Kutuwa pa 29 January mpaka pa 11 March 2024, abali ndi azichi akujumpha 11,000 akutuliya muvigaŵa vakupambanapambana ku South Africa angugwiraku ntchitu ya upharazgi wapade ku ŵanthu wo alongoro chineneru cha Chikosa kuchigaŵa cha Eastern Cape. Chiŵerengeru chilongo kuti ŵanthu 7 miliyoni wo aja muchigaŵa ichi alongoro Chikosa. Chifukwa cha upharazgi wapade wenuwu, ŵanthu akujumpha 2,700 angupempha kuti asambirengi Bayibolu.

Pa nyengu ya upharazgi yeniyi, azichi ŵaŵi angukumana ndi munthukazi munyaki yo mzichi waki wenga wakuti watayika waka kwa masabata ngaŵi ngo ngajumpha. Munthukazi uyu wachiliya wangukambiya azichi yaŵa vakukwaskana ndi nyifwa ya mzichi waki. Yiwu angumupembuzga ndikumuŵerenge lemba la Chivumbuzi 21:3, 4. Iyu wakhumbanga kuziŵa vinandi vakukwaskana ndi malayizgu nga mu Bayibolu nga mo nyifwa kweniso masuzgu vazamumaliya. Munthukazi mwenuyu wangufumba zuŵa kweniso malu ngo tichitiyaku maunganu ngidu. Ndipu angwamba so kusambira nayu Bayibolu.

Mzichi munyaki zina laki Zukiswa wangwamba kukambiskana ndi ndi munthukazi yo wasuzgika nyamakazi. Nthenda yeniyi yamuchitisanga kuti wasuzgikengi kupenje ŵana ŵaki chakurya. Munthukazi uyu wafipanga mtima kuti alivi chechosi chakuti angarya zuŵa lo chifukwa wengavi nthazi zakukasiya fulawu. Mwachanju Zukiswa wanguŵawovya kukasa fulawu po mzichi munyaki yo wenga nayu wakambambisananga nawu uthenga wa mu Bayibolu. Chifukwa cha likondwa kweniso chanju cho angumulongo, munthukazi uyu wangukhumbisiska kukambiyaku mabwezi ngaki nganandi vo azichi ŵaŵi yaŵa angumuchitiya. Ndipu pati pajumpha nyengu wangwamba kusambira Bayibolu ndi Akaboni.

Pa nyengu yo apharazganga upharazgi wa nyumba ndi nyumba mutawuni ya Gqeberha, abali ŵaŵi angukumana ndi munthulumi yo we ndi janja limoza. Iyu wangufumba kuti ntchifukwa wuli Chiuta wazomereza kuti Satana walamuliyengi charu po taŵanthu tikutuliya kwaku Chiuta. (1 Yohane 5:19) Abali ŵidu angugwiriskiya ntchitu Bayibolu pakumuka fumbu laki. Pati pajumpha nyengu yimanavi zuŵa lenili, ŵati awonere vidiyo ya mutu wakuti Ntchifukwa Wuli Chiuta Wazomerezga Kuti Tisuzgikengi?, munthulumi uyu ndi muwolu waki wosi angukondwa ukongwa ndipu anguzomera kusambira Bayibolu.

Mzichi widu munyaki, yo wapharazganga so ku Gqeberha, wangupempha munthukazi munyaki kuti waŵerengi lemba la Masalimo 37:29. Wati waŵerenga vesi ili mu Bayibolu laki munthukazi uyu wangukamba kuti wavwisa cha. Pavuli paki, mzichi wangumuŵerenge so vesi ili mu Bayibolu la Charu Chifya la Malemba Ngakupaturika muchineneru cha Chikosa. Munthukazi uyu wangukamba kuti: “Mazu ngo akugwiriskiya ntchitu mu Bayibolu ili ngavwika umampha ukongwa. Ndipu ndavwisa umampha ukongwa kuphara nga mu Bayibolu langu!” Sonu iyu wakondwa kusambira Bayibolu.

Tikondwa ukongwa kuti ŵanthu anandi wo alongoro Chikosa akutuliya muvigaŵa vinandi vaku South Africa avwisiya uthenga wachilindizga wo “Chiuta wakupembuzga ukongwa” watitipaska kuziya mu Mazu ngaki Bayibolu.—2 Akorinto 1:3.