Maminiti aali 60 aakutalika chiindi mwana naazyalwa ayandikana loko. Nkamboonzi? Nkaambo muchiindi eechi, mwanakazi weelede kutondeezya mwanaakwe kuti ulamuyanda alubo eezi zilakonzya kumugwasya mwana kuti akomene kabotu. *

Niinzi chipa kuti mutumbu ayandisye mwanaakwe? Mubbuku litegwa The Journal of Perinatal Education, umwi sibusongo uutegwa Jeannette Crenshaw wakapandulula kuti mahomoni aategwa oxytocin “apa kuti mukayintu ayandisye mwanaakwe chiindi nalikumunyonsya, nalikumujata analikumulanga.” Alubo kuli imwi homoni “iipa kuti mwanakazi abikkile maanu kumwanaakwe” akuti bayandane. Twiiyaanzi kuzintu eezi?

Kumvwanana kuli aakati kamutumbu amwanaakwe kwakabikkwa aJehova Leza. * Mwaami Davida wakalumbayizya Leza nkaambo nguwe ‘wakamugwisya mwida’ akupa kuti alimvwe kakwabilidwe mumaboko abanyina. Eezi zyakapa kuti akombe kati: “Ndakasiigwa mumaanza aako kuzwa kukuzyalwa kwangu, nduwe Leza wangu kuzwa mwida lyabama.”—Intembauzyo 22:9, 10.

LIBUZYE KUTI: Mbukunga Leza wakalenga mutumbu kuti akonzye kubikkila maanu kumwanaakwe akumuchitila nzyayanda, tazilaantanganana na kuti Leza ulaandaba azintu zitukataazya iswe ‘tobana bakwe’?—Incito 17:29.

Jesu Kristu uuzi Mulengi wesu kwiinda bantu boonse wakayiisya kuti: “Sa tuyuni tobile tatuulwi kobili? Nekubaboobo taakwe nikaba komwe akati kantuto kawida ansi atazumina Usowanu. Anywebo aalo masusu aali amitwe yanu alibalidwe oonse. Nkaambo kaako mutayoowi, mulayandika kwiinda tuyuni tunji.”—Matayo 10:29-31.

Nchiyumu kubikkila maanu kutuyuni tuniini nikuba kubaandaba kuti ‘kamwi kawida aansi.’ Pesi Taateesu uulikujulu ulaandaba akayuni kamwi akamwi. Muntu uyandikana loko kwiinda tuyuni twiingi. Nkinkaako, ‘utayoowi’ kuti Leza takuboni pe, nkaambo ulaandaba anduwe.

 Nzilyaamba Bbayibbele

• “Meso aa-Jehova ali koonse koonse, alalanga basizibi ababotu boonse.”—TUSIMPI 15:3.

• “Meso aa-Jehova alalangisya baluleme, amatwi aakwe alaswiilila kukwiila kwabo.”—INTEMBAUZYO 34:15.

• “Ndabotelwa akukondwa muluse lwako, nkaambo ulibwene mapenzi aangu, ulizi kupenga kwamoyo wangu.”—INTEMBAUZYO 31:7.

Kuziba kuti Jehova ulaandaba andiswe akuti ulaabona mapenzi ngituswaana kujana kwatugwasya na? Iiyi, kulakonzya kutugwasya mbuuli mbakaamba Hannah, * ukkala kuEngland, wakati:

“Chiindi chiingi ndakali kuyeeya kuti Jehova tandiyandi pe. Ndakali kuyeeya kuti tandikwe lusyomo pe nkaambo taakali kusandula nkombyo zyangu. Ndakali kuyeeya kuti Leza wakali kundisubula. Ndakali kubonaanga Leza taakachili kundiyanda.”

Lino Hannah wakaba amaboneno aalikabotu atala aJehova. Niinzi chakamugwasya kuti achinche? Wakati: “Nikuba kuti ndakatola chiindi chilamfu kuti ndichinche, pesi chakandigwasya nkuyeeya nkani yakapegwa yakali kwaambuula atala alufu lwaJesu kuti lutugwasya biyeni. Nkani eeyi yakandigwasya kubona kuti Jehova ulaaluyando.Nindakabona nkombyo zyangu kazilikusandulwa, ndakabotelwa nkaambo ndakabona kuti Jehova wakali kundiyanda. Kubala Bbayibbele akunjila miswaangano yachiKristu kulikundigwasya kuti ndibone bube bwaJehova akuziba nzila njatubonaayo. Lino ndakaziba kuti Jehova ulatuyanda akuti uyanda kugwasya umwi awumwi wesu kumugama.”

Zyakaambwa aHannah zilasungwaazya. Niinzi chikonzya kukugwasya kuti usyome kuti Leza ulaazi mapenzi nguswaana akuti ulizi mbulimvwa? Mubuzyo ooyu uyoosandulwa muchiiyo chitobela.