Pambula kuswera yapa, Khoti la Solombalskiy ku Arkhangelsk liyeruzgengi mulandu wa Mubali Yevgeniy Yakku. a Iyu angamuyeruzga kuti wakaje mujeri kwa vyaka 15.

Yevgeniy Yakku

• Chaka cho wakuwiya: 1980 (Mu muzi wa Sosnovets, ku Republic of Karelia)

• Mo Wakukuliya: Wechemwana wakondwanga ukongwa kuwona mo uchimi wa mu Bayibolu ufiskikiya. Wakubatizika mu 2006. Wangusamiya ku Arkhangelsk kuti wakasambiri sukulu yakusambiza va bizinesi. Wakutorana ndi Irina mu 2007. Wosi atanja kuchitembeya kweniso kucheza kubwalu kwa nyumba kwawu

Ndi mulenji pa 18 February 2019, arara aboma ku Russia angufufuza nyumba ya Mubali Yevgeniy Yakku ndipu angumumanga chifukwa akambanga kuti nayu we mu gulu la ŵanthu wo achita vinthu “vakofya.” Apolisi amumuzi angumanga Yevgeniy ndi kuluta nayu kujeri. Iyu wanguja mujeri kwa mazuŵa ngaŵi. Abwezi ŵaki kweniso ŵanthu amubanja laki anguziŵa cha kuti amuŵika kujeri nili.

Wati watuzgika, Yevgeniy wangukanizgika kutuwapu panyumba usiku, kuchitiska unganu wewosi pa nyumba yaki kweniso kukambiskana ndi anyaki kwali mpha foni, mameseji pamwenga pa intaneti. Pati pajumpha myezi 7, khoti lingumutuzgiyaku vinyaki mwa vinthu vo angumukaniza kuchita ndipu angumuzomereza kuti wayambi kwenda mazulu.

Pa 25 November 2019, Yevgeniy wangumbika mulandu wakuti walongozga ntchitu za gulu lo boma likamba kuti lichita vinthu “vakofya.” Pavuli paki, angukamba kuti we ndi milandu yinyaki yinandi. Asani khoti lingakamba kuti we ndi mulandu, ndikuti angamuyeruzga kuti wakaje mujeri kwa vyaka 15. Venivi vachitiska kuti Yevgeniy ntchitu yimumaliyi, amujaliyi maakaunti nga ku banki ndipuso kuti amulondi magalimotu ngaki ngaŵi.

Pa nyengu yakusuzga yeniyi, Yevgeniy ndi Irina alutirizga kuthemba Yehova. Irina wangukamba kuti: “Asani ndiwona mo Yehova wamukiya mapempheru ngangu ndipuso kuphwere ini ndi Zhenya [Yevgeniy], ndisoŵa chakukamba”

Mwakuyeruzgiyapu, Irina wangupempha Yehova kuti wamuwovyi mulumu waki kuti waje ndi chimangu cha mumtima kweniso kuti wakonkhoski umampha vo wagomezga pa nyengu khoti liyeruzga mulandu waki. Venivi ndi Yevgeniy nayu wapemphanga kwaku Yehova. Iyu wangukamba kuti: “Pa nyengu yeyosi yo ndalutanga kuchiwonana ndi komiti yakufufuza milandu pamwenga kuchiwoneke kukhoti, ndapempheranga kwaku Yehova kuti wandipaski zeru.” Iyu wawona mo Yehova wangumukiya mapempheru ngaki. Yevgeniy wangukamba kuti: “Ndakambanga vinthu chayivu vo ndakhumbanga nadi kukamba kweni ndakambanga vinandi cha.” Iyu wangukamba so kuti: “Yehova walongo kuti wandijowo ndija cha ndipu wamuka mapempheru ngangu munthowa zinandi. Sonu ndipu nditiliwona umampha janga laku Yehova kuphara kali.”

Po walindiziya mulandu waki, tiziŵa kuti Yehova walutilizgengi kumupaska chiganga Yevgeniy kuti wajivikiliyi “mwakuzika kweniso ndi ulemu ukulu.”—1 Peturo 3:15.