1. Davida wakatyeni atala akulichesya kwaJehova?

NICHOONZYO na kuti Jehova ulalichesya? Iiyi ulalichesya. Davida wakati: “Yebo ulandipa ntobo yako yalufwutuko, Alimwi kulicesya kwako kulandisumpula.” (2 Sam. 22:36; Int. 18:35) Kulakonzeka kuti Davida wakali kuyeeya chiindi mupolofita Samuyeli naakasika kulimbabo kuti azoomunanike kuti azoobe Mwaami wamaIsrayeli. Nikuba kuti Davida nguwe wakali keela akati kabana balombe bali 8, Jehova wakasala nguwe kuti azoobe Mwaami mubusena bwaMwaami Sawulu.—1 Sam. 16:1, 10-13.

2. Tulalanga-langaanzi muchiiyo eechi?

² Davida wakali kunoozuminana amajwi aakaambwa asintembawuzyo atala aJehova aakuti: “Ulooka kuti alange julu anyika, nguubusya muntu uupengede kuzwa mulusuko. Nguusumpula mucete . . . kuti amupe kukkala ankumekume.” (Int. 113:6-8) Muchiiyo eechi tulalanga-langa zyiiyo ziyandikana loko atala akulibombya kwiinda mukubona Jehova mbaabutondeezya buntu oobu. Alubo tulabona kuti twiiyaanzi atala akulibombya kuzwa kuMwaami Sawulu, mupolofita Daniyele aJesu.

3. Jehova ubajata biyeni bakombi bakwe alubo eezi zitondeezyaanzi?

³ Jehova utondeezya kuti ulalichesya kwiinda munzila njabajataayo bakombi bakwe balaachibi. Tatambuli bukombi bwesu luzutu pesi utubona katuli beenzinyina. (Int. 25:14) Kuti tukonzye kuba beenzinyina, Jehova wakabweza ntaamu kwiinda mukutupa Mwaanakwe kuti azoofwide zibi zyesu. Eezi zitondeezya kuti Jehova ulaaluzyalo alweetelelo lupati.

4. Jehova wakatupaanzi alubo nkamboonzi?

 ⁴ Atubone imwi nzila Jehova mbatondeezya kuti ulalibombya. Mbukunga Jehova mulengi, wakali kukonzya kutulenga katutakonzyi kulisalila nzila njituyanda kupona aayo. Pesi teembaakachita pe. Wakatulenga muchikozyano chakwe akutupa lwaangunuko lwakulisalila. Nikuba kuti tuli baniini loko kuti twalikozyanisya anguwe, uyanda kuti tulisalile kumukomba amoyo woonse akaambo kakuti tulamuyanda akuti tukubona kakugwasya kumuswiilila. (Dt. 10:12; Is. 48:17, 18) Tulamulumba Jehova akaambo kakulichesya nkwachita.

5. Jehova utuyiisya biyeni kuti tube bantu balibombya? (Langa chifanikisyo chili achivumbyo.)

⁵ Jehova utuyiisya kuti tube bantu balibombya kwiinda munzila njatujataayo. Jehova ulaabusongo kwiinda zilenge zyoonse. Nikuba boobo ulabaswiilila bamwi chiindi nibamubuzya nzibayeeya. Muchikozyano, Jehova wakazumizya mwaanakwe kuti amugwasye kulenga zintu zyoonse. (Tus. 8:27-30; Kol. 1:15, 16) Alubo nikuba kuti Jehova ngusinguzuzyoonse nga wapa bamwi imwi milimu kuti bachite. Muchikozyano, wakasala Jesu kuti azoobe Mwaami waBwaami bwakwe alubo wakapa bantu bali 144 000 mulimu wakuti bazooyendelezye aJesu. (Lk. 12:32) Jehova wakayiisya Jesu kuti abe Mwaami aMupayizi Mupati. (Heb. 5:8, 9) Alubo uyiisya bantu batazooyendelezye aJesu mbubayoochita mulimu wabo pesi tanoobatobeleli pe kuti abone koonse nkibachita. Pesi ulabasyoma kuti bayoowuchita mbuli mbayanda.—Ciy. 5:10.

