1. Nkamboonzi Jesu naakakozyanisya batobeli bakwe ambelele?

JESU wakakozyanisya bweenzinyina mbwakalaabo abatobeli bakwe akuzibana kuliwo aakati kamweembeli ambelele zyakwe. (Joh. 10:14) Chikozyano eechi chileelela. Mbelele zilimwizi mweembezi wazyo alubo zilaliswiilila jwi lyakwe. Umwi mwaalumi wakaswayide imwi ndawu wakabona kuti makani aaya ngachoonzyo. Wakaamba kuti: “Twakali kuyanda kuyoobweza zimwi mbelele mapikicha mpawo twakeezya kuzyiita kuti zisike aafwiifwi, pesi teezyakasika pe nkaambo tezyakaazi pe majwi eesu. Kuzwa waawo, kwakasika umwi mulombe muniini wakali kuzyeembela, wakazyiita mpawo zyakamutobela.”

2-3. (a) Batobeli baJesu nga balatondeezya biyeni kuti balaliswiilila jwi lyakwe? (b) Tulalanga-langaanzi muchiiyo eechi amuchiiyo chitobela?

² Zyakachitika kumwaalumi ooyu wakaswayide kuliimwi ndawu, zituyeezya majwi aaJesu ngakaamba atala ambelele zyakwe naakuti basikwiiya bakwe. Wakati: “Ziyooswiilila jwi lyangu.” (Joh. 10:16) Pesi nga tulamuswiilila biyeni Jesu kakuli lino ulikujulu? Nzila iiyandikana njitukonzya kutondeezya kuti tulaliswiilila jwi lyaSimaleleesu nkwiinda mukubelesya zintu nzyakayiisya mubuumi bwesu.​—Mt. 7:24, 25.

³ Muchiiyo eechi amuchiiyo chitobela, tuyoolanga-langa zimwi zintu Jesu nzyaakatuyiisya. Mbuli mbututabone, kuli zimwi zintu Jesu nzyaakatuyiisya kuti tweelede kuleka kuzichita alubo kuli zimwi nzyaakaamba kuti tweelede kuzichita. Muchiiyo eechi, tulalanga-langa zintu zibili mweembezi wesu mubotu nzyakatulayilila kuti tatweelede kuzichita.

4. Kweendelana alugwalo lwa Luka 12:29, niinzi chikonzya kupa kuti tulibilike?

⁴ Bala Luka 12:29. Jesu wakasungwaazya basikwiiya bakwe  kuti ‘baleke kulibilika lyoonse’ atala azintu zyakumubili. Tulizi kuti malayilile ngatupa Jesu atondeezya kuti ulaabusongo alubo alagwasya chiindi choonse. Tuli aachiyandisyo chakuyanda kwaabelesya pesi chimwi chiindi kulakonzya kutuyumina. Nkamboonzi?

5. Nkamboonzi bamwi nibakonzya kukataazikana azintu zyakumubili?

 ⁵ Bamwi balakonzya kukataazikana atala azintu zyakumubili ziswaanizya chakulya, zyakuzwaata aakukkala. Bamwi kunyika nkubakkala, bantu biingi balafwaba alubo kulakataazya kujana milimu. Kulakonzya kubayumina kuti bajane mali iikkwana kuti basanine mpuli zyabo. Amwi bamwi bakafwidwa aamuntu wakali kubasanina mpawo bakasyaala kabatachikwe muntu uubasanina. Kulakonzeka kuti bulwazi bwaCorona bwapa kuti bamwi bamaninwe milimu. (Muk. 9:11) Kuti kuli kuswaanana aazyiimo eezi naakuti abumwi buyumu-yumu buli boobu, niinzi chikonzya kukugwasya kuti uswiilile malayilile ngakaamba Jesu aakuti tuleke kukataazikana?

