Mikayeli, yo visopa vinyaki vikamba kuti “Senti Mikayeli,” ndi zina lo Yesu wangupaskika wechendazi kweniso wati waza pacharu chapasi. a Nyengu yinyaki, Mikayeli wangupindana ndi Satana pa nkhani yakukwaskana ndi thupi laku Mozesi ndipu wanguwovya mungelu kuti wakapereki uthenga kwa mchimi Daniyeli. (Daniyeli 10:13, 21; Yuda 9) Mikayeli wachita vinthu mwakukoliyana ndi zina laki lo ling’anamuwa kuti “Ndiyani yo Wayanana ndi Chiuta?” Iyu wachita venivi pakuvikiliya ulamuliru waku Chiuta kweniso kulimbana ndi arwani ŵaki.—Daniyeli 12:1; Chivumbuzi 12:7.

 Tiyeni tiwoni vifukwa vo tikambiya kuti Yesu ndi Mikayeli, Mura wa Angelu.

•   Mikayeli ndi “mura wa angelu.” (Yuda 9) Mazu ngakuti “mura wa angelu,” ngo ngang’anamuwa “mulongozgi wa angelu,” ngasanirika waka mu mavesi ngaŵi pe mu Bayibolu. Vo mazu yanga ngang’anamuwa kweniso vo Bayibolu likamba, vilongo kuti pe mura wa angelu yumoza pe. Limoza mwa mavesi ngenanga likamba kuti Ambuya Yesu wo akuyuskika “azamusika kutuliya kuchanya ndi kudaniriza mwakulamula, mwakugwiriskiya ntchitu mazu nga mura wa angelu.” (1 Atesalonika 4:16) Yesu we ndi “mazu nga mura wa angelu” chifukwa iyu ndiyu Mikayeli, mura wa angelu.

•   Mikayeli walongozga gulu la nkhondu la angelu. “Mikayeli limoza ndi angelu ŵaki anguchita nkhondu ndi chinjoka,” cho ndi Satana. (Chivumbuzi 12:7) Mikayeli we ndi mazaza ngakulu pa vakulengeka vauzimu kuchanya chifukwa wadanika kuti “yumoza wa alongozgi ara” ndipuso “mulongozgi mura.” (Daniyeli 10:13, 21; 12:1) Mazina yanga ngalongo kuti Mikayeli ndi “mulongozgi mura wa gulu la nkhondu la angelu,” mwakukoliyana ndi vo kaswiri munyaki wa Bayibolu zina laki David E. Aune wangukamba.

   Bayibolu lizumbuwa waka zina limoza pe la mungelu yo we ndi mazaza pa gulu la angelu. Likamba kuti ‘Ambuya Yesu azamuvumbulika kutuliya kuchanya ndi angelu ŵawu anthazi, mu motu wakulipuka, achiweze.” (2 Atesalonika 1:7, 8; Mateyu 16:27) Yesu “wakuluta kuchanya, ndipu angelu, mazaza ndipuso nthazi vikuthereskeke kwaku iyu.” (1 Peturo 3:21, 22) Vatingi viŵengi vambula kuvwika kuti Chiuta wasankhi Yesu ndipuso Mikayeli kuja alongozgi ŵa angelu akupaturika. Mumalu mwaki mphakuvwika kukamba kuti zina lakuti Yesu ndipuso Mikayeli nda munthu yumoza.

•   Mikayeli “wazamukuma” pa “nyengu ya suzgu” yo yendachitikepu. (Daniyeli 12:1) Mu buku la Daniyeli, mazu ngakuti “wazamukuma” kanandi ngagwiriskikiya ntchitu pakukamba va fumu yo yituma kuti yichiti chinthu chinyaki chapade. (Daniyeli 11:2-4, 21) Yesu Khristu, yo wadanika kuti “Mazu ngaku Chiuta,” wazamuchita chinthu chapade nge “Fumu ya mafumu” pakuzituzgapu arwani wosi aku Chiuta ndi kuvikiliya ŵanthu aku Chiuta. (Chivumbuzi 19:11-16) Iyu wazamuchita venivi pa nyengu ya “chisuzgu chikulu cho chechendachitikepu kutuwa po charu chikulengeke.”—Mateyu 24:21, 42.