6-7. Twiiyaanzi kuzwa kuli Jehova atala akupa bamwi milimu?

⁶ Kuti Jehova uutayandi kugwasigwa abamwi kapa bamwi milimu kuti bachite, zilaantanganana kuti andiswe tweelede kuchita oobo. Muchikozyano, uuli mutwe wampuli na  naakuti uli mwaalu mumbungano? Tobelezya chikozyano chaJehova kwiinda mukupa bamwi milimu mpawo utatobeleli pe kuti ubone koonse nkibachita. Kuti watobelezya Jehova tukapi kuti bamwi bachite mulimu luzutu pe pesi uyoopa kuti bayiye akuti babe achibindi. (Is. 41:10) Nzyiiyoonzi zimwi nzibayiya kuzwa kuli Jehova bantu bapedwe milimu yakuchita?

⁷ Bbayibbele litondeezya kuti Jehova ulabazumizya bangelo kuti baambe nzibayeeya. (1 Bam. 22:19-22) Nibazyali, nga mulachitobelezya biyeni chikozyano chaJehova? Kuti kamuyanda kuchita chimwi chintu, amumvwe nzibayeeya bana banu mpawo mutobele nzibaamba kuti kazili kabotu.

8. Jehova wakatondeezya biyeni kuti uuli amoyo mulamfu kuli Abrahamu aSara?

⁸ Jehova utondeezya kuti ulalibombya kwiinda mukuba amoyo mulamfu. Muchikozyano, utondeezya moyo mulamfu chiindi bakombi bakwe nibabuzya chabulemu kuti nkamboonzi nasala kuchita chimwi chintu. Wakaswiilila Abrahamu naakali kwaambuula mbaakali kulimvwa atala akunyonyoonwa kwaSodoma aGomora. (Matl. 18:22-33) Alubo yeeya atala anzila Jehova njaakamujataayo Sara mwanakazi waAbrahamu. Jehova taakanyema pe chiindi Sara naakaseka naakamvwa chisyomezyo chaJehova chakuti uzooba amwana kali wachembaala. (Matl. 18:10-14) Pesi Jehova wakamulemeka Sara.

9. Bazyali abaalu bayiyaanzi kuzwa kuchikozyano chaJehova?

⁹ Nibazyali abaalu mwiiyaanzi kuzwa kuchikozyano chaJehova? Muchita biyeni kuti bamumpuli naakuti bamumbungano basola atala akusala nkumwachita? Muchijaanina kubalulamika na? Naakuti muleezya kuswiilila nzibayeeya? Mpuli ambungano zilabotelwa kuti bazyali abaalu batobelezya chikozyano chaJehova. Twabona kuti nga tulachitobelezya biyeni chikozyano chaJehova chakulibombya. Lino atubone kuti twiiyaanzi atala akuziba mputweelede kugolela kuzwa kuzikozyano zyabantu balembedwe muJwi lyaLeza.

10. Jehova uzibelesya biyeni zikozyano zyabamwi bantu kuti atuyiisye?

¹⁰ Mbukunga ‘Muyiisi wesu Mupati,’ Jehova utupede zikozyano zituyiisya zijanika muJwi lyakwe Bbayibbele. (Is. 30:20, 21) Tulakonzya kujana zyiiyo kuti twabala atala abantu baambidwe muBbayibbele bakatondeezya buntu bubotezya Jehova kuswaanizya akulibombya. Alubo kuli zyiiyo nzitwiiya kuzwa kubantu bakakachilwa kutondeezya buntu bubotu.—Int. 37:37; 1 Kor. 10:11.

