya SCRA “yingutoliyaku kanthu cha vo wupu wa UN ungusankha mu 2019.”

Kwali boma la Kyrgyzstan livwiyengi ulongozgi wakutuliya ku wupu wa UN pamwenga cha, te akusimikiza kuti Yehova wawona vo abali ndi azichi ŵidu ku Kyrgyzstan akunthiyapu. (Salimo 37:18) Ada ŵidu achanju akuchanya alutirizgengi kutumbika kugomezgeka kwawu ndipuso chiganga chawu.—Salimo 37:28.