Pambula kuswera yapa, Khoti la Zeyskiy lo le Muchigaŵa cha Amur liyeruzgengi mulandu wakukwaskana ndi Mubali Konstantin Moiseyenko. a Loya wa boma wakupempha kuti mubali uyu wakaje mujeri vyaka 6.

Konstantin Moiseyenko

• Chaka cho wakuwiya: 1976 (ku Abakan, Republic of Khakassia)

• Mo wakukuliya: Iyu ndi mvurwa waki mbana amuwoli. Weche wachinyamata, wangusambira masaza nga ndewu. Iyu wagwiranga ntchitu yakuwonere makompyuta kweniso ya uyinjiniya

  Mu 1998, wakutorana ndi Margarita yo wagwira ntchitu yakusona. Wosi angwamba kusambira Bayibolu ndi Akaboni aku Yehova cha mu ma 2000. Mbiri yo yikonkhoskeka mu Bayibolu kweniso vo likamba vakukwaskana ndi sayansi, vinguchitiska Konstantin kuti waje ndi mtima wakukhumba kuziŵa vinandi. Iyu ndi muwolu waki angubatizika mu 2001

  Awisi aku Konstantin akutayika vyaka 10 vo vajumpha. Ndipu kwa vyaka 6 wanguphwere ambuyaki wo ŵenga achibulumutiya mpaka po angufwiya

Pa 11 March 2019, apolisi akufufuza milandu a gulu la FSB (Federal Security Service) Muchigaŵa cha Amur angwamba kumumba mulandu Mubali Konstantin Moiseyenko. Pavuli paki, apolisi ŵenaŵa angufufuza nyumba zinkhondi za Akaboni aku Yehova kusazgapu nyumba ya Mubali Konstantin. Yiwu angulonda malaputopu, mafoni kweniso makalata. Konstantin angumuŵika pa mundandanda wa ŵanthu wo boma la Russia likamba kuti achita vinthu vakofya, ndipu akumujaliya ma akawunti ngaki ngaku banki.

Konstantin wakumbuka fundu zakuchiska zo iyu ndi muwolu waki Seoul angusambira pa unganu wachigaŵa, ku South Korea, mu 2018. Pa unganu wenuwu, wakukamba nkhani munyaki wangupempha abali ndi azichi wo angumangikapu chifukwa chakukana kusere usilikali kuti asoki. Konstantin wangukamba kuti: “Pafufupi abali wosi mu sitediyamu angusoka.” Wakukamba nkhani wanguti: ‘Wonani! Wosi mbamoyu ndipu ŵeumampha!’ Venivi vingundiwovya kuwona kuti nani ndingafiska kukunthiyapu chiyesu chenichi.” Wakukamba nkhani wangukonkhoska so fundu ya pa lemba la Salimo 23:5, yakuti: “Mutindinozge thebulu pa masu pa arwani ŵangu. Mutu wangu mutiwusisipuwa ndi mafuta; Kapu yangu yazaza umampha.” Konstantin wakumbuka kuti mazu ngenanga nganguŵafika pa mtima ukongwa ŵanthu wo anguwungana pa unganu uwu.

Konstantin wawonga so ukongwa chovyu cho abali ndi azichi pacharu chosi apereka. Iyu wangukondwa kuziŵa kuti Akaboni pacharu chosi akhumbisiska kuvwa mo mulandu waki uyendiyengi ndipu atimupemphere. Iyu wangukamba kuti: “Ndiwona mzinda ukulu wa Akhristu anyangu wama pafupi ndi mubali pamwenga mzichi weyosi yo watombozgeka mu charu chidu. Vo Akhristu ŵenaŵa achita, vikoliyana ndi mazu nga pa 1 Yohane 3:16, ngo chigaŵa chinyaki chikamba kuti: ‘Nasi tikhumbika kupereka maumoyu ngidu chifukwa cha abali ŵidu.’”

Tikondwa ukongwa asani tituvwa kuti Yehova walutirizga kuŵawovya abali ndi azichi ŵidu ku Russia. Venivi vititiwovya kuja ndi chigomezgu kuti nasi watipaskengi “nthazi ndi mazaza” asani titombozgeka.—Salimo 68:35.