Akaambo kakuti mukayintu wangu Danièle wakali kufwambaana kuyeeya wakandiluma kutwi kati, “Utalikataazyi kufoonena mapulisa, basika kale!” Kuzwa waawo, kusule lyesu katuli kunembo aahotela kwakasika moota. Nikwakiinda kayindi kaniini, ime amukayintu wangu twakasungwa. Ndilamulumba mukayintu wangu akaambo kakundiluma kutwi, nkaambo ndakakonzya kupa umwi mukwesu mapepa aakali atala amulimu wesu.

Nitwakali kutolwa kunkambe yamapulisa, ndakayeeya mbuchili chilongezyo chakuba amukayintu uutayoowi alubo uusimide mubukombi. Eechi nchiimwi chazyiindi zyiingi nitwakali kubelekelaamwi amukayintu wangu. Amuleke ndimupandulwide kuti niinzi chakapede kuti tuswaye zisi ooko mulimu wesu wakukambawuka nkuwakali kukasigwa.

Ndakazyalilwa mumpuli yakasimide muchikombelo chaKkatolika mu1930 mukadolopo kaniini kali kuCroix muFrance nkwiili kunyika. Mviki amviki twakali kwiinka kuMass katuli mpuli alubo ndeende wakali aachuuno muchikombelo. Nikuba boobo, nindakali aafwiifwi kuba aaminyaka iili 14, kuli zimwi zyakachitika zyakapa kuti ndibone kuti chikombelo eechi chakali chakuupa-wupa aameso.

Muchiindi chankondo yabili, chisi chaFrance chakazwide basilumamba bakuGermany. Munkambawuko yakwe, mupayizi wesu chiindi chiingi wakali kutusungwaazya kusumpula mfulumende yaVichy yamaNazi. Nzyaakali kwaamba teezyakali kutunoneezya pe. Mbuuli mbubakali kuchita bantu biingi muFrance, twakali kuswiilizya manyuzi chakusisikizya kulediyo yaBBC aakali kupupululwa atala abasilumamba bamuzisi zyakali kubelekelaamwi. Kuzwa waawo, mupayizi wakachincha bbazu ndyaakali kusumpula mpawo muSeptember 1944, wakalumbayizya basilumamba bazisi zyakali kubelekelaamwi bakali kulwana Germany. Nzyaakachita mupayizi zyakandigambya. Zyakapa kuti bapayizi nditabasyomi pe.

Mbuyakamana biyo nkondo, ndeende wakatusiya. Muchizi wangu mupati wakali wakwatwa kale, nkinkaako ndakeelede kukkala abaama. Ndakajana mulimu wakali kufolwa mali iilikabotu. Bbosi wangu abana bakwe bakali kunjila chikombelo chaKkatolika. Nikuba kuti ndakali kulangilila kunoobeleka kabotu mukkampani eeyi pesi kwakali sunko kunembo.

Muchizi wangu mupati Simone wakali waba Kamboni, wakatuswaya mu1953. Wakabelesya Bbayibbele kutupandulwida njiisyo zyakubeja zyachikombelo  chaKkatolika zili atala anjiisyo yabbibi lyamulilo, yakuti Leza uli muzipanzi zitatu ayakuti kuli chintu chisyaala kachipona muntu naafwa. Kumasaangunino ndakamukazya kanditi taakali kubelesya Bbayibbele lyachiKkatolika pe pesi mukuya kwachiindi ndakazoobona kuti nzyaakali kwaamba nisimpe. Mukuya kwachiindi wakazoondeetela mamagazini aNgaziyakulinda aachiindi ngindakali kubala mansiku kandili mung’anda. Ndakabona kuti aaka kakali kasimpe pesi ndakali kuyoowa kubuzya bantu kuti ndili Kamboni nkaambo zyakali kunoopa kuti ndimaninwe mulimu.

