Pa 26 October 2020, khoti la Lgov likukana so kuti Mubali Dennis Christensen, yo waja kujeri kwa vyaka vakujumpha vitatu, watuzgiki mwaliŵi mujeri. Iyu amupaska mazuŵa 10 kuti wachiti apilu. Mubali Christensen wazamutuzgika mujeri mu May 2022. Nyengu yeniyi yisazgapu nyengu yo wangujaliya mujeri wachilindizga kuti mulandu waki uyeruzgiki. Kweni mwezi wamala arara akujeri angukamba kuti iyu ndi “munthu wambula kuvwiya ” marangu nga kujeri. Venivi vingachitiska kuti aleki kumutuziyaku nyengu yo walindiziyanga mulandu waki ndipu wangalutirizga kuja mujeri kujumpha May 2022.

Kutuliya pa 25 May 2017 po Mubali Christensen wangumangikiya, iyu ndi muwolu waki Irina, aja achikunthiyapu masuzgu nganandi ngakuliŵavu kweniso kusuzgika maŵanaŵanu. Chinanga kuti ve viyo, yiwu alutirizga kuja akukondwa ndipu akhumbisiska kukunthiyapu mayeseru ngo ngatesa chivwanu chawu. Chinyaki cho chitiŵawovya kuja akukho ndi mapempheru mamiliyoni nganandi ngakutuliya kwa abali ndi azichi pacharu chosi.