ZIGWASYA BAZYALI
7: Zyeelelo Zyakulijata
CHAMBAANZI?
Zyeelelo zyakulijata milawu muntu njalibikkila akupona kweendelana anjiyo. Muchikozyano, uleezya na kusyomeka muzintu zyoonse? Uyanda kuti bana bako bapone kweendelana amilawu eeyi.
Zyeelelo zyakulijata ziswaanizya nzila njuponaayo. Muchikozyano, muntu uupona kweendelana azyeelelo zyakulijata musungu, tasaluuli pe, ubabikkila maanu bamwi alubo chiindi chiingi, nkuuba kumuntu kuba abube oobu kuti wabusaanguna kachili muniini.
NZILYAAMBA BBAYIBBELE: “Iyisya mwana aende munzila iielede, lino akomena takooyooleya mulinjiyo.”—Tusimpi 22:6.
NKAMBOONZI NIKUYANDIKANA?
Zyeelelo zyakulijata zilayandikana munyika iizwide zyatekkinoloji. Mwanakazi uutegwa Karyn wakaamba kuti: “Tulakonzya kujana zintu zitali kabotu mumafooni eesu kufumbwa chiindi. Zilakonzeka kuti bana beebele zintu zitali kabotu kabakkede afwiifwi andiswe!”
NZILYAAMBA BBAYIBBELE: ‘Bantu bakakomena . . . bali amiyeeyo yakayiisigwa kusala chibotu achibi.’—BaHebrayo 5:14.
Kupona kweendelana azyeelelo zyakulijata kulayandikana. Kuchita oobo kuswaanizya (kwaamba majwi aakuti “ndikumbila” akuti “ndalumba”) akuyanda bamwi, nzibatachichiti pe bantu biingi nkaambo baabuyandisya tunchina twamazubaano kwiinda bantu.
NZILYAAMBA BBAYIBBELE: “Mbubonya mbomuyanda kuti bantu bamucitile, anywebo amubacitile mbubonya.”—Luka 6:31.
NZUKONZYA KUCHITA
Libikkile zyeelelo zyakulijata. Muchikozyano, kuyanduulisisya kwakachitwa kutondeezya kuti bachikula balakonzya kutantamuka koonana amuntu kabatanakwata naakuti kukwatwa kuti bayiisigwa kabachili baniini kuti kuchita oobo nchibi.
ZIKONZYA KUMUGWASYA: Belesya zintu zilikuchitika lino kuti mwaambuuzyanie atala azyeelelo zyakulijata. Muchikozyano, kuti muma-news kwaambwa atala bantu bakajeyana, ulakonzya kwaamba kuti: “Zilayoosya kubona bamwi bantu kabanyema munzila iili boobu. Ubonaanga niinzi chipa kuti bachite oobo?”
“Kulabayumina bana kusiyanisya chibotu achibi kuti kabatachizi kuti chibotu achibi nchiichili.”—Brandon.
Bayiisye zyeelelo zyakulijata. Bana balakonzya kuyiisigwa kwaamba kuti “ndikumbila” akuti “ndalumba” akulemeka bamwi. Bbuku litegwa Parenting Without Borders lyaamba kuti: “Kuti bana babona kuti nzibachita zilagwasya mumpuli, kuchikolo amuchilawu, zipa kuti babe aluzyalo kubantu boonse kutali lwabo abalikke.”
ZIKONZYA KUMUGWASYA: Bape milimu yakuchita bana kuchitila kuti bakonzye kugwasya bamwi.
“Kuti bana bakonzya kuchita milimu yaang’anda, tabazookataazikani pe bazookomena nkaambo banooli bakayiisigwa kabachili baniini.”—Tara.
