Kumbi Utaski Ntchinthu Wuli?
Vo Bayibolu Limuka
Mazu ngakuti “kutaska” ndipuso “utaski” ngo akulemba Bayibolu agwiriskiya ntchitu nyengu zinyaki, ngakamba va munthu yo wataskika ku vinthu vakofya pamwenga ku ngozi. (Ekisodo 14:13, 14; Machitidu 27:20) Kweni kanandi mazu yanga ngakamba za kutaskika ku ubudi. (Mateyu 1:21) Chinanga kuti nyifwa yichitika chifukwa cha ubudi kweni ŵanthu wo ataskika alindizga kuzija ndi umoyu wamuyaya.—Yohane 3:16, 17. a
Kumbi mukhumbika kuchitanji kuti mutaskiki?
Kuti mutaskiki mukhumbika kugomezga sembi yaku Yesu kweniso kulongo chivwanu mwakuvwiya marangu ngaki.—Machitidu 4:10, 12; Aroma 10:9, 10; Aheberi 5:9.
Bayibolu lilongo kuti mukhumbika kuchita vinthu vinyaki pamwenga kuvwiya kuti mulongo kuti mwe ndi chivwanu. (Yakobe 2:24, 26) Chinanga kuti veviyo, ivi ving’anamuwa kuti mungataskika chifukwa cha ntchitu pe cha. Kweni mutaskika chifukwa cha “mphasu yaku Chiuta” yo ndi “wezi ukulu” pamwenga “lisungu.”—Aefeso 2:8, 9; King James Version.
Kumbi vingachitika kuti muzileki kutaskika?
Hinya. Mwakuyeruzgiyapu, munthu yo wangubira mumaji ndipu wataskika wangabira so mumaji asani wangaleka kuphwere ndi vakuchita vaki. Mwakuyanana waka, munthu yo wataskika ku ubudi wangazitondeka kutaskika asani waleka kuchita vinthu vakulongo chivwanu. Mwaviyo, Bayibolu lichiska Akhristu wosi wo akutaskika ‘kuti ayesesi kufwiyapu kuti avikiliyi chivwanu.’ (Yuda 3) Bayibolu litcheŵesa so ŵanthu wo akutaskika kuti: “Lutirizgani kugwiriya ntchitu utaski winu, mwamantha kweniso mwakumbwambwanthiya.”—Afilipi 2:12.
Kumbi Mtaski widu ndi Chiuta pamwenga Yesu?
Bayibolu likamba kuti Chiuta ndiyu wataska ŵanthu ndipu iyu ndi “Mtaski.” (1 Samuyeli 10:19; Yesaya 43:11; Tito 2:10; Yuda 25) Kusazgiyapu yapa Chiuta wangugwiriskiya ntchitu ŵanthu akupambanapambana kuti ataski mtundu wa Ayisirayeli ndipu Bayibolu litiŵadana kuti “ataski.” (Nehemiya 9:27; Ŵeruzgi 3:9, 15; 2 Mafumu 13:5) b Mwakuyanana waka, Chiuta wakupereka utaski kuziya mu sembi yaku Yesu Khristu ndipu Bayibolu likamba kuti Yesu ndi “Mtaski.”—Machitidu 5:31; Tito 1:4. c
Kumbi weyosi wazamutaskika?
Awa, ŵanthu anyaki azamutaskika cha. (2 Atesalonika 1:9) Munthu munyaki wangumufumba Yesu kuti: “Ambuya, kumbi ŵanthu akutaskika mbamanavi?” Yesu wangumuka kuti: “Yesesani kusere pakhomu lifinyi, chifukwa nditikukambiyani kuti ŵanthu anandi azamukhumba kuserepu kweni azamutondeka.”—Luka 13:23, 24.
Fundu za boza zakukwaskana ndi utaski
Fundu yaboza: Lemba la 1 Akorinto 15:22 likamba kuti “mwaku Khristu ŵanthu wosi azamuja amoyu.”
Fundu yauneneska: Fundu yapa vesi ili yikonkhoska za chiyuka. (1 Akorinto 15:12, 13, 20, 21, 35) Mwaviyo, fundu yakuti “mwaku Khristu ŵanthu wosi azamuja amoyu,” ying’anamuwa kuti wosi wo azamuyuskika azamulonde vitumbiku kuziya mwaku Yesu.—Yohane 11:25
Fundu yaboza: Lemba la Tito 2:11 likamba kuti Chiuta “wawovya kuti ŵanthu amitundu yosi ataskiki.”—International Standard Version.