Kwamyeezi miche yakatobela, ndakayinkilila kunembo kandibala Bbayibbele amamagazini aNgaziyakulinda andikke. Mpawo ndakazooyinka kuNg’anda yaBwaami. Luyando ndubakanditondeezya mumbungano lwakandisika aamoyo. Ndakayiya Bbayibbele kwamyeezi iili 6, kandigwasigwa amukwesu wakali aaluzibo, mpawo ndakabbabbatizigwa muSeptember 1954. Nikwakayinda chiindi chifwiifwi, ndakabotelwa kubona baama amuchizi wangu muniini kababa Bakamboni.

Ndilaamawuse kuti baama bakatusiya kakusyeede mviki ziche kuti ndikanjile muswaangano wabbooma wazisi zyoonse wamu1958 wakali kuNew York. Nindakaboola kumuunzi teendakachilikwe mukuli pe mumpuli, nkinkaako ndakasiya mulimu ngundakali kubeleka akutalika kupayona. Kuzwa waawo, ndakatalika kuyandana aamuchizi wakali payona musungu, wakazooba mukayintu wangu muMay 1959.

Danièle wakatalika mulimu wachiindi choonse kumyuunzi yakuBrittany, kwakali kule loko akulimbabo. Taakeelede kuyoowa pe kuti akonzye kukambawukila bantu bakali kunjila chikombelo chachiKkatolika alubo wakali kweenda aanchinga kuya kubusena oobo. Danièle wakali kuubona kuti mulimu wakukambawuka weelede kuchitwa chakufwambaana mbuuli ndime nkaambo toonse twakali kubonaanga mamanino abaafwiifwi. (Mt. 25:13) Kulipeda kwakwe kwakatugwasya kuti tulisimye mumulimu wachiindi choonse.

Twakanjila mumulimu wakweendeenda nikwakiinda mazuba mache katuchadide. Twakali kupona buumi buuba. Mbungano njitwakasaanguna kuswaya, yakali aabasikupupulula bali 14 alubo teebakalikwe zintu zyiingi pe kuti batutambule. Nkinkaako, twakali koona apulatifomu muNg’anda yaBwaami. Nikuba kuti teetwakazizibide pe pesi teetwakali kuminwa pe!

Nikuba kuti twakali azyiingi zyakuchita pesi mukayintu wangu wakazumina kupona kweendelana amulimu wesu wakweendeenda. Chiindi chiingi, wakali kundilinda kali mukamoota kesu nindakali kuchita miswaangano yabaalu yakatabambidwe pesi taakali kundinyemena pe. Nikuba kuti twakabeleka minyaka iibili luzutu mumulimu wakweendeenda pesi twakayiya mbukuyandikana kubantu bakwetene kwaambuula kabatasisilani zili mumoyo akubelekelaamwi.​—Muk. 4:9.

Mu1962, twakatambwa kuti tukanjile kkilasi yachi37 kuchikolo chaGiliyadi kwamyeezi iili 10 kuBrooklyn, New York. Aakati kabasichikolo bali 100, kwakali mpuli zili 13, nkinkaako twakajana chilongezyo chakunjila kkilasi eeyo. Ndichiyeeya mbundakali  kubotelwa kuba abakwesu basimide mubukombi mbuuli Frederick Franz, Ulysses Glass, aAlexander H. Macmillan.

Nitwakali kuchikolo, twakali kusungwaazigwa kuti katulangisisya nzitubona. Chimwi chiindi muMugibelo sikati nitwakali kuchayizya, zimwi nzitwakali kwiiya zyakali kuswaanizya kuyoobona dolopo lyaNew York. Twakalizi kuti muMuvulo twakeelede kuyoosandula mibuzyo iili atala anzitwakabona. Nitwakali kubweeda kung’anda muMugibelo goko, twakali kuza twakatala pesi mukwesu waaBbeteli wakali kutusindikila wakali kutubuzya mibuzyo yakwiindulula kuti tuyeeye twaambo tupati twakali kuyootugwasya nitwakali kuyoolemba misunko. Umwi Mugibelo sikati twakazyunguluka dolopo lyoonse. Twakaswaya bumwi busena mputwakayiya atala abbwe lya-meteor alya-meteorite. KuAmerican Museum of Natural History, twakayiya misyobo iisiyene-siyene yantale. Nitwakabweeda kuBbeteli, mukwesu wakali kututondeezya busena wakabuzya kuti, “Nguuli musiyano uuliwo aakati kabbwe lya-meteor alya-meteorite?” Akaambo kakuti wakali wakatala, mukayintu wangu wakasandula kuti, “Meteorite ili aamenyo malamfu!”

