Kuti twatantamuka bantu mbituyeeyela zintu zitali kabotu, zipa kuti tubasaluule. Kuti twamvwanana aabantu bamusyobo wesu luzutu naakuti bachita zintu zifanana aandiswe tulabonaanga nzituyeeya, mbutulimvwa anzituchita nzizyo zili kabotu azilikke.

“Amujalule myoyo yanu.”—2 BAKORINTO 6:13.

Zyaambaanzi? Bbala lyakuti “moyo” lilakonzya kwaamba mbutulimvwa. Kuti katumvwanana aabantu bamusyobo wesu luzutu, myoyo yesu ilabaanga ilijalidwe. Kuti tumane penzi eeli, tweelede kumvwanana aabantu basiyene-siyene.

Kuti twabaziba kabotu bamwi, ziyootugwasya kumvwisisisya kuti nkamboonzi nibachita zintu zisiyene andiswe. Kuti twamvwanana loko aambabo, tulababona mbuli bantu bamusyobo wesu. Tulababona kabayandikana, kuti baswaanana aamapenzi tulabijilwa alubo kuti babotelwa tulabotelwa.

Bona chikozyano chaNazaré. Wakali kusaluula bantu bakuli zimwi nyika bakali kulongela kuchisi chabo. Wakapandulula zyakamugwasya, wakati: “Ndakalipa chiindi chakubaabo akubelekaabo. Ndakabona kuti bantu aaba bakali kuchita zisiyene azyakali kwaambwa aabantu bakulindiswe. Kuti wamvwanana aabantu bawumwi musyobo, tukoobalangilila aansi akaambo kambubaboneka pesi uyoobayanda akubabona kabayandikana.”

Yanduula myeenya yakwaambuula aabantu bakuli zimwi nyika, bawumwi musyobo naakuti mulaka uusiyene awako. Ulakonzya:

• Kubakumbila kuti mubufwiifwi baambuule atala abuumi bwabo.

• Kubatamba kuti basike muzoolye aamwi.

• Kubaswiilizya chiindi nibali kwaambuula kuchitila kuti uzibe nzibayanda.

Kuti wamvwisisisya kuti zyakabachitikila mubuumi nzizyo zyakapa kuti babe mbuli mbubabede ziyoopa kuti ube aamaboneno aalikabotu atala amusyobo wabo.