6. Niinzi zyakachitika kumwaapostolo Petro?

⁶ Aali chimwi chiindi mwaapostolo Petro abamwi baapostolo bakali mubwaato muLwizi lwaGalilaya chiindi nikwakali guwo pati mpawo bakabona Jesu kali kweenda aajulu aamaanzi. Petro wakati: “Mwami, ikuti naa nduwe ncobeni, kondaambila ndiboole kulinduwe kandeenda atala aamaanzi.” Jesu wakamubuzya kuti “koboola” mpawo Petro wakazwa mubwaato “akweenda atala aamaanzi kuya kuli Jesu.” Niinzi zyakazoochitika? “Naakabona guwo wakayoowa. Mpoonya naakatalika kubbila wakakwiila kuti: ‘Mwami, kondivwuna!’” Jesu wakatandabika luboko lwakwe akumuvuna. Petro wakali kunookonzya kweenda aajulu aamaanzi kaansinga wakazumanana kulanga kuli Jesu. Pesi Petro naakabona guwo wakayoowa  alubo wakazumbuuzya mpawo wakasaanguna kubbila.​—Mt. 14:24-31.

7. Twiiyaanzi kuzwa kuchikozyano chaPetro?

⁷ Twiiyaanzi kuzwa kuchikozyano chaPetro? Petro naakazwa mubwaato akweenda aajulu aamaanzi taakali kulangilila kuti guwo lyakali kuyoopa kuti ayoowe akuti wakali kuyoosaanguna kubbila mumaanzi. Wakali kuyanda kweenda aajulu aamaanzi kusikila akaswaanane aaSimalelaakwe. Pesi kakamuleya katabi. Mazubaano tatukonzyi pe kweenda aajulu aamaanzi pesi tuswaanana aazintu zisunka lusyomo lwesu. Kuti twaleka kusyoma Jehova akusyoma muzisyomezyo zyakwe, lusyomo lwesu lulasaanguna kucheya. Kufumbwa mapenzi ngitukonzya kuswaana mubuumi, tweelede kuba aachoonzyo chakuti Jehova ulakonzya kutugwasya. Nga tulazichita biyeni?

8. Niinzi zikonzya kutugwasya kuti tutakataazikani loko azintu zyakumubili?

⁸ Kuti tutakataazikani loko amapenzi ngituswaana tweelede kusyoma Jehova. Tutalubi kuti Jehova Taateesu siluyando utusyomezya kuti unootupa zintu zyakumubili kuti twabikka zintu zyamubukombi mubusena bwakusaanguna. (Mt. 6:32, 33) Tuli aabumboni bwakuti ulachizuzikizya chisyomezyo eechi. (Dt. 8:4, 15, 16; Ps. 37:25) Kuti Jehova kalangania bayuni amaluba, tulaachoonzyo chakuti uyootugwasya kuti tujane zyakulya azyakuzwaata. (Mt. 6:26-30; Flp. 4:6, 7) Mbuli bazyali mbubagwasya bana babo kuti bajane zintu zyakumubili akaambo kakuti balabayanda, mbukubede aTaateesu wakujulu ulatugwasya kuti tujane zintu zyakumubili akaambo kakuti ulatuyanda. Nisimpe, tulaachoonzyo chakuti Jehova unootulangania.

9. Wayiyaanzi kuzwa kuli zyakachitika kuli umwi mukwesu amwanakazi wakwe?

⁹ Atubone chikozyano chitondeezya kuti Jehova ulakonzya kutugwasya kuti tujane zintu zyakumubili. Umwi mukwesu amwanakazi wakwe bali mumulimu wachiindi choonse bakeenda kwachiindi chiinda ku-awa amoota yabo yakali yaba yachiindi kuti bakabweze bamwi bachizi bakali kukkala kundawu iikkala bantu bakachija kunyika zyabo kuti bayinkaabo kumiswaangano yambungano. Mukwesu wakaamba kuti: “Niyakamana miswaangano twakatamba bachizi aaba kuti tukalyaamwi kung’anda yesu. Pesi twakazoobona kuti teetwakalikwe chakulya pe chakubapa.” Niinzi zyakazoochitika? Mukwesu wakati: “Nitwakasika aang’anda twakajana kakuli masaka aabili aakali aachakulya aamulyango wang’anda yesu. Tatuzi pe kuti ngwani wakabikka masaka aayo. Jehova wakatulangania.” Nikwakayinda chiindi, moota yamukwesu ooyu yakafwa. Moota eeyo yakali kubagwasya mumulimu wakukambawuka pesi teebakalikwe mali pe yakuti ikalungisigwe. Nibakatola moota yabo kuti ikalangwe-langwe amakkanika, umwi mwaalumi wakasika mpawo wakabuzya kuti: “Ngwani ulaamoota eeyi?” Mukwesu wakasandula kuti njiyakwe alubo wakaamba kuti yakali kuyanda kulungisigwa. Mwaalumi ooyo wakasandula kuti: “Utakataazikani. Mwanakazi wangu uyanda moota ili boobu, iili aamubala nguyooyu. Nga ulayiwuzya aamaliinzi?” Mukwesu wakayiwuzya moota eeyo mpawo wakajana mali yakali kukkwana kuula moota iimbi. Mukwesu wakamaninsya aakwaamba kuti: “Tandikonzyi pe kupandulula mbutwakabotelwa mubuzuba oobo. Eezi teezyakalichitikila biya pe. Pesi nguJehova wakatugwasya.”

