Pa 6 April 2021, Khoti la Abinskiy lo le muchigaŵa cha Krasnodar likuyeruzga kuti Mubali Aleksandr Shcherbina ngwakunanga ndipu wakaje mujeri vyaka vitatu. Khoti lati layeruzga waka venivi, mubali uyu anguluta nayu kujeri. Mubali Aleksandr wapangengi apilu cheruzgu chenichi.

Aleksandr Shcherbina

• Chaka cho Wakuwiya: 1976 (Ku Kholmskaya, muchigaŵa cha Krasnodar)

• Mo Wakukuliya: Apapi ŵaki wosi akutayika. Wagwiranga ntchitu yakwendesa magalimotu ngakulungakulu, ya umakanika kweniso ya ukalipentala.

• Po wenga wachinyamata, wayanjanga kuseŵe basketball kweniso bola la malundi. Wangwamba kusambira Bayibolu ndi Akaboni aku Yehova wati wafika vyaka va mu ma 20. Wati wasambira vakukwaskana ndi kufiskika kwa uchimi wa mu Bayibolu, wangusimikiza kuti Bayibolu ndi Mazu ngaku Chiuta. Ndipu wangubatizika mu 1999

Kwa maulendu ngaŵi, mu April ndi December 2020, arara a boma muchigaŵa cha Krasnodar angufufuza munyumba ya Mubali Aleksandr Shcherbina. Kwa maulendu ngosi ngaŵi, Aleksandr wangufumbika mafumbu ndipu angumulonda Mabayibolu kweniso vipangizu va mazuŵa nganu vo wagwiriskiyanga ntchitu.

Pa 17 March  2021, Khoti la muchigaŵa cha Abinskiy, lingwamba kuvwa mulandu wa Mubali Aleksandr. Nge mo achitiya ndi milandu ya abali ŵidu wosi, mulandu wa Mubali Aleksandr nawu unguyeruzgika mwaliŵi ukongwa.

Mu khoti, Aleksandr wangulongoro mwachiganga kuti: “Uneneska ngwakuti, ndimbika mulandu chifukwa chakugomezga Chiuta ndipuso kulutirizga kuja Kaboni waku Yehova. Yapa tingakamba kuti ndimbika mulandu chifukwa chakugwiriskiya ntchitu wanangwa wangu wo ukulembeka mu dangu nambala 28 ya Marangu nga ku Russia. Vo ndigomezga vituliya mu Bayibolu ndipu pa chifukwa chenichi, yiwu atitipusikiya pakukamba kuti tichita vinthu vakofya.”

Titimuwonga Yehova chifukwa watovya abali ndi azichi ŵidu ku Russia wo alutirizga kuja chakuwoniyapu chamampha pa nkhani yakulongo chiganga ndipuso chivwanu. Ndipu tiziŵa kuti Yehova wazakuŵatumbika chifukwa cha kukunthiyapu kwawu pa kuchita “khumbu laku Chiuta.”—Aheberi 10:36.