1, 2. Nkamboonzi nikuyandikana kuswiilila Mulengi wesu chiindi nitusala nzituzoochita mubuumi? (Langa chifanikisyo chili kumatalikilo aachiiyo.)

KUTI kuchikula, ulakonzya kujana malayilile miingi aakonzya kuzookugwasya mubuumi bwakunembo. Bayiisi, basyaabusongo mukulaya abamwi, balakonzya kuti bakakusungwaazya kuti ube aalwiiyo luli aajulu akubeleka mulimu uufolwa mali nyingi. Nikuba boobo, Jehova ukupa malayilile aasiyene ayaaya. Kwaamba choonzyo, uyanda kuti ubeleke changuzu kuchikolo kuchitila kuti uzookonzye kulibonena wazoomaninsya chikolo. (Kol. 3:23) Nikuba chiindi nulikusala nzutazoobikke mubusena bwakusaanguna mubuumi, ukusungwaazya kuti ubelesye malayilile aayendelana amakanze aakwe akuyanda kwakwe, mbutulikupona muchiindi eechi chamamanino.​—Mt. 24:14.

² Utalubi kuti, Jehova ulazibona zyoonse nkaambo ulizi ziyoochitikila bantu bali munyika alubo ulizi kuti mamanino aayo ayoosika lili. (Is. 46:10; Mt. 24:3, 36) Alubo utuzi kabotu nkaambo ulizizi zintu zipa kuti tukkutisikane akuti tubotelwe azintu zipa kuti tunyeme akuti tutabotelwi. Nkinkaako, nikuba  kuti malayilile aabantu abonekaanga alikabotu pesi kuti kaateendelani aJwi lyaLeza, tatukonzyi kwaawamba kuti mbusongo bwachoonzyo.​—Tus. 19:21.

3, 4. Niinzi chakachitika kuli Adamu aEva kuswaanizya abana babo nibakaswiilila malayilile mabi?

³ Malayilile mabi akatalika chiindi Saatani naakasaanguna kubeja. Sikupa malayilile uulisumpula wakabuzya Eva kuti balakonzya kubotelwa amulumaakwe kuti balisalila nzibayanda mubuumi. (Matl. 3:1-6) Kwaamba choonzyo, nzyaakaamba Saatani kwakali kuliyanda. Wakali kuyanda kuti Adamu aEva kuswaanizya abana babo bazoomulemeke akukomba nguwe kutali Jehova. Pesi kuli zintu zibotu na nzyaakabachitilide? Jehova nguwe wakabapede zintu zyoonse nzibakalaazyo, kuswaanizya amuunda mubotu wakali muunzi wabo amibili iimaninide, yakali kupa kuti bakonzye kupona kukabe kutamani.

⁴ Zilawusisya kuti Adamu aEva teebakamuswiilila pe Leza alubo bakalyaanzaania anguwe. Tulizi kuti mpindu zyakaba mapenzi luzutu. Mukuya kwachiindi, bakazoopusama akufwa, mbuuli maluba aadyunkulwa aamusiko. Abana babo baswaana mapenzi aayetwa aachibi. (Rom. 5:12) Nikuba mazubaano, bamwi bantu basala kutalemeka Leza. Bayanda kupona mbuuli mbubayanda. (Ef. 2:1-3) Mpindu nzibajana zitondeezya kuti ‘taakwe busongo bukonzya kuzwidilila mukukazya Jehova.’—Tus. 21:30.

5. Niinzi Jehova nchalangilila kubantu alubo nzyalangilila zibagwasya biyeni?

⁵ Nikuba boobo, Jehova wakalizi kuti bamwi bantu kuswaanizya abachikula bakali kuyoomuyanduula akumubelekela. (Int. 103:17, 18; 110:3) Ulabayanda bantu bali boobo. Ulibona kuli aakati kabantu bali boobo na? Kuti kakuli boobo, zili aantanganana kuti ulikujana “zintu zibotu” zizwa kuli Leza zipa kuti ubotelwe. (Bala Intembauzyo 103:5, NW; Tus. 10:22) Mbuuli mbututabone, “zintu zibotu” eezi ziswaanizya chakulya chiingi chamubukombi, beenzinyokwe balikabotu, zipeekezyo zyamubukombi alwaangunuko lwachoonzyo.

