Bayibolu likamba kuti “Yehova waŵanolengi cha chinthu chechosi chamampha ŵanthu wo atenda mwakugomezgeka.” (Salimo 84:11) Kumbi “kwenda mwakugomezgeka” kung’anamuwanji? Kung’anamuwa kuchita vinthu vo vilongo kuti mulutirizga kuchita vo mungulayizga Yehova pa nyengu yo mungujipereka kwaku Iyu kuti mumuteŵetiyengi. (Wakutawula 5:4,5) Kumbi mungachita wuli kuti mulutirizgi kwenda mwakugomezgeka pavuli pakuti mwabatizika?

Mu nkhani iyi mwe fundu izi

•  Lutirizgani kukunthiyapu masuzgu

•  Lutirizgani kukana mayeseru

•  Yesesani kusazgiyaku phamphu linu

 Lemba lo lingakuwovyani: “Titenere kukumana ndi masuzgu nganandi kuti tikasere mu Ufumu waku Chiuta.”—Machitidu 14:22.

 Vo lemba ili ling’anamuwa: Kukamba uneneska, Akhristu wosi akumanengi ndi masuzgu pa umoyu wawu. Mukumanengi ndi masuzgu nganyaki nge kususkika chifukwa chakuja Mkhristu. Kusazgiyapu pa masuzgu ngenanga, pe so masuzgu nganyaki nge kusoŵa ndalama kweniso kutama ndipu venivi vikwaska ŵanthu wosi pacharu chapasi.

 Vo mukhumbika kuziŵa: Nyengu zinyaki, vinthu vingasintha pa umoyu winu ndipu venivi vingachitika munthowa yo mwaŵanaŵananga cha. Bayibolu likamba kuti vinthu viheni vingachitikiya munthu weyosi, kaya ndi Mkhristu pamwenga cha.—Wakutawula 9:11.

 Vo mukhumbika kuchita: Chifukwa chakuti muziŵa kali kuti nyengu yeyosi mungakumana ndi masuzgu, mukhumbika kunozgeke limu vo mungazichita pa nyengu yo. Mukhumbika kuwona masuzgu ngenanga nge mwaŵi wakukholese chivwanu chinu ndi kumugomezga ukongwa Yehova. (Yakobe 1:2, 3) Nyengu zinyaki, mungavwa nge mo wakutumika Paulo wanguvwiya, iyu wangukamba kuti: “Mu vinthu vosi ndija ndi nthazi kuporote mwaku yo watindipaska nthazi.”—Afilipi 4:13.

 Vo mungachita: Sambirani vakukwaskana ndi Yosefi. Mungaŵerenga nkhani ya mbiri ya umoyu waki mubuku la Genezesi chaputala 37 ndi 39 mpaka 41. Ŵanaŵaniyani mafumbu yanga: Kumbi ndi masuzgu ngamabuchibuchi nanga ngo wangukumana nangu, nanga wangumalana nangu wuli? Kumbi Yehova wangumuwovya wuli Yosefi?

 Kumbi mukhumba kuziŵa vinandi?

•   Werengani nkhani izi:

   “Kodi N’chiyani Chingandithandize Ndikakumana ndi Mavuto?”

   “Kumbi Nde Wakukunthiyapu?”

   “Zimene Mungachite Zinthu Zikasintha”

•   Chitani dawunilodi:

   “Ngati Bambo Kapena Mayi Anu Akudwala”

 Lemba lo linganguwovyani: “Kweni munthu weyosi wateseka asani wakopeka ndipuso wanyengeka ndi khumbiru la mweneku.”—Yakobe 1:14.

 Vo lemba ili ling’anamuwa: Nyengu zinyaki, tosi tiyeseka ndi makhumbiru ngaheni ngo ngangachitiska kuti tichiti vinthu viheni ukongwa asani tingaleka kuchitapu kanthu mwaliŵi.

 Vo mukhumbika kuziŵa: Asani mwabatizika, mukumanengi mbwenu ndi mayeseru nga “makhumbiru nga liŵavu.” (2 Peturo 2:18) Ndipu venivi vingakuchitiskani kuti muchiti ureŵi mwechendato pamwenga kuyirwa.