Twakagamba nitwakabuzigwa kuti tukabelekele kumutabi wakuFrance alubo twakabeleka kwaminyaka yiinda ku53. Mu1976 ndakasalwa kuba mulangizi waKkomiti yaMutabi alubo ndakapegwa mulimu wakuswaya zisi zili kuAfrica akuMiddle East, ooko mulimu wesu nkuwakali kukasigwa. Eezi zyakapa kuti tuye kuGabon ooko nkutwakaakuchitikilwa zintu nzindaamba kumatalikilo. Kwaamba choonzyo, ndakali kulimvwa kanditeeleli pe kuchita milimu eeyi. Ndilamulumba mukayintu wangu akundigwasya nkwaakachita kwakapa kuti ndikonzye kubeleka milimu njindakalaayo.

Kuzwa kumatalikilo, twakali kukuyanda kukkala aaBbeteli. Danièle wakayiya Chikuwa kakusyeede myeezi iili 5 kuti tuye kuchikolo chaGiliyadi, wakazooba musanduluzi uuli aaluzibo. Kubelekela kuBbeteli kwakali kutubotezya loko alubo kuliswaanizya ambungano kwakayungizya kubotelwa kwesu. Ndichiyeeyede nitwakali kukambawuka akangolo kuParis goko aDanièle katukatede pesi twakali kubotelwa nkaambo twakachitisya zyiiyo zyaBbayibbele zizwidilila katulaamwi. Zilawusisya kuti mukuya kwachiindi, buumi bwaDanièle bwakachincha zyakuti taakachili kukonzya pe kubeleka mbuuli mbaakali kuyanda.

Mu1993, mukayintu wangu Danièle wakaba aabulwazi bwakkensa yaankolo. Mbaakali kusilikwa kwakali kuyumu nkaambo kwakali kuswaanizya ku-opaletwa akusilikwa kakubelesegwa minsamu iijaya tuzunda twakkensa. Nikwakayinda minyaka iili 15, wakazooba aabumbi bulwazi bwakkensa bwakali anguzu kwiinda bwakusaanguna. Nikuba boobo, wakali kuuyandisya mulimu wakusandulula, nkinkaako, wakazoowubeleka lubo nakazoolimvwa kuti wasima mbichaani.

Nikuba kuti Danièle wakali kuchiswa, taakwe nitwakaba amuzeezo wakuzwa aaBbeteli. Nikuba boobo, kuchiswa kawubeleka kuBbeteli kweeta buyumu-yumu, kapati kuti bamwi kabatazi kuti ulikuchiswa zili biyeni. (Tus. 14:13) Nikuba chiindi Danièle naakali aaminyaka yakuma70, busyu bwakwe akuba aluzyalo teekwakali kutondeezya pe kuti ulachiswa. Taakali kulilanga lwakwe luzutu pe. Pesi wakali kuyandisya kugwasya bamwi. Wakalizi kuti kuswiilila bamwi kulakonzya kubagwasya. (Tus. 17:17) Danièle wakabelesya  zyakamuchitikila mubuumi kuti agwasye bachizi biingi kuti batayoowi bulwazi bwakkensa.

Alubo twakajana buyumu-yumu bwakutakonzya kuchita zimwi zintu. Danièle naakazookachilwa kubeleka mumulimu wachiindi choonse, wakali kundigwasya muzintu zisiyene-siyene. Wakandigwasya muzintu zyiingi kuti ndikonzye kubeleka kandili mulangizi waKkomiti yaMutabi kwaminyaka iili 37. Muchikozyano, wakali kujika zyasikati alubo twakali kujana chiindi chakulyookezya aamwi buzuba abuzuba.​—Tus. 18:22.