11. Chikozyano chaSawulu chituyiisyaanzi?

¹¹ Atulange-lange zyakachitikila Mwaami Sawulu. Kumasaangunino, wakali kulibombya alubo wakalizi mpakeelede kugolela zyakuti kwakamuyumina kutambula mulimu wakuba mwaami. (1 Sam. 9:21; 10:20-22) Pesi mukuya kwachiindi Sawulu wakasaanguna kulisumpula. Wakasaanguna kutondeezya buntu oobu bubi naakaba mwaami. Ali chimwi chiindi wakakachilwa kuba amoyo mulamfu naakali kulindila mupolofita Samiyele. Sawulu wakakachilwa kusyoma kuti Jehova wakali kuyoogwasya maIsrayeli zyakuti wakawumpa chipayizyo nikuba kuti taakali kuzumizigwa pe. Eezi zyakapa kuti Jehova amukake mpawo mukuya kwachiindi wakamunyeya bwaami. (1 Sam. 13:8-14) Chikozyano eechi chituyiisya kuti tatweelede kulisumpula pe.

12. Daniyele wakatondeezya biyeni kuti ulalibombya?

¹² Kusiyana achikozyano chibi chaSawulu, lino atulange-lange chikozyano chibotu chamupolofita Daniyele. Kwabuumi bwakwe boonse, Daniyele wakali kulibombya akuziba mpayelede  kugolela alubo wakali kusyoma Jehova kuti amuzulwide. Muchikozyano, chiindi Jehova naakamubelesya kuti apandulule zyakalotwa aNebbukkadinezari, Daniyele taakazumina kupegwa bulemu. Pesi wakatondeezya kuti ulalibombya kwiinda mukupa Jehova bulemu. (Dan. 2:26-28) Twiiyaanzi? Kuti katupa nkani zinywisya maanzi kubakwesu abachizi naakuti katuzwidilila mumulimu wakukambawuka, tweelede kuyeeya kuti bulemu boonse bweelede kupegwa Jehova. Tweelede kuzumina kuti teetwali kunookonzya pe kuzichita zintu eezyo kaansinga teetwagwasigwa aJehova. (Flp. 4:13) Kuti twachita oobo, nga tuli kutobelezya chikozyano chaJesu chibotu. Wakachita biyeni Jesu?

13. Lugwalo lwa Johane 5:19, 30 lutondeezya biyeni kuti Jesu wakali kulibombya?

¹³ Nikuba kuti wakali Mwana waLeza uumaninide, Jesu wakazumizya Jehova kuti amuzulwide. (Bala Johane 5:19, 30.) Taakwe nakeezya kuti ayelane aWisi wakujulu. Lugwalo lwa Bafilipi 2:6 lwaamba kuti: “Kunyina pe naakayeeya kubweza bweendelezi, nkokuti kutegwa kabeelene a Leza.” Jesu wakali kulibombya, kazi mpagolela alubo wakali kulemeka Wisi.

14. Jesu wakachita biyeni chiindi naakakumbilwa chintu nchaakatalikwe cheelelo chakuchita?

¹⁴ Yeeya kuti Jesu wakabasandula biyeni basikwiiya bakwe, Jakkobo aJohane kabalaamwi abanyina chiindi nibakakumbila kuti abape chilongezyo nchaakatalikwe cheelelo chakubapa. Taakawaya-waya pe kubabuzya kuti Wisi wakujulu nguwe alikke uusala muntu weelede kukkala kulumwensi akululyo lwakwe muBwaami. (Mt. 20:20-23) Jesu wakatondeezya kuti wakalaazi mpakeelede kugolela. Wakali kulibombya. Taakwe naakachita zintu nzyaakatali kuzumizigwa aJehova. (Joh. 12:49) Nga tulachitobelezya biyeni chikozyano chaJesu chibotu?

15-16. Nga tulaabelesya biyeni malayilile aajanika muli 1 Bakorinto 4:6?

