Solomoni naakali kukomba Jehova, muIsrayeli kwakali luumuno. Pesi Solomoni wakakwata banakazi biingi bakali kuzwa kuli amwi masena, bakali kukomba baleza bakubeja. Solomoni wakali kuya buchincha alimwi wakasanguna kukomba baleza bakubeja. Jehova wakanyema loko. Jehova wakabuzya Solomoni kuti: ‘Njookunyanzya bwaami akupa balanda bako chipaanzi chipati alimwi mpuli yako iyoosyaala achipaanzi chiniini.’

Alubo, Jehova wakapa kuti nzyakaamba zimvwisisike. Jerobbowamu mubelesi waSolomoni, wakali kuyabweenda munzila alimwi wakaswaanana amusinsimi Ahija. Ahija wakadelula chigogo chakwe mutusani tuli 12 akubuzya Jerobbowamu kuti: ‘Jehova uyoonyanzya Solomoni bwaami akubuchita kuti bube muzipaanzi zibili. Bweza tusani tuli kkumi, nkaambo uyooba mwaami wamisyobo iili kkumi.’ Mwaami Solomoni naakamvwa makani aaya, wakayanda kujaya Jerobbowamu. Pesi Jerobbowamu wakachijila kuEgepita. Mukuya kwachiindi, Solomoni wakafwa alimwi mwanaakwe Rehobbowamu wakaba mwaami. Jerobbowamu wakayeeya kubweeda kuchisi chaIsrayeli.

 Bapati bakuIsrayeli bakabuzya Rehobbowamu kuti: ‘Ikuti wabajata kabotu bantu, bayoosyomeka kulinduwe.’ Pesi beenzinyina bakamubuzya kuti: ‘Weelede kuba alunya kubantu akubapa milimu miyumu!’ Rehobbowamu wakaswiilila nzyaakabuzigwa abeenzinyina. Wakali alunya alimwi bantu bakatalika kupapila. Bakasala Jerobbowamu kuti abe mwaami wamisyobo iili kkumi alimwi misyobo eeyi yakazootegwa mbwaami bwaIsrayeli. Misyobo iibili yakategwa mbwaami bwaJuda alimwi bakakkala kabasyomeka kuli Rehobbowamu. Misyobo yamaIsrayeli iili 12 yakaanzana.

Jerobbowamu taakali kuyanda pe kuti bantu bakwe bayinke kuJerusalemu kwakali kweendelezya Rehobbowamu. Ulizi na kuti nkamboonzi? Nkaambo Jerobbawamu wakali kuyoowa kuti bantu bayoomupapila akuswiilila Rehobbowamu. Nkinkaako, wakapanga ng’ombe zyangolida zibili akubuzya bantu kuti: ‘KuJerusalemu nkule loko. Mulakonzya kukomba okuno.’ Bantu bakatalika kukomba ng’ombe zyangolida akuleka lubo kukomba Jehova.