Bantu babeleka changuzu teebakandu pe. Pesi balabotelwa kubeleka changuzu kuti bajane nzibayanda akugwasya bamwi nikuba kuti bamwi bayilangilaansi milimu njibachita.

Tweelede kubeleka nkaambo mubuumi kuli zintu zyiingi nzitweelede kuchita. Bantu biingi munyika tabakuyandi pe kubeleka pesi kubeleka changuzu kulagwasya.—Mukambausi 3:13.

“Ndakabona kuti kubeleka changuzu kupa kuti ubotelwe akukkutisikana. Kulimvwa oobo kwakapa kuti ndikuyande kubeleka. Alubo kuba achiyandisyo chakubeleka kupa kuti ube ampuwo mbotu.”—Reyon.

NZILYAAMBA BBAYIBBELE: “Mumilimo yoonse mulajanwa impindu.”—Tusimpi 14:23.

Belesya nzila zitobela kuti ube amaboneno aalikabotu atala amulimu.

Baachiyandisyo chakuchita kabotu. Milimu yoonse njuchita yaang’anda, yakuchikolo, naakuti yankubelekela ibeleke changuzu. Kuti wabona kuti ulawukonzya mulimu ooyo, belekela kuti uuchite chakufwambaana. Kuchita kabotu kuyoopa kuti ubotelwe amulimu ooyo.

NZILYAAMBA BBAYIBBELE: “Sa ulibwene muntu uusungwaala mumilimo yakwe? Oyo muntu ulaima kunembo lyabami, takooyooima kunembo lyabantu buyo pe.”—Tusimpi 22:29.

Bona mbuugwasya bamwi. Kuti wabeleka changuzu, bamwi bayoogwasikana. Muchikozyano, kuti kwiibeleka changuzu milimu yaang’anda, ziyoobawubila bamwi mumpuli.

NZILYAAMBA BBAYIBBELE: “Kupa kulakkomanisya kapati kwiinda kupegwa.”—Incito 20:35, NW.

Chita zyiingi. Ulakonzya kuchita milimu myiingi kutali kuchita uulangene anduwe luzutu. Kuchita oobo, kuyoopa kuti ukonzye kuchita milimu myiingi kutali akaambo kakuti ulikusungilizigwa biya pesi unooli waliyandila.—Matayo 5:41.

NZILYAAMBA BBAYIBBELE: ‘Kuchita kwako kubotu kutabi kwakusinikizigwa pe pesi akube kwakuliyandila.’—Filimoni 14.

Baamaboneno aalikabotu. Bantu babeleka changuzu teebakandu pe pesi tazyaambi kuti tabakwe chiindi chakulyookezya. Bali amaboneno aalikabotu, balabotelwa mumilimu njibachita alubo bajana chiindi chakulyookezya.

NZILYAAMBA BBAYIBBELE: “Inkankamanza yomwe iili aluumuno nimbotu kwiinda maanza obile aazwide milimo iikataazya iitakutyi moyo.”—Mukambausi 4:6.