Mbungano yeelede kubona lukwatano lwachiindi kuti lwakamana chiindi mwaalumi naakakwata umwi mwanakazi alubo yeelede kubona lukwatano lupya kuti luli mumulawu. Kuti tumvwisisisye kuti nkamboonzi nitwaamba oobo, atulange-lange nzyaakaamba Jesu atala akulekana akukwata naakuti kukwatwa lubo.

Mbuli mbukulembedwe mulugwalo lwa Matayo 19:9, Jesu wakaamba kaambo kazwa muMagwalo kapa kuti bantu bakwetene balekane. Wakaamba kuti: “Kufwumbwa uuleka mukaintu wakwe ikutali akaambo kabwaamu, akukwata umbi, wacita bumambe.” Kuzwa kumajwi aaJesu twiiya kuti (1) bwaamu mbubo abulikke bwaambwa muMagwalo bupa kuti bantu bakwetene balekane alubo (2) mwaalumi uuleka mwanakazi wakwe kakutakwe kaambo kazwa muMagwalo akukwata uumbi ngawachita bumambe. *

Jesu wakali kwaamba kuti mwaalumi uunga wachita bwaamu mpawo waleka mwanakazi wakwe, Magwalo alamuzumizya na kuti akwate lubo? Teembubo pe. Kuti mwaalumi wachita bumambe, muntu ngwakwetenaawe nguwe uusala kuti amulekelele na naakuti pe. Pesi kuti wakaka kumulekelela, balakonzya kulekana zili mumulawu alubo boonse ngabaangunuka kukwata naakuti kukwatwa lubo kuti muchado wabo wadyunkulwa.

Kuli lumwi lubazu, mwanakazi ulakonzya kusala kumulekelela mulumaakwe kayanda kuti bakkale kabakwetene. Pesi niinzi zikonzya kuchitika kuti mwaalumi uunga wachita bumambe wakaka kulekelelwa aamwanakazi wakwe mpawo wasala kuti balekane? Akaambo kakuti mwanakazi ooyo ulilipedelede kumulekelela mulumaakwe alubo uyanda kuti bakkale kabakwetene, mwaalumi ooyo ngataangunukide pe kuti akwate lubo kweendelana aMagwalo. Kuti mwaalumi ooyu wazumanana kuchita zintu munzila iikazyania aaMagwalo mpawo wakwata mwanakazi uumbi alubo kakutakwe kaambo kazwa muMagwalo, mwaalumi ooyu ngawachita bumambe lubo. Alubo kulapangwa kkomiti yakubeteka mumbungano kuti ilange-lange nkani eeyo.—1 Kor. 5:1, 2; 6:9, 10.

Kuti mwaalumi uutazumizigwi aaMagwalo kuti akwate lubo pesi wakwata, bamumbungano balubona biyeni lukwatano lwakwe lwachiindi alukwatano lupya? Kweendelana anzilyaamba Bbayibbele, lukwatano lwachiindi nga mpuluchili na? Mwanakazi nga uchikonzya na kusala kuti amulekelele mulumaakwe naakuti atamulekeleli? Bamumbungano bayoobona lukwatano lwakwe lupya mbuli kuti ulikuchita bwaamu na amwanakazi ooyo ngwaakakwata?

Chiindi, bamumbungano bakali kubona lukwatano lupya mbuli kuti mwaalumi amwanakazi bali mulukwatano oolo balikuchita bumambe kuti mwanakazi wachiindi kachipona, katanakwatwa naakuti katakwe mpaakachita bwaamu. Jesu taakwe naakali kwaamba atala amuntu wachitilwa bumambe chiindi naakali kwaambuula atala ankani yakulekana akukwata naakuti kukwatwa lubo. Pesi wakaamba kuti mwaalumi uunga waleka  mwanakazi wakwe kakutakwe kaambo kazwa muMagwalo akukwata lubo, ngawachita bumambe. Nkinkaako, kuti mwaalumi waleka mwanakazi kakutakwe kaambo kazwa muMagwalo akukwata lubo mbuli mbakaamba Jesu, nga kuli mbuli kuti wachita bumambe alubo eezi zipa kuti lukwatano lwachiindi lumane.

Kuti mwaalumi waleka mwanakazi wakwe mpawo wakwata uumbi, mwanakazi ooyu wachiindi uusyomeka ngatakuchiyandikani kuti akumbile kuti babambulule kuchitila kuti bakwatane lubo. Alubo nikuba kuti mwanakazi ooyu wachiindi wafwa, wakwatwa lubo naakuti wachita bwaamu, eezi tazichinchi nzila bamumbungano njibalubonaayo lukwatano lupya lwamwaalumi ooyo. *

Muchiimo nchitwabona aajulu, mwaalumi wakachita bumambe mpawo balekana amwanakazi wakwe. Pesi niinzi zikonzya kuchitika kuti mwaalumi taachita bumambe pe mpawo wasala kuti balekane amwanakazi wakwe akukwata uumbi? Alubo niinzi zikonzya kuchitika kuti mwaalumi taachita bwaamu kabatanalekana amwanakazi wakwe pesi wazoochita bwaamu kabali balekana mpawo wakwata uumbi mwanakazi kakuli mwanakazi wakwe wachiindi wakalilipedelede kumulekelela? Muzikozyano zyoonse eezi, kulekana akukwata naakuti kukwatwa lubo nkuchita bumambe alubo kulakonzya kupa kuti lukwatano lwachiindi lumane. Mwaalumi kuti waleka mwanakazi wakwe mpawo wakwata uumbi lukwatano lupya ngalwaba mumulawu. Ngaziyakulinda yamu November 15, 1979 aapeji 32 yakaamba kuti: “Mbukunga mwaalumi ooyo ngawanjila mulukwatano lupya tayelede kuchita zintu zitape kuti lukwatano oolo lumane akuti abweede kumwanakazi wakwe wachiindi akaambo kakuti lukwatano lwabo lwachiindi lwakamana akaambo kakuti bakalekana, kwakachitika bumambe alubo bakakwata naakuti kukwatwa lubo.”

Kumvwisisisya ooku kupya takweelede kupa kuti maKristu babonaanga lukwatano teechintu chisalala pe kunembo lyaJehova akuti bumambe teechibi chipati pe. Kuti mwaalumi waleka mwanakazi wakwe kakutakwe kaambo kazwa muMagwalo mpawo wakwata umwi mwanakazi Magwalo katamuzumizyi pe kuti achite oobo, baalu balapanga kkomiti yakubeteka akaambo kakuti unooli wachita bumambe. (Kuti mwanakazi ooyo mupya kali muKristu anguwe ulabetekwa nkaambo unooli wachita bumambe.) Nikuba kuti lukwatano lupya nga luli mumulawu, pesi mwaalumi tazijani pe zilongezyo mumbungano kwaminyaka myiingi kusikila bantu kabatachimunyemenede pe akaambo kazintu nzyaakachita naakuti bantu babusaanguna lubo kumulemeka. Baalu kabatanamupa lubo zilongezyo beelede kulanga-langa chiimo chamwanakazi ngwaakakwete chiindi akuti kuchili bana baniini na mbaakasiya.—Malk. 2:14-16.

Kuziba mapenzi aaba akaambo kakulekana kakutakwe kaambo kazwa muMagwalo akukwata naakuti kukwatwa lubo, kweelede kupa kuti maKristu babone lukwatano kachili chintu chisalala mbuli mbalubona Jehova.—Muk. 5:4, 5; Heb. 13:4.