“Aboobo amulangile, nkaambo tamuzyi buzuba nociba ciindi.”​—MATAYO 25:13.

Amulangile, amupakamane, nkaambo tamuzyi ciindi cibikkidwe nociyoosika.​—MARKO 13:33.

Taakwe muntu pe uuzi kuti mamanino azoosika lili. Pesi Leza ‘wakasala chiindi abuzuba’ bwamamanino naazoosika. (Matayo 24:36) Eezi zyaamba kuti taakwe zintu na zikonzya kutugwasya kuti tuzibe kuti mamanino abaafwiifwi? Mpuzili. Jesu wakabuzya basikwiiya bakwe zintu zyakali kuyootondeezya kuti mamanino abaafwiifwi.

Zintu eezi zitondeezya mamamanino “aabweende bwazintu” oobu. Jesu wakati: “Cisi ciyoobukila cisinyina abwami buyoobukila bwaminyina, alimwi kuyooba nzala amizuzumo yanyika mumasena aaindene-indene.” (Matayo 24:3, 7) Alubo wakaamba kuti kwakali kuyooba ‘zilwazi’ munyika yoonse. (Luka 21:11) Ulikuzibona kazilikuchitika na zintu zyakaambwa aaJesu?

Mazubaano, munyika muzwide nkondo, nzala, mizuzumo yanyika amalwazi aataambiki. Muchikozyano, mu2004 kwakachitika mumuzumo wanyika muIndian Ocean wakajaya bantu basika ku225 000. Mumunyaka wayinda corona yakajaya bantu basika ku2.6 miliyoni munyika yoonse. Jesu wakaamba kuti zintu zili boobu zitondeezya kuti mamanino aanyika eeyi abaafwiifwi.

Bbayibbele lyaamba kuti tulikupona “kumazuba aamamanino.” (2 Petro 3:3, 4) Kweendelana azyaambidwe mulugwalo lwa 2 Timoteyo 3:1-5, chakali kuyooba chitondeezyo chamazuba aakumamanino nkutalijata kabotu. (Langa kabbokesi katii, “ Zitazoochitike Kumazuba Aakumamanino.”) Mazubaano, nga wababona na bantu baliyanda, batangala, balaalunya alubo batakwe luyando? Eezi zitondeezya kuti tulikupona kumamanino aanyika eeyi.

Mazuba aakumamanino azootola chiindi chilamfu biyeni? Bbayibbele lyaamba kuti ‘kwakaindi kaniini buyo.’ Mpawo Leza uzoonyonyoona “baabo banyonyoona nyika.”—Ciyubunuzyo 11:15-18; 12:12.

Leza wakasala kale buzuba achiindi nazoonyonyoona nyika eeyi mbi. (Matayo 24:36) Pesi kulaamwi makani mabotu Leza “tayandi kuti muntu uuli woonse anyonyoonwe.” (2 Petro 3:9) Leza upede bantu mweenya wakuti bapone kweendelana azyeelelo zyakwe. Nkamboonzi? Nkaambo uyanda kuti tukafutuke chiindi baakunyonyoonwa bantu babi mpawo tukapone munyika mpya yaparadayizi.

Leza wakachita mabambe aakuti kukambawukwe makani mabotu munyika yoonse kuchitila kuti bantu basale kuzooyendelezegwa aanguwe munyika mpya. Jesu wakaamba kuti makani mabotu alaatala aBwaami bwaLeza azookambawukwa “munyika yoonse.” (Matayo 24:14) mu2019, Bakamboni baJehova bali munyika yoonse bakakambawuka akuyiisya bantu mulumbe wamuBbayibbele uupa bulangilizi kwama-awa aayinda ku2 bbiliyoni. Jesu wakaamba kuti makani mabotu akali kuyookambawukwa munyika yoonse mpawo mamanino ayoosika.

Mfulumende zyabantu zyabaafwiifwi kunyonyoonwa. Pesi makani mabotu ngakuti ulakonzya kuzoofutuka kwazoonyonyoonwa bantu bataswiilili mpawo uzoopone munyika yaparadayizi njaakatusyomezya Leza. Chiiyo chitobela chilatondeezya nzweelede kuchita kuti weelele kuyoopona munyika mpya.