Mabwezi ngangakuwovyani kuja ndi umoyu walikondwa ndipuso wamampha. Mabwezi ngamampha ngachiskana kuchita vinthu vamampha kweniso ngangatiwovya kuja ŵanthu amampha.—Nthanthi 27:17

 Kweni, Bayibolu lititikambiya kuti mbumampha kusankha mabwezi mwakuphwere. Litititcheŵeska vakukwaskana ndi vinthu viheni vo tingakumana navu asani tasankha uheni mabwezi. (Nthanthi 13:20; 1 Akorinto 15:33) Mabwezi ngaviyo ngangachitiska munthu kusankha uheni vinthu pamwenga kunanga mijalidu yaki yamampha.

Munkhani iyi tikambiskanengi mafumbu yanga:

•  Ntchinthu wuli cho chichitiska munthu kuja bwezi lamampha?

•  Kumbi ndi vakuyeruzgiyapu nivi va mabwezi ngamampha ngo ngazumbulika mu Bayibolu?

•  Kumbi munthu wangaja paubwezi ndi Chiuta?

•  Vo Bayibolu likamba pankhani yakukwaskana ndi mabwezi

 Bayibolu lisambiza kuti mabwezi ngamampha ngakhumbika kuŵanaŵaniya vinthu vakukhumbika mumalu mwa vakukhumba vinthu vo ayanana pamwenga vakusangaluska. Mwakuyeruzgiyapu, lemba la Salimo 119:63 likamba kuti: “Nde mubwezi wa ŵanthu wosi wo atikuwopani a kweniso wa ŵanthu wo asunga marangu nginu.” Wonani kuti wakulemba Bayibolu wangukamba kuti wasankha mabwezi ngo ngakhumba kukondwesa Chiuta ndipuso kulondo fundu zaki.

 Bayibolu likamba so mijalidu yo mubwezi wamampha wakhumbika kuja nayu. Mwakuyeruzgiyapu:

•   “Bwezi chayilu litanja nyengu zosi ndipu ilu ndi mubali yo wakubalika kuti wakuwovyi pa nyengu ya suzgu.”​—Nthanthi 17:17.

•   “Pe mabwezi ngo ngakunozgeka kupwetekana, kweni pe bwezi lo limatiriya kuluska mubali waku.”​—Nthanthi 18:24.

 Mavesi ngenanga ngasambiza kuti mabwezi ngamampha ngaja ngakugomezgeka, ngachanju, ngalisungu ndipuso ngakupaska. Bwezi chayilu ndi munthu yo tingamuthemba kuti watiwovyi asani takumana ndi masuzgu. Bwezi chayilu lija so ndi chiganga pakutikambiya asani tichita vinthu mwambula zeru pamwenga tisankha uheni vinthu.​—Nthanthi 27:6, 9.

 Mu Bayibolu mwe vakuyeruzgiyapu va mabwezi ngamampha nga ŵanthu a vyaka vakupambana, akutuliya kwakupambana, midawuku yakupambana ndipuso a maudindu ngakupambana. Tiyeni tikambiskani mabwezi ngatatu yanga:

•   Ruti ndi Naomi. Ruti wenga mkumwana waku Naomi ndipu Naomi wenga mura ukongwa kuphara Ruti. Kusazgiyapu yapa, Ruti wapambananga midawuku ndi Naomi. Chinanga kuti ŵenga akupambana kweni anguja mabwezi nga pamtima.—Ruti 1:16.

•   Davidi ndi Yonatani. Chinanga kuti Yonatani wapambananga vyaka 30 ndi Davidi, kweni Bayibolu likamba kuti yiwu “ayanjananga ukongwa.”—1 Samuyeli 18:1.

•   Yesu ndi akutumika ŵaki. Yesu wenga ndi udindu wakuŵalamuliya, chifukwa wenga msambizi ndipuso mlongozi wawu. (Yohane 13:13) Kweni venivi vamutondekesanga cha Yesu kuwona kuti akutumika ŵenga mabwezi ngaki. Mumalu mwaki, Yesu wakoliyananga ukongwa ndi wo achitanga vo iyu wasambizanga. Iyu wangukamba kuti: “Ndakudanani kuti abwezi ŵangu, chifukwa ndakukambiyani vinthu vosi vo ndikuvwa kwa Ada.”—Yohane 15:14, 15.

 Hinya, ŵanthu angaja mabwezi ngaku Chiuta. Bayibolu likamba kuti: “Waja pa ubwezi wakukho ndi munthu wakunyoloka.” (Nthanthi 3:32) Mumazu nganyaki tingakamba kuti Chiuta wasankha mabwezi ngo nge ndi nkharu yamampha, ngachita vinthu mwauneneska, ngaulemu ndipuso ngatesesa kuchita vinthu mwakukoliyana ndi fundu zaki pankhani ya chamampha ndi chiheni. Mwakuyeruzgiyapu, Abulahamu yo wenga munthu wakugomezgeka, Malemba ngatimukamba kuti wenga bwezi laku Chiuta.​—2 Mbiri 20:7; Yesaya 41:8; Yakobe 2:23.