CHIIYO 17
Jehova Ulakuyanda!
“Jehova ulabakkomanina bantu bakwe.”—INT. 149:4.
LWIIMBO 108 Luyando lwa Leza Lutamani
ZITAYIIGWE *
Taateesu wakujulu ‘ulamukkomanina’ umwi awumwi wesu (Langa fuka 1)
1. Niinzi nzyabona Jehova mubakombi bakwe?
JEHOVA Leza “ulabakkomanina bantu bakwe.” (Int. 149:4) Makani aaya alabotezya. Jehova ulabubona buntu bubotu mbutulaabo. Ulazibona zintu nzituchita kuti tube bantu batambulika kulinguwe alubo ulatugwasya kuti tube beenzinyina. Kuti twakkala katusyomeka kulinguwe uyooba mweenzuma kukabe kutamani.—Joh. 6:44.
2. Nkamboonzi bamwi nikubayumina kusyoma kuti Jehova ulabayanda?
2 Bamwi balakonzya kwaamba kuti, ‘Ndilizizi kuti Jehova ulabayanda bakombi bakwe kabali kabunga pesi kujana ndaziziba biyeni kuti ulandiyanda ime lwangu kundipalama?’ Niinzi chipa kuti bamwi baambe oobu? Oksana * wakaswaanana aamapenzi naakachili muniini. Wakaamba kuti: “Ndakabotelwa chiindi nindakabbabbatizigwa mpawo ndakasaanguna kupayona. Nikwakayinda minyaka iili 15 ndakasaanguna kuyeeya zintu zitali kabotu zyakandichitikila kandichili muniini. Ndakayeeya kuti Jehova tachindiboni mbuli mukombi wakwe pe akuti tandeeleli pe kuti andiyande.” Umwi muchizi uupayona uutegwa Yua anguwe wakaswaanana aamapenzi naakachili muniini. Wakaamba kuti: “Ndakalipeda kuli Jehova akaambo kakuti ndakali kuyanda kumubotezya pesi ndakali kuyeeya kuti Jehova tandiyandi pe.”
3. Njiili mibuzyo njitutasandule muchiiyo eechi?
3 Mbuli bachizi babili baambwa aajulu anduwe ulamuyanda Jehova pesi kulakonzeka kuti kulakuyumina kusyoma kuti ulakuyanda. Nkamboonzi nweelede kuba aachoonzyo chakuti Jehova ulakuyanda? Alubo niinzi chikonzya kukugwasya kuti wasaanguna kuyeeya kuti Jehova takuyandi pe? Muchiiyo eechi tulasandula mibuzyo eeyi.
KUYEEYA KUTI JEHOVA TATUYANDI PE KULAKONZYA KUTUNJIZYA MUMAPENZI
4. Nkamboonzi nikutali kabotu kuyeeya kuti Jehova tatuyandi pe?
4 Kuti katuli aachoonzyo chakuti Jehova ulatuyanda akuti ulaandaba andiswe tuyoozumanana kumubelekela amoyo woonse nikuba katuswaanana aamapenzi. Pesi kuti twasaanguna kuyeeya kuti Jehova takwe ndaba pe andiswe, nguzu zyesu zilacheya. (Tus. 24:10) Alubo kuti twamana manguzu akubula lusyomo kuyootuyumina kulwana aaSaatani.—Ef. 6:16.
5. Niinzi nzibakaamba bamwi bakali kubonaanga Leza takwe ndaba pe ambabo?
5 Bamwi maKristu bakasaanguna kuyeeya kuti Jehova taakwe ndaba pe ambabo. Eezi zyakapa kuti batabi alusyomo lusimide. Umwi mwaalu uutegwa James wakaamba kuti: “Nikuba kuti ndakali kubeleka kuBbeteli akuti ndakali kugwasilizya mumbungano iibelesya umwi mulaka pesi teendakalikwe choonzyo chakuti Jehova wakali kubotelwa akaambo kazintu nzindakali kuchita. Aali chimwi chiindi ndakasaanguna kuyeeya kuti Jehova taziswiilili pe nkombyo zyangu.” Eva uuli mumulimu wachiindi choonse wakaamba kuti: “Ndakabona kuti kuyeeya kuti Jehova tandiyandi takuli kabotu pe nkaambo kupa kuti ndileke kubelekela Jehova amoyo woonse. Alubo kupa kuti utabi aachiyandisyo chakuchita zintu zyabukombi akuti utabotelwi kubelekela Jehova.” Michael uubeleka kali payona wachiindi choonse alubo mwaalu wakaamba kuti: “Kuti kutasyomi kuti Leza ulaandaba anduwe zilakonzya kupa kuti uleke kumukomba.”
