Matalikilo 16:1-16
-
Hagari a-Ishumayeli (1-16)
16 Mwanakazi wa-Abbramu Sarayi taakamuzyalila bana pe, pesi wakali aamubelesi waku-Ijipita wakali kutegwa Hagari.
2 Nkinkaako, Sarayi wakati kuli Abbramu: “Jehova wapa kuti nditabi aabana. Ndikumbila kuti woone aamubelesi wangu. Amwi ndilakonzya kuba aabana kwiinda mulinguwe.” Abbramu wakaziswiilila nzyaakaamba Sarayi.
3 Abbramu naakakkala minyaka iili kkumi munyika yaKkenani, Sarayi mwanakazi wa-Abbramu, wakabweza Hagari mubelesi wakwe waku-Ijipita mpawo wakamupa mulumaakwe Abbramu kuti abe mwanakazi wakwe.
4 Nkinkaako, Abbramu wakoona aaHagari mpawo wakaba aada. Hagari naakabona kuti waba aada, wakasaanguna kusampawula namalelo wakwe.
5 Mpawo Sarayi wakati kuli Abbramu: “Ndilikupenzegwa akaambo kanduwe. Ndime ndakakupa mubelesi wangu, pesi naakabona kuti waba aada, wakasaanguna kundisampawula. Jehova atubeteke ime anduwe.”
6 Nkinkaako, Abbramu wakati kuli Sarayi: “Bona! Mubelesi wako ulimumaboko aako. Chita kufumbwa nchubona kuti chilikabotu.” Sarayi wakapenzya Hagari mpawo Hagari wakachija.
7 Nikwakayinda chiindi, ngilozi yaJehova yakamujana kukasawu kamaanzi munkanda, kasawu kali munzila iiya kuShuri.
8 Mpawo yakati: “Hagari O mubelesi waSarayi, wazwa kuli alubo uya kuli?” Wakati: “Ndilikuchija namalelo wangu Sarayi.”
9 Ngilozi yaJehova yakati kulinguwe: “Bweeda kuli namalelo wako ukalibombye kulinguwe.”
10 Alubo ngilozi yaJehova yakati: “Ndizoopa kuti bana bako bavule loko, zyakuti tabanoobaliki pe.”
11 Ngilozi yaJehova yakayungizya kuti: “Lino ulaada, uzootumbuka mwana mulombe alubo weelede kumuuzika zina lyakuti Ishumayeli,* nkaambo Jehova waamvwa mapenzi aako.
12 Mwana ooyo uzooba mbuli donki* lyamusokwe. Uzoolwana aamuntu woonse alubo muntu woonse uzoolwana aanguwe, uzookkala kaanzeene ababbululu bakwe.”*
13 Mpawo Hagari wakayita zina lyaJehova, ooyo wakali kwaambuulaawe kati: “Nduwe Leza uubona,” nkaambo wakati: “Teebiya ndamubona ooyo uundibwene?”
14 Chikala eecho nchichakayitwa kuti Bberi-lahayi-royi.* (Chili aakati kaKkadeshi aBberedi.)
15 Nkinkaako, Hagari wakazyalila Abbramu mwana mulombe, mpawo Abbramu wakawuzika mwanaakwe ngwaakazyalilwa aaHagari zina lyakuti Ishumayeli.
16 Abbramu wakali aaminyaka iili 86 chiindi Hagari naakamuzyalila Ishumayeli.
Makani Aamunsi
^ Nkukwaamba kuti “Leza Ulamvwa.”
^ Bamwi bayeeyela kuti nimbizi. Nkukwaamba kuti wakali kuzooba aamuuya wakulyeendelezya.
^ Amwi malembe ati, “unookkala kakazyania aabeenzinyina boonse.”
^ Nkukwaamba kuti “Chikala Chayooyo Uupona Uundibona.”
