Bayibolu likamba kuti Chiuta wakhumba kuti ŵanthu angachitanga cha “malusu ngaheni ngakugonana.” (1 Atesalonika 4:3) Mu Bayibolu, mazu ngakuti “malusu ngaheni ngakugonana” ngasazgapu chigololu, kugonana kwa anthulumi pamwenga anthukazi ŵijaŵija, kweniso kugonana kwa munthulumi ndi munthukazi wo ŵechendatolani.

• Ntchifukwa wuli kujaliya limoza ŵanthu ŵechendatolani ndi nkhani yikulu kwaku Chiuta?

• Kumbi kujaliya limoza ŵanthu ŵechendatolani ndiku kungawovya kuti vinthu viziyendengi umampha munthengwa?

• Kumbi ŵanthu akutolana angachita wuli kuti nthengwa yawu yije yakukho?

•   Chiuta ndiyu wakwambisa nthengwa. Iyu wangwambiska nthengwa wati walenga munthulumi ndi munthukazi wakwamba. (Chiyambo 2:22-24) Iyu wakhumbanga cha kuti munthulumi ndi munthukazi ajaliyengi limoza kwambula kutolana.

•   Chiuta waziŵa vo ŵanthu akhumbikiya. Iyu wachiyambisa nthengwa, wakhumbanga kuti yingamalanga cha. Venivi vitovya ndi kuvikiliya ŵanthu wosi mubanja. Ŵanaŵaniyani chakuyeruzgiyapu ichi. Asani mwagula chinthu chakukhumba kulumikiza, mulondo ulongozgi wa munthu yo wakupanga chinthu cho kuti mukachilumikizi umampha. Mwakuyanana waka, ulongozgi wo Chiuta watitipaska ndiwu utovya kuti vinthu viyendengi umampha mubanja. Ŵanthu wo alondo marangu ngaku Chiuta ayanduwa nyengu zosi.—Yesaya 48:17, 18.

•   Kugonana ndi munthu yo mukutolana nayu cha kungachitiska masuzgu nganandi. Mwakuyeruzgiyapu, munthu wangato matenda ngakupasirana, nthumbu zapadondu kweniso wangasuzgika ukongwa maŵanaŵanu. a

•   Chiuta wakupaska ŵanthu mwaŵi wakuti abalengi ŵana asani agonana. Chiuta wawona kuti umoyu ngwakupaturika, ndipu mwaŵi wakubala ŵana ndi mphasu yakuzirwa ukongwa. Mwaviyo, Chiuta wakhumba kuti titumbikengi mphasu iyi mwakulondo marangu nga nthengwa ngo iyu wakupereka.—Aheberi 13:4.

 Kuti ŵanthu aje ndi banja lalikondwa vithemba kuti ajaliyi dankha limoza cha kwakanyengu wechendatolani. Mumalu mwaki, vinthu vitenda umampha mubanja asani munthulumi ndi munthukazi achita vinthu mwakugomezgeka kweniso asani atesesa kumalana ndi masuzgu ngo akumana nangu. b Mwaviyo, kugomezgeka kuchitiska kuti nthengwa yije yakukho.—Mateyu 19:6.

 Palivi nthengwa yo yileka kukumana ndi masuzgu. Kweni ŵanthu akutolana angaja ndi banja lalikondwa asani agwiriskiya ntchitu fundu za mu Bayibolu. Fundu zinyaki za mu Bayibolu zo ŵanthu akutolana angagwiriskiya ntchitu ndi izi:

•   Muŵikengi panthazi vakukhumba va munthu yo mukutolana nayu.—1 Akorinto 7:3-5; Afilipi 2:3, 4.

•   Muyanjanengi kweniso mutumbikanengi.—Aefeso 5:25, 33.

•   Mulongorongi mwazeru.—Nthanthi 12:18.

•   Muzikirengi kweniso mugowokengi mwaliŵi.—Akolose 3:13, 14.