ZIGWASYA BAZYALI
5: Kwaambuuzyania
CHAMBAANZI?
Kwaambuuzyania munzila yaluyando kuchitika chiindi iwe numuzyali abana bako nimwaambuula twaambo kamulikuswiilizyania akumvwa nzimuyeeya ambumulimvwa.
NKAMBOONZI NIKUYANDIKANA?
Kwaambuuzyania abachikula kulakonzya kukuyumina. Kabachili baniini bakali kukubuzya zyoonse nzibayeeya ambubalimvwa. Pesi nibakomena ngatabachikonzyi kuchita oobo alubo tuzizi pe nzibayeeya ambubalimvwa. Eezi zili mbuuli kuti muli mumabazu aasiyene aamulonga mupati. Nikuba kuti achiindi eechi bachikula tabakonzyi kwaambuula mbuuli nibakachili baniini pesi achiindi eechi nikuyandikana loko kwaambuulaabo.
NZUKONZYA KUCHITA
Amwaambuuzyanie chiindi mwanaanu naangunukide. Ulakonzya kwaambuula abana bako nikuba kusikila kwabamansiku.
“Ulakonzya kuyeeya kumubuzya kuti, ‘Lino wayanda na kwaambuula? Twalaamwi buzuba boonse!’ Tweelede kusola na kuti bana bayanda kwaamba mbubalimvwa? Nzizyo kabi bazyali nzibalangilila kubana kuti baambe nzibayanda.”—Lisa.
“Nikuba kuti ndiyandisya kufwambaana koona pesi chimwi chiindi ndilayizya abana bangu kusikila kwabamansiku.”—Herbert.
NZILYAAMBA BBAYIBBELE: “Muntu teelede kuyandaula kuligwasya mwini buyo. Umwi aumwi uleelede kuyandaula kugwasya mweenzinyina.”—1 BaKorinto 10:24.
Leka kuchita zimwi zintu. Umwi mwaalumi wakazumina kuti: “Chimwi chiindi ngandilikuyeeya zimwi zintu bana bangu nibali kwaambuula andime. Alubo ngabazibona kuti tandizimvwide pe nzibalikwambuula.”
Kuti mwanaako kayanda kwaamba chimwi chintu, zima TV naakuti ubikke aansi fooni. Swiilizya chiindi mwanaako nalikwaambuula nikuba kuti nzyalikwaamba uzibona kazili ziniini.
“Tweelede kuziba mbubalimvwa bana besu. Kuti bana babona kuti tatukwe ndaba ambubalimvwa, balaleka kutubuzya mbubalimvwa alubo balakonzya kuyanduula kugwasigwa abamwi bantu.”—Maranda.
“Toyelede kunyema pe nikuba kuti mwanaako kalikuyeeya zintu zitali nzizyo.”—Anthony.
NZILYAAMBA BBAYIBBELE: “Amucenjele mbomumvwa.”—Luka 8:18.
Amubelesye chiindi nimulikuchita zimwi. Bana balimvwa kabaangunukide kwaambuula kuti kabatalangene abazyali babo nibakkede.
“Twaambuula abana besu nitukkede mumoota nkaambo ngatatulangene pe alubo kuchita oobo kupa kuti twaambuuzyanie kabotu.”—Nicole.
Chiindi chakulya chipa kuti mukonzye kwaambuula abana banu.
“Achiindi nitulikulya goko, umwi awumwi waamba zyachitika buzuba oobo. Kuchita oobo kupa kuti tujatane akuti tugwasyanie mubuyumu-yumu mbutuswaana.”—Robin.
NZILYAAMBA BBAYIBBELE: ‘Amube amutwe muuba munonoke kwaambuula.’—Jakobo 1:19.
