KuBafilipi 4:1-23
4 Nkinkaako, nibakombima mbindiyanda, alubo mbindilangilila kuzoobona, nimulikukondwa kwangu abulumbu bwangu,* amwiime nji munzila njiyeeyi muMwaami, nibayandwa.
2 Ndisungwaazya Yuwodiya aSintikke kuti babe aamuzeezo uumwi muMwaami.
3 Alubo ndilikukukumbila iwe numubelesima wachoonzyo,* kuti wiinkilile kunembo kugwasya banakazi aaba bakabeleka changuzu andime akaambo kamakani mabotu, kuswaanizya aKkilementi abamwi boonse babelesima bali aamazina aali mubbuku lyabuumi.
4 Chiindi choonse amubotelwe muMwaami. Ndilayindulula lubo kuti, Amubotelwe!
5 Bantu boonse abazibe kuti mulamvwisisisya. Mwaami ulaafwiifwi.
6 Mutakataazikani aachintu choonse pe, pesi muzintu zyoonse, kwiinda mukukomba akukombelezya munkombyo aamwi akulumba, amubuzye Leza zintu zyoonse nzimukumbila,
7 mpawo luumuno lwaLeza lwiinda kumvwisisisya koonse, lulakwabilila myoyo yanu amizeezo yanu kwiinda muli Kkristu Jesu.
8 Chamamanino bakombima, kufumbwa zintu zyachoonzyo, kufumbwa zintu zilemekwa, kufumbwa zintu ziluleme, kufumbwa zintu zisalala, kufumbwa zintu ziyandwa, kufumbwa zintu zyaambuulwa kabotu atala anzizyo, kufumbwa zintu zibotu, kufumbwa zintu zilumbayizigwa, amwiinkilile kunembo kuyeeya* zintu eezi.
9 Zintu nzimwakayiya akutambula akumvwa akubona kulindime, amuzichite mpawo Leza waluumuno uzooba aandinywe.
10 Ndilabotelwa kapati muMwaami, kuti lino kumamanino, mwazootondeezya kuti mulaandaba andime. Nikuba kuti mwakali aandaba andime pesi teemwakalikwe mweenya wakutondeezya kuti mulaandaba andime.
11 Tandilikwaamba zintu eezi akaambo kakuti kuli nzindiyanda pe, nkaambo ndayiya kukkutisikana muzyiimo zyoonse.
12 Ndilikuzi mbukubede kupona aazintu ziche akupona aazintu zyiingi. Muzintu zyoonse amuzyiimo zyoonse, ndayiya kukkutisikana kufumbwa kuti ndilikkusi naakuti ndili aanzala, kufumbwa kuti ndili aazyiingi naakuti taakwe nzindilaazyo pe.
13 Nkaambo ndili aamanguzu aakuchita zintu zyoonse akaambo kayooyo uundipa manguzu.
14 Nikuba oobo, mwakachita kabotu kundigwasya mumapenzi aangu.
15 Kwaamba choonzyo, inywe nibantu bakuFilipi, mulizi kuti nindakazwa kuMakkedoniya, kandili ndamuyiisya makani mabotu kakusaanguna, taakwe mbungano niiba iimwi yakatola lubazu andime mumakani aakupa akutambula kunze kwandinywe amulikke,
16 nkaambo nindakachili kuTesalonikka, mwakanditumizya zimwi zintu nzindakali kuyanda, kutali kamwi pesi tubili.
17 Tandiyandi chipo pe, pesi ndiyanda muchelo uutape kuti mujane zyiingi.
18 Nikuba oobo, zintu zyoonse nzindiyanda ndilaazyo alubo nzyiingi. Zyoonse nzindiyanda ndilaazyo, nkaambo ndakachitambula chipo nchimwakapa Epafrodito kuti azoondipe. Chipo eecho, mbweema bununkilila, nchipayizyo chitambulika, chibotezya Leza.
19 Mpawo Leza wangu, uzoomupa zintu zyoonse nzimuyanda kazili zyiingi, kweendelana abunoti bwakwe bwiingi kwiinda muli Kkristu Jesu.
20 Kuli Leza wesu aTaata akube bulemu kusikila kukabe kutamani. Ameni.
21 Amundijuzizye umwi awumwi wabasalali bajisini aaKkristu Jesu. Bakombima mbindilaabo balikumujuzya.
22 Basalali boonse, kapati bamung’anda yaKkesari, balikumujuzya.
23 Luzyalo lupati lwaMwaami Jesu Kkristu alube aalindinywe akaambo kabuntu bubotu mbumutondeezya.*
Makani Aamunsi
^ MuchiGrikki, “amusini wangu.”
^ MuchiGrikki, “ngundisungidwe aamwi mujokwe.”
^ Naakuti, “kuyeeyesesya.”
^ MuchiGrikki, “kamuuya ngumutondeezya.” Langa Bupanduluzi Bwamabala.