 Vo mukhumbika kuchita: Mukhumbika kunozgekereske limu maŵanaŵanu mwechendakumani ndi mayeseru ngo ngangakupangisani kuti musankhi uheni vakuchita chifukwa cha makhumbiru ngaheni. Kumbukani vo Yesu wangukamba: “Palivi munthu yo wangateŵete mabwana ngaŵi.” (Mateyu 6:24) Mungasankha yo mukhumba kumuteŵete, kweni mungachita umampha ukongwa asani mungasankha kuteŵete Yehova. Kwali makhumbiru ngaheni ngo ngangaŵa nganthazi wuli, mungazomerezanga cha kuti ngakuthereskeni.—Agalatiya 5:16.

 Vo mungachita: Ziŵani vo mungafiska kuchita kweniso vo mutondeka. Mukhumbika kusankha mabwezi ngo ngangakuwovyani kuti muje ndi mijalidu yamampha. Muyesesengi kuleka kwanjana ndi ŵanthu aheni, kuleka kusanirika kumalu ko kuchitika vinthu vo vingakupangisani kuti muchiti vinthu viheni.—Salimo 26:4, 5.

 Kumbi mukhumba kuziŵa vinandi?

•   Ŵerengani nkhani izi:

   “Kodi Ndingatani Kuti Ndisamagonje Poyesedwa?”

   “Ndingatani Kuti Ndisamangoganizira Zogonana?”

   “Kodi Mungatani Kuti Musamangotengera Zochita za Anzanu?”

   “Kumbi Muŵanaŵana nge Yehova?”

 Lemba lo lingakuwovyani: ‘Longoni phamphu lo mwenga nalu pakwamba . . . mpaka pakumaliya, ndi chilatu chakuti muleki kuŵa alesi.’—Aheberi 6:11, 12.

 Vo lemba ili ling’anamuwa: Munthu weyosi yo waleka kulimbikiya kugwira ntchitu waswera cha kuchita mphwayi ndipu pavuli paki wachita ulesi.

 Vo mukhumbika kuziŵa: Mutenere kuti panyaki mungukondwa ukongwa mwati mwabatizika waka kweniso mwenga ndi phamphu pakuteŵete Yehova ndipu mungwamba so kumuyanja ukongwa. Kweni asani pajumpha nyengu, mungayamba kuwona kuti kulutirizga kuvwiya Yehova pachechosi nkhwakusuzga ndipu venivi vingakuweziyani vuli kweniso phamphu linu pakuteŵete Yehova lingamala.—Agalatiya 5:7.

 Vo mukhumbika kuchita: Lutirizgani kuchita vinthu vamampha chinanga kuti nyengu zinyaki mungaŵavi khumbu lakuti muchitiyi viyo. (1 Akorinto 9:27) Pa nyengu iyi, mukhumbika mbwenu kundere kufupi ndi Awusemwi akuchanya, mwakuyesesa kuŵaziŵa umampha kweniso kukambiskana nawu mu pempheru. Mukhumbika so kulutirizga kwanjana ndi ŵanthu wo atanja kuteŵete Yehova.

 Vo mungachita: Nyengu zosi mukumbukengi kuti Yehova watikuyanjani ukongwa ndipu ngwakunozgeka kukuwovyani asani mwakumana ndi masuzgu. Mungaŵanaŵananga cha kuti Iyu wakwiya asani nyengu yinyaki mwawere vuli kamanavi mwauzimu. Bayibolu likamba kuti: “Iyu wapereka nthazi ku munthu yo wavuka ndipuso nthazi zikulu ku ŵanthu wo alivi nthazi.” (Yesaya 40:29) Iyu wakutumbikeningi asani muyesesa kuja so ndi phamphu lakumuteŵete.

 Kumbi mukhumba kuziŵa vinandi?

•   Ŵerengani nkhani izi:

   Achinyamata—“Lutirizgani Kugwiriya Ntchitu Utaski Winu”

   “Kodi Ndingatani Kuti Kulambira Mulungu Kuzindisangalatsa?”

•   Woneriyani vidiyo yakuti:

   Vo Achinyamata Anyinu Akamba—Umoyu Wakukondwesa Ukongwa

 Vo mungayanduwa pakumaliya: Asani mulutirizga kuja akugomezgeka, mumukondwesengi ukongwa Yehova! (Nthanthi 27:11) Iyu wakondwengi ukongwa kuti mukusankha kuja kuchigaŵa chaki, ndipu iyu wakuwovyeningi kuti mukanengi mayeseru ngaku Satana.