6. Nkamboonzi nweelede kuyanda chakulya chamubukombi alubo Jehova utupa biyeni chakulya eecho?

⁶ Kusiyana abanyama, ulaachilongezyo chakuyandisya chakulya chamubukombi nchitupegwa aaMulengi wesu. (Mt. 4:4) Kuti wamuswiilila uyoojana luzibo, busongo akubotelwa. Jesu wakati: “Balikkomene aabo bazyi kuti bayandika kusololelwa a Leza.” (Mt. 5:3, NW) Leza ukuzulwida kabelesya Jwi lyakwe achakulya chiingi chamubukombi nchitubambilwa ‘amuzike musyomesi uuchenjede.’ (Mt. 24:45) Nisimpe kuti tujana chakulya chiingi chamubukombi!​—Is. 65:13, 14.

7. Mbuubuli bubotu mbujana akaambo kakuyandisya chakulya chamubukombi nchitupegwa aaLeza?

⁷ Chakulya chamubukombi Leza nchatupa chiyoopa kuti ube aabusongo amaanu, ziyookukwabilila muzintu zyiingi. (Bala Tusimpi 2:10-14.) Muchikozyano, busongo amaanu ziyookujula meso kuti ubone njiisyo zyakubeja mbuuli yakuti taakwe Mulengi. Ziyookukwabilila kukubeja kwakuti kuba aamali akunota nzizyo zipa kuti muntu abotelwe. Alubo ziyookugwasya kuti ubone akutantamuka zisusi zibi amaponeno aatali kabotu. Zumanana kuyanduula busongo buzwa kuli Leza akuba amaanu alubo uzibone kazili zintu ziyandikana loko! Mbukunga ulikujana buntu oobu buyandikana, uyoolibonena kuti Jehova ulakuyanda akuti uyanda kuti upone buumi bulikabotu.​—Int. 34:8, NW; Is. 48:17, 18.

8. Nkamboonzi nweelede kuswena aafwiifwi aLeza alubo kuchita oobo kuyookugwasya biyeni kunembo?

 ⁸ Lino-lino nyika yaSaatani iyoonyonyoonwa alubo Jehova nguwe uuyootukwabilila. Kuchiindi eecho, tuyoolangilila kulinguwe kuti tukajane chakulya chabuzuba abuzuba. (Hab. 3:2, 12-19) Lino nchichiindi chakuti tuswene aafwiifwi aTaateesu uulikujulu akuti tumusyome amoyo woonse. (2 Pet. 2:9) Kuti wachita oobo, taakwe nchuyooyoowa mbuuli sintembawuzyo Davida wakalemba kuti: ‘Ndibikkide Jehova kubusyu bwangu lyoonse, uli kululyo lwangu kuti nditazungaanisigwi.’​—Int. 16:8.

9. (a) Kweendelana amajwi aajanika muli Johane 6:44, niinzi Jehova nzyachita? (b) Niinzi chikubotezya nuswaana bamwi Bakamboni?

⁹ Jehova ukwela bantu mbabona kuti baleelela kuti babe mumpuli yakwe yabukombi alubo usala bantu bali amyoyo iibombede kuti baze mubukombi bwakasimpe. (Bala Johane 6:44.) Chiindi nusaanguna kubonana amuntu uutali mukasimpe, nga umuzi biyeni muntu ooyo? Kulakonzeka kuti umuzi zina lyakwe, mbaboneka azimwi ziche biyo. Pesi teembukubede pe chiindi nusaanguna kuswaana muntu uuzi Jehova alubo uumuyanda. Nikuba kuti muntu ooyo uli amaponeno asiyene aako, uzwa kuli chimwi chisi akuti ngwawumwi musyobo, unoozi zyiingi atala anguwe alakwe unoozi zyiingi atala anduwe.

10, 11. Nchiichili chilongezyo nchibalaacho bakombi baJehova alubo chitugwasya biyeni?

¹⁰ Muchikozyano, ulafwambaana kuziba ‘mulaka’ wawumwi, nkukuti “mwaambo uusalala” wakasimpe. (Zef. 3:9) Makani aaya apa kuti muzibe nzimusyoma atala aLeza, zyeelelo zyakulijata abulangilizi bwakunembo azimwi. Eezi nziizintu ziyandikana loko nzweelede kuziba atala amuntu nkaambo zipa kuti umusyome. Alubo zipa kuti mube bantu bamvwanana loko.

¹¹ Zili aantanganana kuti mbukunga uli mukombi waJehova, ulaabeenzinyokwe balikabotu bajanika nyika yoonse. Pesi biingi babo tunababona pe! Mpubali na bamwi bantu bali aachilongezyo chili boobu batali bakombi baJehova?

