Muli 2 BaKorinto 12:2, 3, Pawulu wakaambuula atala awumwi mwaalumi “wakakwempelwa kujulu lyatatu.” Mwaalumi ooyo wakalini? Kalembela mbungano yakuKkorinto, Pawulu wakaamba kuti Leza wakali kumubelesya kali mwaapostolo. (2 Kor. 11:5, 23) Mpawo wakaambuula makani “aazilengano aziyubunuzyo zyaMwami.” Pawulu taakabikkilizya bakombinyina pe mumakani aaya. Nkinkaako, zili aantanganana kuti wakali kulyaamba kuti ngunguwe muntu wakabona zilengaano aziyubunuzyo.​—2 Kor. 12:1, 5.

Zili aantanganana kuti Pawulu nguwe “wakakwempelwa kujulu lyatatu” akuti nguwe “wakakwempelwa ku-Paradaiso.” (2 Kor. 12:2-4) Wakabelesya bbala lyakuti ‘ziyubunuzyo’ kutondeezya kuti wakayubunwidwa zintu ziyoochitika kunembo.

Niinzi Pawulu nchaakabona chitegwa ‘julu lyatatu’?

MuBbayibbele, bbala lyakuti “julu” lilakonzya kwaamba kujulu. (Matl. 11:4; 27:28; Mt. 6:26) Pesi bbala eeli lyakuti “julu” lilakonzya kubelesegwa kwaamba zimwi zintu. Chimwi chiindi, lilakonzya kwaamba bweendelezi bwabantu. (Dan. 4:20-22) Alubo lilakonzya kwaamba bweendelezi bwakujulu, mbuuli Bwaami bwaLeza.​—Ciy. 21:1.

Pawulu wakabona ‘julu lyatatu.’ Aambaanzi majwi aaya? Chiindi chiingi, Bbayibbele lyiindulula kaambo kwaziindi zitatu kuti likasimye, akutondeezya mbukali kapati naakuti mbukali aanguzu. (Is. 6:3; Ezk. 21:27; Ciy. 4:8) Kuboneka kuti Pawulu nakaamba atala ‘ajulu lyatatu,’ wakali kwaamba bweendelezi bubotu loko, busumpukide bwaBwaami bwaMesiya kalaamwi abeendelezinyina bali 144 000. (Langa bbuku litegwa Insight on the Scriptures, Vol. 1, peji 1059, 1062.) Mbuuli mbaakalemba mwaapostolo Petro, tulindila “ijulu ipya” kweendelana achisyomezyo chaLeza.​—2 Pet. 3:13.

Niinzi ‘paradayizi’ Pawulu njakaamba?

Bbala lyakuti “paradayizi” lilakonzya kwaamba zintu zyiingi: (1) Mbukunga nguwakali muunzi wabantu kumatalikilo, bbala lyakuti ‘paradayizi’ lilakonzya kwaamba Paradayizi iinooli aanyika njitulangilila. (2) Lilakonzya kwaamba paradayizi yamubukombi naakuti luumuno bakombi baLeza ndubayooba aalo munyika mpya. (3) Kuyungizya waawo, lilakonzya kwaamba chiimo chibotu chili kujulu, ‘Paradayizi yaLeza,’ mbuuli mbukwaambidwe muli Ciyubunuzyo 2:7.​—Langa Ngaziyakulinda yaChikuwa yamuJuly 15, 2015, peji 8, fuka 8.

Zili aantanganana kuti Pawulu wakali kwaamba nzila eezi zitatu mbuuli mbukulembedwe muli 2 BaKorinto 12:4 chiindi naakali kupandulula zyakamuchitikila.

Kufwiinsya:

‘Julu lyatatu’ lyaambidwe muli 2 BaKorinto 12:2 Mbwaami bwaMesiya kalaamwi abeendelezinyina bali 144 000, chaamba kuti “julu pya.”​—2 Pet. 3:13.

Lyaambwa kuti ‘ndijulu lyatatu’ nkaambo bweendelezi oobu mbubotu loko akuti bulisumpukide.

“Paradayizi” Pawulu ‘njaakakweempelwa’ muli njiyo muchilengaano ilakonzya kwaamba (1) Paradayizi iinooli aanyika njitulangilila, (2) paradayizi yamubukombi naakuti luumuno bakombi baLeza ndubayooba aalo munyika mpya lunooli lwiingi kwiinda ndutulaalo lino alubo (3) ‘paradayizi yaLeza,’ iili kujulu iiyobaamwi anyika mpya.

Kuyungizya waawo, nyika mpya iyooswaanizya majulu mapya anyika mpya. Buyooba bubambe bupya buswaanizya mfulumende yaBwaami bwakujulu abantu banookomba Jehova kabali muparadayizi aanyika.