6. Niinzi nzitweelede kuchita kuti twasaanguna kuyeeya kuti Leza takwe ndaba pe andiswe?
6 Zyakachitika eezi zitondeezya kuti takuli kabotu pe kuyeeya kuti Jehova takwe ndaba pe andiswe nkaambo kupa kuti tutabi alusyomo lusimide. Pesi niinzi nzitweelede kuchita kuti twasaanguna kuyeeya kuti Jehova takwe ndaba pe andiswe? Tweelede kugwisya muzeezo ooyu chakufwambaana alubo tweelede kukumbila Jehova kuti atugwasye kuti tugwisye ‘mizeezo iilibilisya’ mpawo ‘tube aaluumuno lwa Leza oolo lwiinda maanu oonse luyookwabilila myoyo yesu amizeezo yesu.’ (Int. 139:23; Flp. 4:6, 7) Alubo weelede kuziba kuti teenduwe pe awulikke uusikilwa aamizeezo iili boobu. Bamwi bakwesu abachizi nga baba aayo mizeezo iili boobu. Nikuba bakombi baJehova bachiindi bakali kuba aayo mizeezo eeyi. Atubone kuti twiiyaanzi kuzwa kuchikozyano chamwaapostolo Pawulu.
NZITWIIYA KUZWA KULI ZYAKACHITIKA KULI PAWULU
7. Ngaali mapenzi ngaakalaawo Pawulu?
7 Kuli nunga walimvwa kuti ulaazyiingi na zyakuchita akuti zilakuyumina kuzichita zyoonse? Kuti kakuli boobo, ulachimvwisisisya chiimo nchaakabede Pawulu. Pawulu wakali kukataazikana kutali akaambo kambungano iimwi pesi “kujatikizya mbungano zyoonse.” (2 Kor. 11:23-28) Uli aabulwazi butasilikiki na buli kupa kuti utabotelwi? Pawulu wakali ‘amumvwa mumubili.’ Kulakonzeka kuti penzi eeli lyakali lyakuchiswa alubo wakali kuyanda kuti limane. (2 Kor. 12:7-10) Kuli nunga wamana manguzu na akaambo kakutamaninina kwako? Kuti kakuli boobo tawuli awulikke pe, Pawulu anguwe mbaakali kulimvwa chimwi chiindi. Pawulu wakazoosika aakwaamba majwi aakuti: “Maawe ndemucaangu” akaambo kakuti wakali kuzumanana kulwana aachibi nchakalaacho.—Rom. 7:21-24.
8. Niinzi chakagwasya Pawulu kuti alisimye kumapenzi ngaakalaawo?
8 Nikuba kuti Pawulu wakaswaanana aamapenzi aasiyene-siyene aakali kumumana manguzu pesi wakazumanana kubelekela Jehova. Niinzi chakamugwasya? Pawulu wakalizi kuti uli aachibi pesi wakali aalusyomo lusimide muchinunuzyo. Alubo wakalaazi majwi aaJesu aakuti: “Muntu uuli woonse uumusyoma [Jesu] atanyonyoonwi, pele abe abuumi butamani.” (Joh. 3:16; Rom. 6:23) Nichoonzyo kuti Pawulu wakali kusyoma muchinunuzyo. Wakali aachoonzyo chakuti Jehova ulabalekelela bantu bachita zibi zipati kuti bachincha.—Int. 86:5.
9. Twiiyaanzi kuzwa kumajwi aaPawulu aali muli Bagalatiya 2:20?
9 Pawulu wakali aalusyomo lwakuti Leza ulamuyanda nkaambo wakatuma Kristu kuti azoomufwide. (Bala Bagalatiya 2:20.) Pawulu wakaamba majwi aatondeezya kuti wakali aachoonzyo chakuti Leza ulamuyanda. Wakati: ‘Mwana wa Leza, wakandiyanda akulyaaba akaambo kandime.’ Pawulu taakayeeya kuti wakali muntu mubi loko zyakuti Leza taakali kukonzya kumuyanda. Alubo Pawulu wakayeezya maKristu bakuRoma kuti: “Notwakacili basizibi, Kristo wakatufwida.” (Rom. 5:8) Taakwe chintu chikonzya kukachizya Leza kuti atuyande.
10. Twiiyaanzi kuzwa kulugwalo lwa Baroma 8:38, 39?
10 Bala Baroma 8:38, 39. Pawulu wakali aachoonzyo chakuti luyando lwaLeza luli aanguzu nkaambo wakalemba kuti taakwe chintu chikonzya “kutwaandaanya kuluyando lwa Leza.” Pawulu wakalizi kuti Jehova wakatondeezya maIsrayeli moyo mulamfu. Alubo wakalizi kuti Leza wakamufwida luzyalo. Muli aamwi majwi Pawulu wakali kwaamba kuti, ‘Ikuti Jehova kali wakatuma Mwanaakwe kuti azoondifwide, tandeelede kuyeeya kuti tandiyandi pe.’—Rom. 8:32.