Fundu yauneneska: Mazu nga Chigiriki ngakuti “yosi” nga pa vesi ili ngangang’anamuwa so kuti “ŵanthu amitundu yosi.” d Uneneska wa lemba la Tito 2:11 ngwakuti Chiuta wataska ŵanthu amitundu yosi, kusazgiyapu “ŵanthu wo atuliya mu mitundu yosi, mu mafuku ngosi, mu ŵanthu wosi ndipuso mu malilimi ngosi.”—Chivumbuzi 7:9, 10.
Fundu yaboza: Lemba la 2 Peturo 3:9 likamba kuti Chiuta “wakhumba cha kuti weyosi wanangiki.”
Fundu yauneneska: Chiuta wakhumba kuti ŵanthu azitaskiki, kweni iyu watiŵachichizga cha kuti alondongi marangu ngaki. Ndipu ‘zuŵa laki la cheruzgu’ lisazgiyapu “kunangika kwa ŵanthu ambula kopa Chiuta.”—2 Peturo 3:7.
a Chinanga kuti Bayibolu likamba kuti ŵanthu akutaskika ku ubudi ndi nyifwa kweni utaski weneku we pafupi.—Aefeso 2:5; Aroma 13:11.
b Mu Mavesi nganyaki, akufwatuliya akugwiriskiya ntchitu mazu ngakuti “kaswiri,” “wakutaska,” “mulongozgi” pamwenga kuti “munthu munyaki” mumalu mwakugwiriskiya ntchitu mazu ngakuti “mtaski.” Kweni pa nyengu yo Bayibolu la Chiheberi lalembekiyanga kakwamba, mazu ngo angungagwiriskiya ntchitu pakukamba za ku wo ataska ŵanthu, ngayanana ŵaka ndi mazu ngo angungagwiriskiya ntchitu mu Bayibolu pakukamba zaku Yehova Chiuta kuti ndi Mtaski.—Masalimo 7:10
c Zina lakuti Yesu likutuliya ku mazu nga Chiheberi ngakuti Yehoh·shuʹaʽ ngo ngang’anamuwa kuti “Yehova Ndi Mtaski.”
d Wonani buku lakuti, Vine’s Complete Expository Dictionary of Old and New Testament Words. Mazu ngenanga nga Chigiriki ngasanirika pa lemba la Mateyu 5:11. Pa lemba ili, Yesu wangukamba kuti ŵanthu azamukambanga “vinthu viheni vinandi” vakukwasana ndi akusambira ŵaki.—International Standard Version.
Mungayanja Kuŵerenga so Nkhani Izi
MAFUMBU NGO BAYIBOLU LIMUKA
Kumbi Sembi Yaku Yesu Yiwombo Wuli “Ŵanthu Anandi”?
Kumbi sembi yitovya wuli kuti ŵanthu afwatuliki ku ubudi?
MAFUMBU NGO BAYIBOLU LIMUKA
Kumbi Bayibolu Lisambiza Kuti ‘Asani Munthu Wataskika Kamoza Mbwenu Kwamala’?
Yesu wangukonkhoska ntharika yo yimuka fumbu lenili.
MAFUMBU NGO BAYIBOLU LIMUKA
Kumbi Kugomezga Yesu Nkhwakukwana Kuti Munthu Wazitaskiki?
Bayibolu likonkhoska za ŵanthu anyaki wo agomezga Yesu kweni azamutaskika cha. Kumbi venivi vingachitika wuli?
ESSENTIAL BIBLE TEACHINGS
Kumbi Ntchifukwa Wuli Yesu Wangufwa?
Bayibolu lilongo kuti nyifwa yaku Yesu njakukhumbika ukongwa. Kumbi ŵanthu apinduwa wuli ndi nyifwa yaki?
KUKONKHOSKA MAVESI NGA MU BAYIBOLU
Kukonkhoska Lemba la Aroma 10:13—“Kudaniya pa Zina la Ambuya”
Chiuta wapereka mwaŵi ku munthu weyosi kuti wazitaskiki ndi kusaniya umoyu wamuyaya kwali watuliya ku charu wuli, ngwa mtundu wuli, mukavu pamwenga wakukhupuka.
VO BAYIBOLU LISAMBIZA
Yesesani Kusambira Bayibolu
Sambirani Bayibolu kwawezi ndi munthu yo wakusambizeningi.