Kumbi Mariya Mbanyina aku Chiuta?

JULANI

Vo Bayibolu Likamba

Awa. Bayibolu likambapu cha kuti Mariya a mbanyina aku Chiuta. Ilu likambapu so cha kuti Akhristu akhumbika kumusopa pamwenga kumutumbika ukongwa. Ŵanaŵaniyani ivi:

Mariya wakukambapu cha kuti ndiyu wakubala Chiuta. Bayibolu likamba kuti iyu wangubala Chiuta cha kweni wangubala “Mwana waku Chiuta.”—Mariko 1:1; Luka 1:32.
Yesu Khristu wangukambapu cha kuti Mariya wenga nyina waku Chiuta. Iyu wangukambapu so cha kuti Mariya wakhumbika kupaskika ulemu wapade. Nyengu yinyaki, munthukazi munyaki wangukamba kuti ngwakutumbikika Mariya chifukwa ndiyu wakubala Yesu. Kweni Yesu wangumukambiya kuti: “Ndi viyo cha, kweni mbakutumbikika wo atuvwa mazu ngaku Chiuta ndi kungasunga!”—Luka 11:27, 28.
Mazu ngakuti “Anyina aku Chiuta ” ndipuso ngakuti “wakubala Chiuta” (“Theotokos”) ngasanirika cha mu Bayibolu.
Mu Bayibolu, mazu ngakuti “Fumukazi Yakuchanya” ngakamba zaku Mariya cha kweni ngakamba za chiuta munthukazi yo Ayisirayeli wo anguleka kuteŵete Yehova asopanga. (Yeremiya 44:15-19) Panyaki “Fumukazi Yakuchanya” wenga chiuta munthukazi waku Babiloni yo waziŵikanga ndi zina lakuti Ishitara pamwenga kuti Asitaroti.
Akhristu akwambiriya asopanga Mariya cha pamwenga kumupaska ulemu wapade. Pakukamba za Akhristu ŵenaŵa, wakulemba mbiri munyaki wangukamba kuti yiwu “atenere kuti akananga kusopa Mariya ndipu amupaskanga ulemu wapade cha chifukwa kuchita viyo kwatingi kuchitiskengi ŵanthu anyaki kuŵanaŵana kuti yiwu asopa chiuta munthukazi.”—In Quest of the Jewish Mary.
Bayibolu likamba kuti Chiuta wengaku kwamba kali. (Sumu 90:1, 2; Yesaya 40:28) Chifukwa chakuti iyu walivi chiyambi, vingachitika cha kuti waje ndi anyina. Kweniso Bayibolu likamba kuti kuchanya nkhwakukwana cha kuti Chiuta wajeku. So kumbi vatingi vichitikengi wuli kuti Chiuta waje mumoyu mwaku Mariya?—1 Ŵakaronga 8:27.

Mariya ‘Mbanyina aku Chiuta’ Cha Kweni Mbanyina aku Yesu

Mariya wenga Myuda ndipu wanguwiya mu fuku la Fumu Davidi. (Luka 3:23-31) Chiuta wangumuyanja ukongwa chifukwa cha kujipereka ndipuso chivwanu chaki. (Luka 1:28) Iyu wangumusankha kuti waje nyina waku Yesu. (Luka 1:31, 35) Kweni mukuluta kwa nyengu, Mariya ndi Yosefi angubala so ŵana anyaki.—Mariko 6:3.

Chinanga kuti Bayibolu lilongo kuti Mariya wanguzija wakusambira waku Yesu, kweni likamba vinandi cha vakukwaskana ndi iyu.—Machitidu 1:14.

Ntchifukwa wuli ŵanthu anyaki akamba kuti Mariya mbanyina aku Chiuta?

Maukaboni ngalongo kuti ŵanthu angwamba kusopa Mariya chakukumaliya kwa vyaka va mu ma 300 C.E. Pa nyengu iyi, tchalitchi la Katolika chenga chisopa chikulu ukongwa mu ulamuliru wa Aroma. Pa chifukwa chenichi, ŵanthu anandi wo asopanga achiuta angoza anguja Akhristu. Tchalitchi lenili lingwamba so kusambiza kuti kwe achiuta atatu, chisambizu cho mu Bayibolu mulivi.

Chisambizu chakuti kwe achiuta atatu chinguchitiska ŵanthu anandi kugomezga kuti asani Yesu ndi Chiuta ndikuti Mariya watenere so kuja nyina waku Chiuta. Mu 431 C.E., ŵaraŵara atchalitchi ku Efeso angupharazga kuti Mariya ndi “Nyina waku Chiuta.” Kutuliya zuŵa lo angupharazgiya venivi, ŵanthu anandi angwamba kutumbika Mariya mwakujumpha mwesu. Ndipu chifukwa chakuti ŵanthu anandi wo asopanga achiuta aboza angusere tchalitchi la Katolika, vithuzi vo valongonga Mariya venga peposi ndipu kamana ndi kamana vingusere mumalu mwa achiuta ŵawu anthukazi nge Atemi (yo Aroma amudananga kuti Diana) ndi Isis.

Mu 432 C.E., Papa Sixtus wanambala III wangulamula kuti ŵanthu azengi tchalitchi mutawuni ya Roma pakukhumba kutumbika “Nyina waku Chiuta.” Tchalitchi ili linguzengeka pafupi ndi malu ngo anguzengapu nyumba yakusopiyamu pakukhumba kupereka ulemu kwaku Lucina yo wenga chiuta munthukazi wa ku Roma yo amuwonanga kuti watiŵawovya pakubala. Wakulemba buku munyaki wangukamba kuti “tchalitchi la Katolika ndimoza mwa matchalitchi ngo ngakutole ukongwa vigomezgu va ŵanthu akucharu. Ndipu nkhani ya kupereka ulemu kwaku Mariya Chikhristu chati chayamba ŵaka ku Roma ndiyu yilongo kuti ivi vauneneska.”—Mary—The Complete Resource.

a Matchalitchi nganandi ngasambiza kuti Mariya mbanyina aku Chiuta. Ndipu ngakamba so kuti iyu ndi “Fumukazi Yakuchanya” pamwenga kuti Theotokos , mazu ngachigiriki ngo ngang’anamuwa “munthu yo wakubala Chiuta.”