Lwiiyo luzwa muBbayibbele lulaamanguzu aakuchincha buumi bwabantu. Atulange-lange zikozyano zibili, chaRicardo achaAndres.

RICARDO: Nindakali aminyaka iili 15, ndakajoyina kabunga kabalombe bachita zintu zibi. Beenzuma aaba bakandiyiisya kuchita zintu zibi. Nkinkaako, ndakali kuyanda kuzoopika minyaka iili 10 mujele! Makani aaya alakonzya kubonekaanga mbufuba-fuba. Pesi nkutwakali kukkala, bantu bakali kupika kwachiindi chilamfu, bakali kulumbayizigwa akulemekwa. Andime nzindakali kuyanda.

Ndakazichita zintu zyoonse zichitwa atubunga twazigwebenga zili mbuuli kubelesya ma-drugs, kuchita bwaamu akulwana. Bumwi buzuba mansiku, twakali kulwana abamwi katuli kudubulana. Ndakali kubonaanga ndilafwa pesi ndakachija kanditalichiside pe. Kuzwa waawo, ndakasaanguna kuyeeyesesya atala anzindakali kuyanda kuzoochita mubuumi mpawo ndakabona kuti ndeelede kuchincha. Pesi ndakali kuyoochincha biyeni? Ndakali kuyoolujana kuli lugwasyo?

Babbululu bangu biingi teebakali kubotelwa pe. Buumi bwabo bwakazwide mapenzi. Pesi teembukwakabede pe kumpuli yasiminzyeesu umwi. Ndakalizi kuti mbantu balikabotu akuti bakali kutobelezya malayilile aamuBbayibbele. Aali chimwi chiindi, bakandiyiisizye kuti zina lyaLeza nguJehova. Mumazuba mache kulwana kakwiindide, ndakakomba kuli Jehova, kandibelesya zina lyakwe kuti andigwasye. Ndakagamba mubuzuba bwakatobela nkaambo umwi Kamboni waJehova wakakonkomona. Nguwe wakazoondiyiisya Bbayibbele.

Ndakaswaana limwi penzi pati. Chiindi chiingi, beenzuma bachiindi bakali kundifoonena, kabayanda kuti tuchite zyachiindi. Nikuba kuti kwakali kuyumu, ndakali kukaka. Ndakali kuyanda kwiinkilila kunembo kwiiya Bbayibbele. Ndilabotelwa akusala ooku. Buumi bwangu bwakachincha alubo ndakajana kubotelwa kwachoonzyo.

Ndichiyeeyede kandikomba kuli Leza, kandimubuzya kuti ndiyanda kupika minyaka iili 10 mujele, kuchitila kuti ndizoobe umwi wazigwebenga uulemekwa. Ndakamukumbila kuti andizumizye kumubelekela kwaminyaka iili 10, kandili mukambawusi wachiindi choonse kuti ndigwasye bamwi, mbuuli mbundakagwasigwa. Leza wakayisandula nkombyo yangu nkaambo ndaba aminyaka iili 17 kandili mukambawusi wachiindi choonse! Alubo taakwe nindakasungwa pe.

Beenzuma bachiindi biingi balikupika minyaka myiingi mumajele alubo bamwi bakafwa. Kuti ndayeeya mbundakabede, ndilabalumba babbululu bangu Bakamboni. Bakali siyene abamwi nkaambo bakali kupona kweendelana aBbayibbele. Ndakasaanguna kubalemeka  kwiinda mbundakali kulemeka beenzuma bachiindi. Alubo, ndilamulumba Leza akaambo kakundiyiisya nzila mbotu yakupona.

ANDRES: Ndakazyalilwa muchilawu bantu mubafwaba alubo mubayandisya kubelesya ma-drugs, kubbida bantu, kujaya akuchita bwaamu. Ndeende wakali chankolwa alubo wakali kubelesya munsamu uukola uutegwa cocaine. Ndeende abaama bakali kukkala kabatukilana akulwana.

Ndakasaanguna kunywa bukande akubelesya ma-drugs kandichili muniini. Chiindi chiingi, ndakali kukkala muma-streets kandibba zintu akuzyuuzya. Nindakali kuyabukomena, ndeende wakali kuyanda kuti tumvwanane, nkinkaako, wakandiyiisya kuchita zintu zitali kabotu zili mbuuli kuula akuuzya ma-drugs ayimwi minsamu, iitazumizigwi muchisi. Ndakali kujana mali nyingi chakufwambaana. Bumwi buzuba mapulisa bakandizida kung’anda mpawo bakandisunga nkaambo ndakachijaye muntu. Ndakapika minyaka iili 5 mujele.

Limwi zuba kuseeni, kwakapegwa chizibisyo mujele, chakali kutamba basungwa kuti bazooswiilizye Bakamboni baJehova kabali kukambawuka. Ndakasala kuti ndikabaswiilizye. Nzindakamvwa zyakali kumvwisisika mpawo ndakasaanguna kwiiya Bbayibbele aBakamboni. Teebakali kwaamba Magwalo aakali kundibotezya luzutu pesi bakali kunditondeezya amalayilile aaLeza aasumpukide aali atala akulijata.

Ndakabona kuti tandikonzyi pe kuchincha maponeno aangu kakutakwe uundigwasya, kapati chiindi bamwi basungwa bakatali kuyanda nzindakali kuchita nibakali kundipenzya. Nkinkaako, ndakali kukomba kuli Jehova kuti andipe manguzu abusongo mpawo wakandigwasya. Nikuba kuti bamwi bakali kundipenzya pesi ndakaba aachibindi chakubuzya bamwi basungwa atala aBbayibbele.

Nichakasika chiindi chakuti ndizwe mujele, teendakabotelwa pe nkaambo ndakali ndabuzibila buumi bwamujele. Chiindi nindakali kuzwa, bamwi basungwa bakandibbabbayisya. Bamwi bakali kundibuzya kuti: “Weende kabotu mufundisi.”

Ngandayoowa kuti ndayeeya buumi bwangu mbubwakali kuyooba, kaansinga teendakazumina kuyiisigwa aaLeza. Ndimulumba loko Leza nkaambo ulandiyanda akuti taakandibona mbuuli muntu uutagwasyi pe. *