Kuzwa chiindi twakaambide kuti luzubo lwaMesiya lwakali kuyoozwa kubana bataanzi. Twakali kubelesya lugwalo lwaBaHebrayo 12:16. Lugwalo oolu lutondeezya kuti Esawu ‘taakali kubikkila maanu kuzintu zisalala’ akuti ‘wakawuzya bupati bwakwe bwakuzyalwa kumutiba omwe wachilyo [kuli Jakkobo].’ Chiindi Jakkobo naakawula ‘bupati bwakuzyalwa’ kubonekaanga zyakali kutondeezya kuti Mesiya uyoozwa kuluzubo lwakwe.​—Mt. 1:2, 16; Lk. 3:23, 34.

Nikuba boobo, Magwalo atondeezya kuti teekwakali kuyandikana kuti muntu abe mwana mutaanzi kuchitila abe muluzubo lwaMesiya. Atulange-lange bumwi bumboni:

Kubana baJakkobo (Israyeli), mwanaakwe mutaanzi ngwaakazyalilwa aLeya wakali kutegwa Rubbeni. Mwana waJakkobo wabili ngwaakazyalilwa aRakkele wakali kutegwa Josefa. Chiindi Rubbeni naakaba amulandu wakutalilemeka, bupati bwakapegwa Josefa. (Matl. 29:31-35; 30:22-25; 35:22-26; 49:22-26; 1 Mak. 5:1, 2) Nikuba boobo luzubo lwaMesiya teelwakali kuzwa kuli Rubbeni naa Josefa. Pesi lwakazwa kuli Juda, mwana wane wakazyalwa aLeya.​—Matl. 49:10.

 Lugwalo lwaMatayo 1:5 lwaambuula atala amasyanyinakulu aMesiya aane. Boonse bakali bana bataanzi. Bbowazi wakazyala Obbedi, alubo Obbedi wakazyala Jese.​—Rut. 4:17, 20-22; 1 Mak. 2:10-12.

Davida mwana waJese taakali mwana mutaanzi. Wakali keela kubana bali 8. Pesi Mesiya wakazwa kuluzubo lwaDavida. (1 Sam. 16:10, 11; 17:12; Mt. 1:5, 6) Alubo wakali kutobela muluzubo oolu nguSolomoni nikuba kuti taakali mwana mutaanzi waDavida.​—2 Sam. 3:2-5.

Nikuba boobo, eezi tazyaambi kuti kuba mwana mutaanzi kwakali kulangilwa aansi. Mwana mutaanzi wakali kulemekwa mumpuli alubo wakali kuba simulyazina wawisi. Nguwe wakali kukona lubono lwiingi.​—Matl. 43:33; Dt. 21:17; Jos. 17:1.

Pesi bupati bwakali kukonzya kupegwa umwi mumpuli. Abrahamu wakabwezela Ishmayeli bupati akubupa Izaka. (Matl. 21:14-21; 22:2) Alubo twabona kuti bupati bwakatolelwa Rubbeni akupegwa Josefa.

Lino atululange-lange lubo lugwalo lwaBaHebrayo 12:16, lwaamba kuti: “Kutabi mwaamu naba muntu uutaluzi uuli mbuli Esawu, uwakauzya bupati bwakwe bwakuzyalwa kumutiba omwe wacilyo.” Majwi aaya atondeezyaanzi?

Mulugwalo oolu, mwaapostolo Pawulu taakali kwaamba atala aluzubo lwaMesiya. Wakali wabasungwaazya kale maKristu kuti ‘bazumanane kweenda munzila iiluleme.’ Eezi zyakali kuyoopa kuti ‘kutabi naba omwe muntu utakachilwe kujana luzyalo lwaLeza,’ pesi eezi zyakali kukonzya kuchitika kuti bachita bwaamu. (Heb. 12:12-16) Kuti bachita oobu bakali kuyooba mbuli Esawu. ‘Taakali kubikkila maanu kuzintu zisalala’ alubo wakachita zintu zitaluleme.

Esawu wakapona chiindi alubo wakali achilongezyo chakutuula zipayizyo. (Matl. 8:20, 21; 12:7, 8; Job. 1:4, 5) Pesi akaambo kakuti wakali amiyeeyo itali kabotu Esawu wakasweekelwa azilongezyo eezi akaambo kamusinza wanyangu. Amwi wakali kuyanda kuti mapenzi akaambidwe kuti ayoochitikila bana baAbrahamu atachitiki pe kulinguwe. (Matl. 15:13) Esawu wakachita zintu zitaluleme alubo taakabikkila maanu kuzintu zisalala kwiinda mukukwata banakazi babili bakatali kukomba Leza, eezi zyakabachisa bazyali bakwe. (Matl. 26:34, 35) Wakali siyene aJakkobo nkaambo Jakkobo wakakwata mwanakazi uyoowa Leza!​—Matl. 28:6, 7; 29:10-12, 18.

Kujana twatyeni atala aluzubo lwakali kuyoozwa Mesiya? Chimwi chiindi luzubo oolu lwakali kuzwa kubana bataanzi pesi chimwi chiindi teembukwakabede. MaJuda bakazibona eezi akuzitambula kuti Kristu wakali kuyoozwa kuli Davida, keela kaJese.​—Mt. 22:42.