Khoti la Pozharskiy lo le muchigaŵa cha Primorye liperekengi cheruzgu chaki pa mulandu wa Mubali Yuriy Belosludtsev ndi Sergey Sergeyev. a Abali wosi ŵaŵi angayeruzgika kuti akaje mujeri kwa vyaka 12.

Yuriy Belosludtsev

• Chaka cho Wakuwiya: 1964 (Ku Smidovich, muchigaŵa cha Jewish Autonomous)

• Mo Wakukuliya: Wakulereka ndi ambuyaki mu muzi unyaki umana. Wagwiranga ntchitu nge injiniya pa kampani yinyaki ya kupanga magesi. Watanja ulovi kweniso kuchita masaza ngakwenda mu ayisi

  Wakutolana ndi Yelena mu 1985. Wosi angukhorwa ndi vo Chiuta wakulayizga kuti wazamutuzgapu vinthu viheni ndipuso masuzgu ngosi. Anguzizwa kuwona kufiskika kwa mauchimi nga mu Bayibolu. Venivi vinguŵachitiska kuti ayambi kusambira Bayibolu. Ndipu angubatizika mu 1994

Sergey Sergeyev

• Chaka cho Wakuwiya: 1955 (Ku Dukhovnitskoye, muchigaŵa cha Saratov)

• Mo Wakukuliya: Wagwiranga ntchitu mu mgodi wa maka mpaka po wanguleke ntchitu yeniyi. Wakutolana ndi muwolu waki Nelly mu 1991, ndipu ŵe ndi ŵana anthukazi ŵaŵi ndi munthulumi yumoza. Banja ili litiŵayanja ukongwa agalu

  Angwamba kusambira Bayibolu ŵati atolana waka. Angukhorwa ndi mauchimi ngauneneska nga mu Bayibolu ndipuso ulongozgi wakovya. Akubatizika mu 1996

Pa 17 March 2019, apolisi a gulu la Federal Security Service (FSB) angufufuza nyumba zinandi za Akaboni aku Yehova ku Luchegorsk, muchigaŵa cha Primorye. Abali ndi azichi angufumbika mafumbu ndipu anyaki anguŵafumba kwa maora 7. Yuriy ndi Sergey angumangika.

Pati pajumpha mazuŵa ngaŵi, abali wosi anguŵaŵika mujeri kwa myezi yakujumpha 6 kulindiziya mulandu wawu. Ŵati aŵatuzga mujeri mu September 2019, yiwu anguchija pa ukayidi wa panyumba kwa myezi pafufupi 5.

Wosi anguziŵa kuti pempheru ndilu linguŵawovya kuti akunthiyepu pa nyengu yo ŵenga mujeri. Sergey wangukamba kuti Bayibolu nalu lingumuwovya ukongwa kuti walutirizgi kuwona vinthu mwakwenere. Iyu wangukamba kuti: “Ndingukumbuka mazu ngaku Yesu ngakuti: ‘Asani atombozga ini, namwi azakukutombozgani.’ (Yohane 15:20) Mu mtima ndingukamba ndija kuti: ‘Nadi! Vosi vo vititichitikiya, vikuŵachitikiyapu kali anyidu, Yesu Khristu, akusambira ŵaki ndipuso akutumika. Ndikayika cha kuti Yehova wagomezga kuti ndiperekengi ukaboni wamampha. Kuŵanaŵaniya venivi kweniso mo Yehova wamukiya mapempheru ngangu kwandiwovya kuti ndije wakukho, wakufwasa ndipuso walikondwa.”

Yuriy wangukamba kuti pakwamba wasuzgikanga kuŵerenga Bayibolu zuŵa lelosi. Kweni mubali munyaki wangumuwovya kuti wasinthi. Venivi vingumuwovya panyengu yo wenga mujeri. Iyu wangukamba kuti: “Ndakumbukanga vakuyeruzgiyapu va ŵanthu wo azumbulika mu Bayibolu ndipuso wo azumbulika mu mabuku ngidu ngo ndingusambirapu kuvuli. Vakuyeruzgiyapu venivi vingundiwovya kuti ndije wakukho ndipuso kuti ndilutirizgi kuja walikondwa. Vandiwovya so kuti ndileki kufipa ukongwa mtima.”

Tipempha Yehova kuti walutirizgi kuja malu “ngakuthaŵiyaku kweniso nthazi” kwa abali ndi azichi ŵidu ku Russia “panyengu ya masuzgu.”—Salimo 46:1.