Danièle wakachili kukuyanda kupona. Pesi wakazooba aakkensa kachitatu. Eezi zyakatumana manguzu. Nzila zyabusilisi nzyaakali kujana zyakali kumumana manguzu zyakuti chimwi chiindi wakali kukachilwa kweenda. Ndakakataazikana loko mumoyo, mukayintu wangu wakali musanduluzi uuli aaluzibo naakali kukachilwa kwaamba nzyaakali kuyanda kwaamba.

Nikuba kuti twakali kukataazikana pesi twakazumanana kukomba katuli aachoonzyo chakuti Jehova taakwe naakali kuyoolekela kuti tukataazikane kwiinda manguzu eesu. (1 Kor. 10:13) Alubo twakali kweezya kutambula lugwasyo Jehova ndwaakali kutupa kabelesya Jwi lyakwe, minsamu njitwakali kujana aaBbeteli alugwasyo ndutwakali kujana kumpuli yaaBbeteli iili aaluyando.

Twakali kukomba kuli Jehova kuti atugwasye kusala busilisi mbutwakali kuyoobelesya. Chimwi chiindi, twakali kukachilwa kuti tulachita biyeni. Dokotela wakali waba aaminyaka iili 23 kasilika Danièle, chimwi chiindi wakali kukachilwa kupandulula kuti nkamboonzi Danièle naakatali kufwambaana kujana manguzu naazwaakusilikwa. Taakali kwaamba pe kuti tuchite biyeni. Twakali kulimvwaanga tuli aatulikke, katutazi kuti niinzi chitachitike. Kuzwa waawo, umwi dokotela uusilika bulwazi bwakkensa wakazumina kusilika Danièle. Eezi zyakabaanga Jehova watupa nzila yakuchija kukataazikana kwesu.

Twakayiya kulwana penzi lyakukataazikana lyeendelana aabuzuba oobo. Mbuuli mbakaamba Jesu kuti: ‘Buzuba bumwi abumwi bulijisi mapenzi aabo.’ (Mt. 6:34) Kuba aamaboneno aali kabotu akukkala katuseka-seka kwakatugwasya. Muchikozyano, Danièle naakakkala myeezi iibili katasilikwi, wakandibuzya majwi aatobela kumwi kalikumwemwetela, “Ulizi, taakwe buzuba mbundayinaamvwa kabotu pe!” (Tus. 17:22) Nikuba kuti wakali kuchiswa pesi wakali kuyandisya kwiimba nyimbo mpya zyaBwaami ajwi lili aajulu.

Maboneno aakwe aalikabotu akandigwasya kuti ndilwane penzi lyakukachilwa kuchita zimwi zintu. Kwaamba choonzyo, kwaminyaka iili 57 katukwetene, Danièle wakandigwasya muzintu zyiingi. Taakali kuyanda kundiyiisya nikuba mbaajikwa mayi. Pesi bulwazi bwakwe nibwakakomena, ndakayiya kusanzya zilongo, kuwacha akujika. Nikuba kuti ndakajaya ma-water glass miingi pesi ndakali kukuyanda kumuchitila zintu zimubotezya. *

Kuti ndayeeya zyakachitika musule, kundiyeezya zyiiyo nzindakajana zili atala azintu nzitutakonzyi kuchita akaambo kakuchiswa akuchembaala. Chakusaanguna, tatweelede kuzilangilaansi zintu zibotu nzibachita bantu mbitukwetenaabo. Tweelede kuchibelesya kabotu chiindi nituchili aamanguzu aakugwasya bantu mbitukwetenaabo. (Muk. 9:9) Chabili, tatweelede kukataazikana zyiindilide azintu ziniini nkaambo zilakonzya kupa kuti tutaboni zilongezyo nzitujana buzuba abuzuba.​—Tus. 15:15.

Kuti ndayeeya buumi bwesu katuchili mumulimu wachiindi choonse, ndakabona kuti Jehova wakatulongezya munzila njindakatali kuyeeyela pe. Ndilimvwa mbuuli sintembawuzyo wakaamba kuti: “Jehova wandeendelezya kabotu.”​—Int. 116:7, NW.