Pa 28 October 2020, khoti la muchigaŵa cha Bryansk likuyeruzga kuti Mubali Vladimir Khokhlov ndi Eduard Zhinzhikov kweniso Mzichi Tatyana Shamsheva ndi Olga Silaeva mbakunanga. Pakwamba, khoti linguyeruzga kuti abali ndi azichi ŵenaŵa anyaki aje mujeri kwa chaka chimoza ndipu anyaki kwa chaka ndi myezi yitatu. Kweni chifukwa chakuti akuja kali mujeri kwa nyengu yitali mulandu wawu wendayeruzgiki, yiwu akhumbika cha kuja so mujeri vyaka vinyaki. Kweni chifukwa cha vo khoti layeruzga musanawale, abali ndi azichi ŵenaŵa alutirizgengi kuwoneka kuti akupalamulapu mulandu. Chinanga kuti ve viyo yiwu mbakukondwa chifukwa ajengi mujeri cha. Palivi dangu lo lingazomereza kuti akumiya boma apangi apilu kweniso kupempha kuti abali yaŵa aŵapasi chilangu chikulu ukongwa.

Khoti lakwamba lechendapereki cheruzgu abali anguja mujeri kwa mazuŵa 316 ndipu azichi kwa mazuŵa 245. Ŵati atuzgika mujeri, azichi yaŵa anguŵafumba mafumbu mu Lipoti Lachinkhondi la Wupu Wakulongozga la 2020. Yiwu angukonkhoska kuti kupemphera, kuŵerenga Bayibolu ndipuso kuja ndi mtima wakuwonga kunguŵawovya kukunthiyapu mayeseru mwalikondwa.