Pa 30 March 2021, Khoti la Abinskiy lo le muchigaŵa cha Krasnodar likupereka cheruzgu chaki pa mulandu wa Mubali Oleg Danilov. Mubali uyu akumuyeruzga kuti wakaje mujeri vyaka vitatu. Khoti lati layeruzga waka, iyu angumutole kujeri.

Oleg Danilov

• Chaka cho Wakuwiya: 1974 (Usolye-Sibirskoye, ku Siberia)

• Mo Wakukuliya: Mu 1958, ambuyaki angusambira Bayibolu ndi Akaboni aku Yehova wo ajanga ku ukapolu ku Siberia. Wakulereka ndi apapi achikhristu ndipu wangubatizika mu 1991

• Wangutolana ndi muwolu waki Nataliya, mu 1995. Yiwu ŵe ndi ŵana anthulumi ŵaŵi. Banja lawu litanja kwenda kweniso kuwona chilengedu

Pa 29 April 2020, nyumba ya Mubali Danilov ndiyu yenga yakwamba kufufuzika. Apolisi angusaniyamu mabuku ngengosi cha ngo akungakaniza, kweni angulonda mafoni ndipuso vinthu vinyaki vo banja ili lagwiriskiyanga ntchitu. Chinanga kuti pengavi ukaboni wewosi, kweni mu November 2020 Mubali Oleg akumujuliya mulandu. “Milandu” yo atimumba yisazgapu kusambiza vinthu vakukwaskana ndi chisopa, kukamba nkhani kweniso kukambiskana nkhani za mu Bayibolu ndi ŵanthu anyaki.

Pa 2 December 2020 nyengu ya 6:00 mulenji, apolisi anguchifufuza kachiŵi munyumba yaku Oleg ndipu pa nyengu iyi angufufuza kwa nyengu yitali kuphara pakwamba. Pavuli paki, Mubali uyu angumutole kupolisi ndi kuchimufumba mafumbu.

Khoti lingwendesa mulandu waku Oleg mwaliŵi ukongwa, mwakuti mubali uyu wangwamba kuchiwoneke kukhoti pa 23 March 2021. Yo wafumbanga mafumbu, zina laki O. I. Komissarov wafufuzanga so mulandu wa Mubali Aleksandr Ivshin yo we ndi vyaka 63. Mubali Ivshin akumuyeruzga kuti wakaje mujeri kwa vyaka 7 ndi hafu yo ndi nyengu yitali ukongwa, ndipu lingwendesa so mwaliŵi ukongwa nkhani ya Mubali uyu.

Chinanga kuti iyi ndi nyengu yakusuzga ukongwa kwa Mubali Oleg ndi banja laki, kweni tiziŵa kuti Yehova Chiuta widu wangaluwa cha ntchitu yawu ndi chanju cho atichilongo pa zina Laki.—Aheberi 6:10.