Chiyandikana kuli Leza nzintu nzuchita lino anzuyoochita kunembo kutali zintu zibi nzwaakachita chiindi (Langa fuka 11) *
11. Nkamboonzi Pawulu naakali aachoonzyo chakuti Jehova ulamuyanda nikuba kuti wakachita zintu zibi zilembedwe muli 1 Timoteyo 1:12-15?
11 Bala 1 Timoteyo 1:12-15. Kulakonzeka kuti chimwi chiindi Pawulu wakali kulisola akaambo kazintu zibi nzyaakali kuchita chiindi. Eezi nzizyo zyakapa kuti Pawulu aambe kuti ndime “ndiindide” kukuchita zibi. Pawulu katanayiya kasimpe wakali kupenzya maKristu, wakali kubikka bamwi mujele alubo wakazumizya kuti bamwi bajayigwe. (Mil. 26:10, 11) Yeeyela kuti Pawulu wakali kumvwa biyeni kuti waswaanana aamuKristu uuli aabazyali bakajayigwa akaambo kakwe. Pawulu wakali kulisola akaambo kazintu nzyaakachita pesi wakalizi kuti, kuti maanzi atika tachikonzyi pe kuyolwa. Pawulu wakali aachoonzyo chakuti Kristu wakamufwida eezi nzizyo zyakapa kuti alembe kuti: “Kwiinda muluzyalo lwa Leza ndili boobu mbondibede lino.” (1 Kor. 15:3, 10) Eezi zikuyiisyaanzi? Weelede kuba aachoonzyo chakuti Kristu wakakufwida alubo wakapa kuti ukonzye kuba aabweenzinyina aJehova. (Mil. 3:19) Chiyandikana kuli Leza nzintu nzuchita lino anzuyoochita kunembo kutali zintu zibi nzwaakachita chiindi kazitakwe ndaba kuti wakazichita kuli waba Kamboni waJehova na naakuti pe.—Is. 1:18.
12. Lugwalo lwa 1 Johane 3:19, 20, lutugwasya biyeni kuti twasaanguna kulimvwa katutagwasyi naakuti katuteeleli pe kuti bamwi batuyande?
12 Chimwi chiindi ulakonzya kuyeeya kuti, ‘Nikuba kuti Jesu wakafwa akaambo kazibi zyangu pesi teekwakali kweelela pe kuti andifwide.’ Niinzi chikonzya kupa kuti uyeeye oobu? Moyo wesu ulakonzya kutweena akupa kuti tubonaanga tatugwasyi pe naakuti tatweeleli pe kuyandwa. (Bala 1 Johane 3:19, 20.) Kuti twasaanguna kulimvwa oobu, tweelede kuyeeya kuti “Leza mupati kwiinda myoyo yesu.” Nikuba katubonaanga Jehova tatuyandi pe naakuti takonzyi kutulekelela pesi choonzyo nchakuti Jehova ulatuyanda alubo ulatulekelela. Nkinkaako, tweelede kubeleka changuzu kuti tuzumine kuti Jehova ulatuyanda. Kuti tukonzye kuchita oobo tweelede kubala Jwi lyaLeza chiindi choonse, tukombe kulinguwe chiindi choonse alubo tujane chiindi chakuba aamwi abakombima. Nkamboonzi nikuyandikana kuchita zintu eezi?
TUGWASIGWA BIYENI AKUBALA BBAYIBBELE, KUKOMBA AKUBA AAMWI ABAKOMBIMA?
13. Kubala Jwi lyaLeza kutugwasya biyeni? (Langa kabbokesi kati “ Mbubali Kugwasigwa aaJwi lyaLeza.”)
13 Bala Jwi lyaLeza buzuba abuzuba. Kubala Bbayibbele kuyookugwasya kuti ubone buntu bubotu mbwalaabo Jehova alubo kuyookugwasya kuti ube aachoonzyo chakuti Jehova ulakuyanda. Kuyeeyesesya atala azintu nzwaabala muJwi lyaLeza kuyookugwasya kuti uyeeye kabotu, ‘ululamike’ mizeezo yako amoyo wako. (2 Tim. 3:16) Umwi mwaalu uutegwa Kevin wakali kulimvwa katagwasyi pe wakaamba kuti: “Kubala akuyeeyesesya atala aIntembauzyo 103 kwakandigwasya kuti ndibambulule maboneno aangu akubona zintu nzyayeeya Jehova atala andime.” Eva waambwa kumasaangunino wakaamba kuti: “Kumamanino aabuzuba nga ndajana chiindi chakuyeeyesesya atala azintu nzyayanda Jehova. Kuchita oobo kundigwasya kuti ndibe aaluumuno akuti ndibe aalusyomo lusimide.”
