ZIGWASYA BACHIKULA
12: Zipeekezyo
CHAMBAANZI?
Chipeekezyo teechintu nchuyeeyela biya pe pesi nchintu nchulangilila kuti chizoochitika. Kupeekezya kuchita chimwi chintu kuswaanizya kupulana akubeleka changuzu kuti uchizuzikizye.
Zipeekezyo zilakonzya kutola chiindi chifwiifwi (mazuba naakuti mviki) zimwi zilakonzya kutola chiindi (myeezi) alubo zimwi zilakonzya kutola chiindi chilamfu (munyaka naakuti kwiindaawo) kuti zizuzikizigwe. Zipeekezyo zyachiindi chilamfu zilakonzya kutola chiindi chilamfu kuti zizuzikizigwe.
NKAMBOONZI NIKUYANDIKANA?
Kuzuzikizya zipeekezyo kupa kuti ulisyome, usimye bweenzinyokwe abamwi akuti ubotelwe.
Kulisyoma: Kuzuzikizya zipeekezyo ziniini nzulibikkila kupa kuti ubone kuti ulakonzya kuzizuzikizya niziba zipati. Alubo kuswaana buyumu-yumu bwabuzuba abuzuba mbuuli kukaka kweenwa abasela lyako kupa kuti ulisyome.
Bweenzinyokwe abamwi: Bamwi bantu bayandisya kukkala abantu bakalibikkila zipeekezyo alubo balikubelekela kuti bazizuzikizye. Imwi nzila iikonzya kukugwasya kuti usimye bweenzinyokwe, nkubelekaamwi amuntu uuli azipeekezyo zikozyenie azyako.
Kubotelwa: Ulabotelwa kuti wazuzikizya zipeekezyo nzwaalibikkila.
“Ndilakuyanda kulibikkila zipeekezyo. Nkaambo kupa kuti ndibeleke changuzu kuti ndizizuzikizye. Kuti wachizuzikizya chipeekezyo chako, ulabotelwa alubo mumoyo ngawalibuzya kuti ‘Ndakonzya! Ndachizuzikizya nchindakali kupeekezya.’”—Christopher.
NZILYAAMBA BBAYIBBELE: “Uuyeeya muuwo takonzyi kubyala, ayooyo uulanga mayoba takonzyi kutebula.”—Mukambausi 11:4.
NZUKONZYA KUCHITA
Belesya nzila eezi kuti ukonzye kuzuzikizya zipeekezyo zyako.
Lemba. Lemba zipeekezyo nzuyanda mpawo usale nzuyanda kusaanguna kuzuzikizya kweendelana ambuzitobelana.
Pulana. Muchipeekezyo chimwi achimwi, chita zitobela:
-
Libikkile buzuba mbucheelede kuzuzikizigwa.
-
Lemba zintu zyeelede kuchitwa.
-
Yeeya zintu zikonzya kukukachizya kuchizuzikizya mpawo ubone mbukonzya kuzizunda.
Chichite. Utalindili kuti uzibe zintu zyoonse ziyandikana nutazootalisye. Libuzye kuti, ‘Niinzi nchindeelede kusaanguna kuchita kuti ndizuzikizye chipeekezyo changu? Kuzwa waawo chichite. Nwaamana kutobelezya nzila imwi ayimwi, langa kuti wayikonzya na.
NZILYAAMBA BBAYIBBELE: “Makanze aabusungu alaleta zilyo zinji.”—Tusimpi 21:5.
