Kuti twaziba nsandulo yamubuzyo ooyu zipa kuti tube amaboneno alikabotu mubuumi.

Zilachita na kuti Leza atulengele zintu zibotu kayanda kuti tuswaanane amapenzi mubuumi?

Chiindi bantu batakombi nibabona mapenzi baamba kuti Leza ulaamoyo mubi, bamwi baamba kuti tawope. Basyoma kuti mapenzi ngituswaana atondeezya kuti (1) Leza taakwe manguzu pe akwaamanisya, (2) Leza taakwe ndaba pe andiswe akuti (3) Leza tawope.

Ootu ntuto na twaambo tupa kuti katuswaanana amapenzi?

Leza taakatulengela kuti katuswaanana amapenzi pe.

Uyanda kuti tubotelwe mubuumi.

“Kunyina cintu ciinda kubota [kubantu] kunze lyakukondwa akucita zibotu eelyo nobacipona, alimwi akuti muntu woonse kalya, kanywa alimwi akukkomana akaambo kamilimo yakwe yoonse njabeleka canguzu. Eeci ncipego ca Leza.”​—MUKAMBAUSI 3:12, 13.

Leza wakapa Adamu aEva buumi bumaninide.

Taakali kuyanda pe kuti kabaswaanana amapenzi kuswaanizya abana babo.

“Leza wakabalongezya akubaambila kuti: ‘Amuzyalane muvwule, muzuzye nyika akuyeendelezya.’”​—MATALIKILO 1:28.

Adamu aEva bakasala kulyeendelezya kutali kweendelezegwa aLeza.

Eezi zyakapa kuti baswaanane amapenzi kuswaanizya abana babo.

“Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.”​—BAROMA 5:12. *

Leza taakwe naakatulengela kuti tulyeendelezye pe.

Mbuli mbutwakalengwa katutakonzyi kukkala mumaanzi, twakalengwa katutakonzyi pe kulyeendelezya.

“Muntu weenda tapedwe nguzu zyakusololela noziba ntaamu zyakwe.”​—JEREMIYA 10:23.

Leza tayandi pe kuti katuswaanana amapenzi.

Uyanda kuti tweezye anzila zyoonse kuti tulikwabilile kumapenzi.

“Eelo kaka inga cabota kuti waiswiilila milawo yangu! Aboobo luumuno lwako inga lwaba mbuli mulonga.”​—ISAYA 48:18.