14. Kukomba kutugwasya biyeni?
14 Komba chiindi choonse. (1 Tes. 5:17) Kuti kuyanda kuba mweenzinyina wawumwi muntu weelede kujana chiindi chakwaambuulaawe kumubuzya mbulimvwa. Mbutweelede kuchita kuti katuyanda kuba beenzinyina baJehova. Chiindi nitukomba kuli Jehova katumubuzya mbutulimvwa, nzituyeeya azintu zitukataazya, nga tulikutondeezya kuti tulamusyoma akuti tuli aachoonzyo chakuti ulatuyanda. (Int. 94:17-19; 1 Joh. 5:14, 15) Yua waambwa kumasaangunino wakaamba kuti: “Chiindi nindikomba nga ndabuzya Jehova zintu zyiingi kutali zintu zyandichitikila buzuba oobo luzutu. Nga ndamubuzya zintu zyoonse nzindiyeeya ambundilimvwa. Kuchita oobo, kundigwasya kuti ndibone Jehova kali Taata uuyanda bana bakwe kutali kumubona mbuli bbosi wakkampani.”—Langa kabbokesi kati “ Wakali Walibala Na?”
15. Jehova utondeezya biyeni kuti ulatuyanda?
15 Jana chiindi chakuba aamwi abakombinyokwe. Bakwesu abachizi nzipo zizwa kuli Jehova. (Jak. 1:17) Taateesu wakujulu utondeezya kuti ulatuyanda kwiinda mukutupa bakwesu abachizi batutondeezya luyando “ciindi coonse.” (Tus. 17:17) Mulugwalo lwakwe ndwaakalembela maKristu bakuKkolose, Pawulu wakalemba kuti bamwi maKristu ‘bakamuumbulizya kapati’ chiindi naakali kuyanda lugwasyo. (Kol. 4:10, 11) Nikuba Kristu Jesu anguwe wakali kuyanda kusungwaazigwa. Nkinkaako, wakalumba loko akaambo kakugwasigwa abeenzinyina abangelo.—Lk. 22:28, 43.
16. Bakwesu abachizi batugwasya biyeni kuti tube aabweenzinyina busimide aJehova?
16 Ulalutambula na lugwasyo luzwa kubakwesu abachizi bamumbungano? Kubuzya mukombinyokwe ngusyoma zintu zikukataazya tazyaambi kuti tusimide pe mubukombi. Pesi kuchita oobo kulakugwasya. Mvwa zyakaambwa aaJames waambwa kumasaangunino. Wakati: “Kumvwanana aamaKristu basimide mubukombi kundigwasya loko kuti ndaba aamizeezo iitali kabotu. Bakombima banditondeezya moyo mulamfu kwiinda mukundiswiilila alubo nga bandibuzya kuti balandiyanda alubo bandigwasya kuti ndibone kuti Jehova ulandiyanda akuti ulaandaba andime.” Nichoonzyo kuti kuba aabweenzinyina busimide abakwesu abachizi kulayandikana.
KKALA KULI MULUYANDO LWAJEHOVA
17-18. Ngwani nguyelede kuswiilila alubo nkamboonzi?
17 Saatani uyanda kuti tuleke kuchita zintu zibotu alubo uyanda kuti tubonaanga Jehova tatuyandi pe akuti tubonaanga tatweeleli pe kuti atufutule. Pesi mbuli mbutwayiya ooku nkubeja.
18 Jehova ulakuyanda. Kuti twamuswiilila ‘tuyoozumanana kukkala muluyando’ lwakwe mbuli mbaakachita Jesu. (Joh. 15:10) Utamuswiilili pe Saatani nikuba kuswiilila zyaambwa amoyo wako. Pesi swiilila Jehova ooyo uubona zintu zibotu mulindiswe. Baachoonzyo chakuti “Jehova ulabakkomanina bantu bakwe” kuswaanizya anduwe.
LWIIMBO 141 Buumi Ncipego
^ par 5 Bamwi bakwesu abachizi kulabayumina kuzumina kuti Jehova ulabayanda. Muchiiyo eechi, tulayiya kuti nkamboonzi nitweelede kuba aachoonzyo chakuti Jehova ulamuyanda muntu umwi awumwi. Alubo tulayiya atala azintu nzitweelede kuchita kuti katutakwe choonzyo chakuti Jehova ulatuyanda.
^ par 2 Amwi mazina akachinchwa.
^ par 67 BUPANDULUZI BWACHIFANIKISYO: Pawulu katanaba muKristu wakali kupenzya maKristu alubo bamwi wakali kubatola mujele. Pesi naakayiya kasimpe akuziba zintu nzyaakachitilwa aJesu wakachincha mpawo wakasaanguna kusungwaazya bakombinyina. Kulakonzeka kuti maKristu mbaakali kusungwaazya bakali babbululu babantu mbaakali kupenzya.