¹⁵ Tutobelezya chikozyano chaJesu chakuziba mputweelede kugolela kwiinda mukuswiilila malayilile aajanika muli 1 Bakorinto 4:6. Tubuzigwa kuti: “Mutaindilili zintu zilembedwe.” Nkinkaako kuti umwi muntu wakumbila lugwasyo atala ayimwi nkani, tatweelede kusumpula mizeezo yesu naakuti kufwambaana kusandula katutayeeyede pe. Pesi tweelede kubelesya Bbayibbele naakuti mabbuku  eesu aapandulula Bbayibbele. Kuti twachita oobo, nga tulikutondeezya kuti tulaazi mputugolela. Kulibombya kuyoopa kuti tupe bulemu kuli Singuzuzyoonse uutupa ‘milawu iiluleme.’—Ciy. 15:3, 4.

¹⁶ Kuyungizya aakulemeka Jehova, kuli tumwi twaambo tupa kuti tulibombye. Atubone kuti kulibombya akuziba mputugolela nga kulatugwasya biyeni kuti tubotelwe akuti tumvwanane aabamwi.

17. Nkamboonzi bantu balibombya abazi mpubagolela nibabotelwa?

¹⁷ Kulibombya akuziba mputugolela kupa kuti tubotelwe. Nkamboonzi nitwaamba oobo? Kuti katuzi kuti kuli zintu nzitutakonzyi kuchita, zipa kuti tubotelwe akuti tubalumbe bamwi kuti batugwasya. Muchikozyano, yeeya atala azyakachitika chiindi Jesu naakaponia basichipele bali kkumi. Mwaalumi uumwi nguwe wakabweeda akulumba Jesu akaambo kakuponesegwa bulwazi buyoosya mbwaakatali kukonzya pe kulisilika. Mwaalumi ooyu uulibombya wakalumba akaambo kalugwasyo ndwaakapegwa alubo wakatembawula Jehova.—Lk. 17:11-19.

18. Kweendelana alugwalo lwa Baroma 12:10, kulibombya akuziba mputugolela kutugwasya biyeni kuti tumvwanane aabamwi?

¹⁸ Bantu balichesya alubo bazi aakugolela kulabawubila kumvwanana aabamwi. Nkamboonzi? Bantu balibombya balabasyoma bamwi alubo balazumina kuti bamwi bali aabuntu bubotu. Alubo balabotelwa kuti bamwi bantu bazwidilila mumulimu ngubapegwa alubo balabalumba akubalemeka.—Bala Baroma 12:10.

19. Nkamboonzi nituteelede kulisumpula?

¹⁹ Kusiyana abantu balibombya, bantu balisumpula kulabayumina kulumbayizya bamwi  nkaambo babonaanga mbabo abalikke beelela kulumbayizigwa. Bayandisya kulyeezyanisya aabamwi alubo bali amuuya wakuzundaana. Muchiindi chakuti bayiisye bamwi akubapa mulimu, bantu balisumpula bayeeya kuti mbabo beelede kuchita mulimu ooyo nkaambo babonaanga bamwi tabakoowuchita kabotu pe. Muntu uulisumpula ulibona kaayandikana kwiinda bamwi alubo ulaabbivwe. (Gal. 5:26) Bantu bali boobu nkuyumu kuti babe abantu mbibamvwanana aabo kwachiindi chilamfu. Kuti twabona kuti tulaapenzi lyakulisumpula, tweelede kukomba kuli Jehova amoyo woonse katukumbila kuti atugwasye ‘kuchincha mizeezo yesu’ kuchitila kuti michito eeyi mibi itasimpi miyanda mumyoyo yesu.—Rom. 12:2.

20. Nkamboonzi nitweelede kulibombya akuziba aakugolela?

²⁰ Tulamulumba Jehova akaambo kachikozyano chakwe chibotu chakulibombya. Twabona mbalibombya munzila njabajataayo bakombi bakwe alubo tuyanda kumutobelezya. Kuyungizya waawo, tuyanda kutobelezya zikozyano zibotu zyabantu bakalibombya balembedwe muBbayibbele alubo bakaba aachilongezyo chakweenda aLeza. Atuzumanane kupa Jehova bulemu alulemeko lumweelede. (Ciy. 4:11) Kuti twachita oobo, tuyooyelela kweenda aTaateesu uuli kujulu uuyanda bantu balichesya alubo bazi aakugolela.