12. Nziizili zipeekezyo zyamubukombi nzweelede kulibikkila?

¹² Bala Mukambausi 11:9–12:1. Kuli zipeekezyo zyamubukombi na nzulikubelekela kuzuzikizya? Amwi ulikweezya kubala Bbayibbele buzuba abuzuba. Amwi ulikweezya kuyungizya luzibo lwako mukwaambuula amukuyiisya kabotu. Kufumbwa nzulikuchita, umvwa biyeni nulibona kuliikuzwidilila naakuti bamwi kabakulumbayizya? Nisimpe kuti ulabotelwa akubona kuti nzulikuchita zilaampindu mbotu. Nkinkaako, weelede kuzumanana kutobelezya Jesu nkaambo uliikubikka kuyanda kwaLeza mubusena bwakusaanguna.​—Int. 40:8; Tus. 27:11.

13. Niinzi chipa kuti kukomba Leza tukubone kakuyandikana kwiinda zipeekezyo zyanyika?

¹³ Kuti wasala kukomba Jehova kwiinda mukulibikkila zipeekezyo zyamubukombi, unooli wasala chintu chipa kuti ukkutisikane mubuumi. Mwaapostolo Pawulu wakalemba kuti: “Amukakatile, mutazungaani. Amupangike myoyo yanu lyoonse kumilimo ya-Mwami, nkaambo mulizi kuti milimo yanu yamu-Mwami tiikonzyi kuba yabuyo pe.” (1 Kor. 15:58) Nikuba kuti bantu balazwidilila nibalibikkila zipeekezyo zyanyika eeyi, ziswaanizya kuba aamali ampuwo pesi tabakkutisikani pe. (Lk. 9:25) Umwi muntu wakapona buumi buli boobu, Mwaami Solomoni.​—Rom. 15:4.

14. Nzyaakabona Solomoni zituyiisyaanzi atala akuyanda kulibotezya?

¹⁴ Solomoni mwaalumi wakanotede alubo wakalaamanguzu, wakalichitila nzyaakali kuyeeya mpawo wakati, ‘leka ndisole kukondwa ndibone bubotu bukonzya kuba.’ (Muk. 2:1-10) Wakayaka maanda, wakalima myuunda, wakapanga mabuwa aakulyookezezya alubo wakachita zyoonse nzyaakali kuyanda. Wakamvwa biyeni naakamaninsya milimu yakwe? Wakakkutisikana na? Nsandulo ilaantanganana. Solomoni wakaamba mbaakalimvwa. Wakati: “Nindakayeeya milimo yoonse yamaanza aangu, . . . ndakabona kuti zintu zyoonse nzyabuyo. Tazigwasyi pe, taakwe mpindu zijanika.” (Muk. 2:11) Makani aaya ayandikana loko kulindiswe! Uyoowaswiilila na?

15. Kweendelana amajwi aajanika muli Intembauzyo 32:8, nkamboonzi lusyomo niluyandikana alubo lutugwasya biyeni?

¹⁵ Jehova tayandi pe kuti wiiye zyiiyo munzila iichisa. Kuba aalusyomo kupa kuti uswiilile Leza alubo kuyookugwasya kuti ubikke kuyanda kwakwe mubusena bwakusaanguna mubuumi bwako. Kuba aalusyomo kulagwasya alubo tukalisoli pe. Nisimpe, Jehova takalulubi pe ‘luyando ndwaakatondeezya akaambo kazina lyakwe.’ (Heb. 6:10) Nkinkaako, beleka changuzu kuti usimye lusyomo lwako kuchitila kuti ulibonene kuti Taateesu uuli kujulu ulaandaba anduwe.​—Bala Intembauzyo 32:8.

16. Nkamboonzi lwaangunuko nitweelede kulubona kaluyandikana anitweelede kulubelesya chabusongo?

¹⁶ Pawulu wakalemba kuti: ‘Koonse nkuubede muuya waJehova kuli lwaangunuko.’ (2 Kor. 3:17) Nisimpe, Jehova uyandisya lwaangunuko alubo uyanda kuti ulubone mbuuli nguwe. Nikuba boobo, Leza uyanda kuti ube alwaangunuko akuti ulubelesye munzila yabusongo kuchitila kuti lukukwabilile. Kulakonzeka kuti kuli bamwi bachikula mbuzi beebela ponogilafu, batalijati kabotu, basaana misobano iinjizya mumapenzi, babelesya ma-drugs abanywa bukande munzila yiindilide. Kumasaangunino, bantu bachita michito eeyi balakonzya kubonekaanga balabotelwa. Pesi mpindu nzibajana zilakonzya kuba malwazi, kukachilwa kusiya michito mibi alufu. (Gal. 6: 7, 8) Nisimpe kuti ‘lwaangunuko’ lwabo teelwachoonzyo pe nkaambo lweeta mapenzi.​—Tit. 3:3.

