Awa, visopa vosi vakuyanana cha. Mu Bayibolu mwe vakuyeruzgiyapu vinandi va visopa vo valekanga kukondwesa Chiuta. Visopa venivi vilipu magulu ngaŵi.

Gulu lakwamba: Kusopa achiuta aboza

 Bayibolu likamba kuti kusopa achiuta aboza ndi vinthu ‘vambula ntchitu’ kweniso “vinthu vaŵakaŵaka.” (Yeremiya 10:3-5; 16:19, 20) Yehova a Chiuta wangulamula mtundu wa Ayisirayeli kuti: “Ungajanga ndi achiuta anyaki cha, kupatuwaku ini.” (Ekisodo 20:3, 23; 23:24) Pa nyengu yo Ayisirayeli asopanga achiuta anyaki aboza, ‘Yehova wanguŵakwiyiya.’—Numeri 25:3; Levitiko 20:2; Ŵeruzgi 2:13, 14.

 Chiuta wechendasinthi ndipu walutirizga kukwiyiya ŵanthu wo asopa “achiuta” aboza. (1 Akorinto 8:5, 6; Agalatiya 4:8) Iyu walamula ŵanthu wo akhumba kumusopa kuti akhumbika kutuwa muchisopa chaboza ndipu wakamba kuti: “Tuwanipu pakati pawu ndipu mujipatuwi.” (2 Akorinto 6:14-17) Vikaŵengi kuti visopa vosi vakuyanana ndipuso vilongozge ŵanthu kwaku Chiuta, ntchifukwa wuli Chiuta wangupereka dangu lenili?

Gulu lachiŵi: Kusopa Chiuta wauneneska munthowa yo waleka kuzomereza

 Nyengu zinyaki Ayisirayeli asopanga Chiuta mwakugwiriskiya ntchitu vigomezgu ndipuso midawuku ya ŵanthu wo asopanga achiuta aboza. Kweni Yehova watinkhanga kuti ŵanthu asazgengi kusopa kwa uneneska ndi kusopa kwa boza. (Ekisodo 32:8; Dotoronome 12:2-4) Yesu wanguchenya alongozgi avisopa a munyengu yaki chifukwa cha vo achitanga pakusopa Chiuta. Yiwu ajiwonesanga kuti asopa Chiuta kweni achitanga vinthu mwachinyengu chifukwa ‘alekiyanga dala vinthu vakukhumbika ukongwa va mu Dangu nge urunji, lisungu ndi kugomezgeka.’—Mateyu 23:23.

 Mazuŵa nganu napu, chisopa cho chisambiza uneneska pe ndichu chingawovya ŵanthu kuziŵa Chiuta. Ndipu uneneska wenuwu usanirika mu Bayibolu. (Yohane 4:24; 17:17; 2 Timote 3:16, 17) Visopa vo visambiza vinthu vakupambana ndi vo ve mu Bayibolu vingaŵawovya cha ŵanthu kuziŵa Chiuta. Visambizu vinandi vo ŵanthu aŵanaŵana kuti vituliya mu Bayibolu nge chakuti kwe achiuta atatu, mzimu wa munthu utufwa cha ndipuso ŵanthu aheni amutombozgeka ku motu, vosi venivi vikutuliya ku ŵanthu wo asopanga achiuta aboza. Visopa vo visambiza venivi vambula kovya chifukwa visambiza midawuku ya ŵanthu mumalu mwakusambiza vo Chiuta wakhumba.—Mariko 7:7, 8

 Chiuta watinkha kumusopa mwachinyengu. (Tito 1:16) Chisopa chauneneska chitenere kovya ŵanthu kuti aje paubwezi wamampha ndi Chiuta ndipu chingajanga ndi midawuku yinyaki cha pamwenga kuchitiska ŵanthu kuti asopengi mwamwambu waka. Mwakuyeruzgiyapu, Bayibolu likamba kuti: “Asani munthu munyaki waŵanaŵana kuti wasopa Chiuta kweni watiliko cha lilimi laki, wapusika mtima waki, ndipu kusopa kwaki nkhwaŵaka. Kusopa kwakutowa ndipuso kwambula kufipiskika pa masu paku Chiuta widu kweniso Awusefwi ndi uku: kuphwere ŵana alanda ndi vyoko mu masuzgu ngawu, kweniso kujisunga wambula donthu lakutuwa ku charu.” (Yakobe 1:26, 27) Bayibolu la King James Version, ligwiriskiya ntchitu mazu ngakuti “chisopa chambula kufipiskika” pakukamba kusopa kwa uneneska.