•  Kumbi kukopana kung’anamuwanji?

•  Ntchifukwa wuli ŵanthu anyaki akopana?

•  Kumbi kukopana nkhwakofya wuli?

•  Vo achinyamata anyinu akamba

 Ŵanthu anyaki awona kuti kukopana kung’anamuwa kuti wamunthu ulongo mu vakukamba ndipuso mu vakuchita kuti ukhumba munthukazi pamwenga munthulumi. Kumbi mbuheni kulongo kuti munthu munyaki utimukhumba? Awa. Msungwana munyaki wavyaka 25 zina laki Ann wangukamba kuti, “Asani ukhumba kuja pa chibwezi ndipu ukhumbira munthu munyaki, kumbi ungaziŵa wuli kuti mosi mukhumbana?”

 Mu nkhani iyi, tikonkhoskengi kukopana kwa mtundu uwu cha. Tikonkhoskengi kukopana ko munthu wachita nge kuti watimukhumba munthukazi pamwenga munthulumi kweni we siriyasi cha.

 “Kuŵanaŵaniya ukongwa munthu munyaki chifukwa chakuti ukhumba kuja nayu pa chibwezi nkhwamampha. Kweni kuchita vinthu nge kuti utimukhumba pavuli paki mbwenu utimuleka chifukwa chakuti wenga siriyasi cha, ndi nkhani yinyaki yakupambana.”​—Deanna.

 Ŵanthu anyaki akopana chifukwa akhumba waka kujiwonesa. Msungwana munyaki zina laki Hailey wangukamba kuti, “Asani uwona kuti ungatchuka viyo, usazgiyaku kuti utchuki ukongwa.”

 Kweni asani mwadala ulongo munthu munyaki kuti utimukhumba penipo useŵe waka, ulongo kuti anyaku utiŵaŵanaŵaniya cha. Uchitisa so kuti anyaku akufumbengi mafumbu chifukwa cha vo uchita. Bayibolu likamba kuti: “Kupusa kukondweska mweniyo walivi maŵanaŵanu.”​—Nthanthi 15:21.

 Hailey walutirizga kukamba kuti, “Kukopana kungawoneka nge kuti kulivi suzgu lelosi, kweni pakumaliya paki vija vakusuzga.”

•   Kukopana kungachitisa kuti mbiri yinu yinangiki.

   “Munthu yo wakopa anyaki watijiwona ngekuti ngwambula kuvikilirika kweniso kuti wangafiska cha kuchita vinthu pakuyija.Utijivwa ngekuti wenawi siriyasi kweni wenawi siriyasi cha, wakhumba ŵaka kuti wachezengi ŵaka nawi.”​—Jeremy.

   Bayibolu likamba kuti: “Chanju . . . chikhumba vakuchija cha.”​—1 Akorinto 13:4, 5.

   Ŵanaŵaniyani ivi: kumbi ndi mazu nanga kweniso vakuchita vo vingapangiska kuti ŵanthu akuwoneningi kuti mwe ndi mbiri yakukopa ŵaka anyinu?

•   Kukopana kungachitisa kuti munyinu waguŵi.

   “Asani ndakumana ndi munthu yo wakopa anyaki, nditijivwa ngekuti ndingajanga nayu pafupi cha. Ndiwona ngekuti iyu waŵereŵeta ndi ini chifukwa chakuti nde munthukazi. Ŵanthu wo akopa anyawu atindiŵanaŵaniya cha. Yiwu aŵanaŵaniya ŵaka vakukhumba vawu pe..”​—Jaqueline.

   Bayibolu likamba kuti: “Munthu weyosi wangapenjanga vakukhumba vaku iyu yija cha, kweni walutirizgi kupenja vakukhumba va munyaki.”​—1 Akorinto 10:24.

   Ŵanaŵaniyani ivi: Kumbi mukuvwapu kuti munthu munyaki yo mwamugomezganga watikuyanjani kweni pavuli paki munguwona kuti vo wachita vilongo kuti watikuyanjani cha? Asani ndi viyo, kumbi munguvwa wuli? Kumbi mungachita wuli kuti muleki kuguŵiska munthu munyaki munthowa yeniyi?

•   Kukopana kungakuchitiskani kuti kunthazi muzisuzgiki kusaniya munthulumi pamwenga munthukazi wakuti muzije nayu pa chibwezi.

   “Munthu yo wakopa anyaki vinthu vingamuyende umampha cha ndipuso wangaja cha ndi banja lamampha pamwenga chibwezi chamampha. Kumbi ndingamuziŵa wuli pamwenga kumugomezga munthu yo wachita vinthu mwakukopa anyaki?”​—Olivia.

   Davidi yo wakulembaku buku la Sumu wangukamba kuti: “ndija cha pamoza ndi ŵanthu wo abisa umunthu wawu.”​—Sumu 26:4.

   Ŵanaŵaniyani ivi: Kumbi munthu yo wakopa anyaki ndi munthu wamtundu wuli? Kumbi imwi mungayanja kuja pa ubwezi ndi munthu waviyo?