Pa 28 October 2020, khoti la mutawuni ya Dimitrovgrad muchigaŵa cha Ulyanovsk likukana kuti Mubali Konstantin Bazhenov watuzgiki mwaliŵi mujeri kweniso kuti wapereki fayini mumalu mwakuti waje mujeri. Iyu wakupaskika mazuŵa 10 kuti wapangi apilu.

Mubali Bazhenov wati waŵikika mujeri wachilindiziya mulandu waki mu June 2018, wenga ndi mantha. Kweni, wangwamba kulemba mavesi nga mu Bayibolu munoti yaki. Ndipu iyu wangulemba mavesi 500 ngo wanguloweza. Pati pajumpha nyengu, wangulonde Bayibolu ndipu wanguliŵerenga kwa myezi yinayi. Mubali Bazhenov wangulemba makalata ngo ngenga ndi fundu zakutuliya mu Bayibolu kuti wachiski anyaki. Iyu wambanga so sumu za Ufumu ndipuso wapempheranga kwaku Yehova nyengu zosi kuti wamuwovyi.

Mubali Bazhenov wanguja mujeri wachilindiziya mulandu waki kwa mazuŵa ngakujumpha 340. Mu September 2019 angumusaniya kuti ngwakunanga ndipu angumuyeruzga kuti wakaje mujeri kwa vyaka vitatu ndi hafu. Iyu walutirizga kusambira Bayibolu ndipuso kupemphera kwaku Yehova. Tiwonga ukongwa Yehova, pakumuwovya Mubali Bazhenov kupanga mwambu wa Chikumbusu we mujeri. Chifukwa chakuti Mubali Bazhenov we paubwezi wakukho ndi Yehova iyu wafiska kukunthiyapu masuzgu mwalikondwa. Tiyeni tilutirizgi kumupemphere Mubali Bazhenov.