17, 18. (a) Kuswiilila Leza kutwaangununa biyeni? (b) Lwaangunuko Adamu aEva ndubakalaalo kumatalikilo, lusiyene biyeni alwaangunuko bantu ndubalaalo mazubaano?

¹⁷ Muchikozyano, mbangane bantu bakachiswa akaambo kakutobelezya zyeelelo zyamuBbayibbele? Zili aantanganana kuti kuswiilila Jehova kupa kuti tutachiswi alubo kulatwaangununa. (Int. 19: 7-11) Kuyungizya waawo, kuti lwaangunuko ndulaalo walubelesya munzila yabusongo chiindi nusala kuswiilila milawu yaLeza iimaninide amalayilile aakwe, unooli ulikutondeezya Leza abazyali bako kuti uleelela kupegwa lumwi lwaangunuko. Makanze aaLeza ngakuti bakombi bakwe basyomeka babe aalwaangunuko lwachoonzyo. MuBbayibbele, lwaambwa kuti ‘ndwaangunuko lwabulemu bwabana baLeza.’​—Rom. 8:21.

¹⁸ Adamu aEva bakali alwaangunuko luli boobo. Njingane milawu Leza njaakabapede mumuunda waEdeni? Wakali uumwi luzutu. Teebakeelede kulya michelo yamunsamu uumwi. (Matl. 2:9, 17) Kujana twaamba kuti kubapa mulawu ooyu uumwi kwakali kubadyaaminina na? Peepe. Yezyanisya milawu myiingi loko iibikkwa aabantu njibatusungilizya kuti twiitobele.

19. Munzilaanzi mutulikuyiisigwa kuti tube bantu bali aalwaangunuko?

¹⁹ Jehova ubajata munzila iilikabotu bantu bakwe. Muchiindi chakuti atupe milawu myiingi iitamani, utuyiisya kalaamoyo mulamfu kuti tutobelezye mulawu wakwe waluyando. Uyanda kuti tupone kweendelana amalayilile aakwe akuti tutayandi zintu zibi. (Rom. 12:9) Nkambawuko yaJesu Yakuchilundu itondeezya Jehova mbatuyiisya nkaambo ipandulula zipa kuti muntu achite chibi. (Mt. 5:27, 28) Mbali Mwaami waBwaami bwaLeza, Kristu uyooyinkilila kunembo katuyiisya munyika mpya kuchitila kuti tukabe aamaboneno aali mbuuli aakwe atala abululami akuswiilila milawu yakwe. (Heb. 1:9, NW) Uyoopa kuti tukabe amibili amizeezo iimaninide. Yeeya mbukunoobede chiindi nitutachinoosunkwi kuti tuchite chibi akuswaana mapenzi ayetwa aachibi. Kuzwa waawo, uyoojana “bulemu” Jehova mbwaakakusyomezya.

20. (a) Jehova ulubelesya biyeni lwaangunuko lwakwe? (b) Chikugwasya biyeni chikozyano chaLeza?

²⁰ Lwaangunuko lwesu lunooli aampulugolela. Lunooyendelezegwa akuyanda Leza abantu boonse. Muli aamwi majwi, Jehova utubuzya kuti twiiye chikozyano chakwe. Nikuba kuti ulaalwaangunuko lutamani pesi usala kuti ayendelezegwe aaluyando muzintu zyoonse nzyachita kuswaanizya anzila mbatujata. (1 Joh. 4:7, 8) Zili aantanganana kuti tulakonzya kujana lwaangunuko lwachoonzyo kuti twatobelezya chikozyano chaLeza chaluyando.

21. (a) Davida wakalimvwa biyeni atala aJehova? (b) Tuyoolanga-langaanzi muchiiyo chitobela?

²¹ Ulazilumba na “zintu zibotu” Jehova nzyakupa ziswaanizya chakulya chiingi chamubukombi, beenzinyokwe balikabotu, zipeekezyo zyamubukombi alwaangunuko lwachoonzyo? (Int. 103:5, NW) Kuti kakuli boobo, makanze aako aayendelane ankombyo iijanika muli Intembauzyo 16:11 iiti: “Wandizibya inzila yabuumi; kubusyu bwako kulizwide bukondwi; kujanza lyako lyalulyo kulabotezya lyoonse.” Muchiiyo chitobela, tuyoolanga-langa lumwi lubono luzwa mujwi lyaLeza lujanika muli Intembauzyo 16. Lubono oolu luyootugwasya kubona zintu zipa kuti tukkutisikane mubuumi.