10. Lugwalo lwa Intembauzyo 37:5, lutusungwaazya biyeni kuti tutakataazikani azintu zyakumubili?

¹⁰ Kuti twaswiilila mweembezi mubotu akuleka kukataazikana zyiindilide atala azintu zyakumubili tulakonzya kuba aachoonzyo chakuti Jehova ulatulangania. (Bala Intembauzyo 37:5; 1 Pet. 5:7) Amuyeeye atala abuyumu-yumu bwaambwa  mufuka 5. Kuzwa chiindi,  amwi Jehova walikubelesya mutwe wampuli naakuti muntu ngutwali kubelekela kuti atugwasye kujana zintu zyakumubili. Kuti mutwe wampuli katachikonzyi pe kuchita oobo naakuti katuli twakamaninwa mulimu, Jehova unootulangania munzila zisiyene-siyene. Tulakonzya kutaziba kuti unoozichita biyeni pesi nchituzi nchakuti unootugwasya. Lino atubone chimwi chintu mweembezi mubotu nchatubuzya kuti tatweelede kuchichita.

11. Kweendelana alugwalo lwa Matayo 7:1, 2, Jesu wakati tuleke kuchitaanzi alubo nkamboonzi nikukonzya kutuyumina?

¹¹ Bala Matayo 7:1, 2. Jesu wakalizi kuti bantu batamaninide babikkila maanu kukulubizya kwabamwi. Eezi nzizyo zyakapa kuti aambe kuti: “Amuleke kubeteka.” Tulakonzya kubeleka changuzu kuti tutabeteki bakombima. Pesi kulakonzya kutuyumina akaambo kakuti tatumaninide pe. Niinzi nchitukonzya kuchita kuti twabona kuti tuli aapenzi lyakubeteka bamwi? Tweelede kuswiilila Jesu akubeleka changuzu kuti tuleke kubeteka bamwi.

12-13. Chikozyano chaJehova chitugwasya biyeni kuti tuleke kubeteka bamwi?

¹² Kuti twayeeyesesya atala achikozyano chaJehova, chilakonzya kutugwasya kuti tutabeteki bamwi. Jehova ubikkila maanu kuzintu zibotu nzibachita bantu. Tulazibona eezi kunzila njakamujataayo Mwaami Davida nikuba kuti wakachita zibi zipati. Muchikozyano, wakachita bwaamu aBati-seba alubo wakalayilila kuti mulumaakwe ajayigwe. (2 Sam. 11:2-4, 14, 15, 24) Eezi zyakamweetela mapenzi Davida kuswaanizya abamumpuli yakwe abamwi banakazi bakwe. (2 Sam. 12:10, 11) Alubo aali chimwi chiindi, Davida wakatondeezya kuti taakali kumusyoma pe Jehova kwiinda mukulayilila kuti kubalwe masoja aachilsrayeli katazumizidwe pe aJehova. Kulakonzeka kuti wakachita oobo akaambo kakuti wakali kulisumpula akaambo kakuvula kwamasoja aakwe. Niinzi zyakazoochitika? Malsrayeli basika ku70 000 bakafwa achilwazi.​—2 Sam. 24:1-4, 10-15.

¹³ Kaansinga wakali kukkala kulsrayeli aachiindi eecho walinoomubona biyeni Davida? Walinoyeeya kuti Jehova tayelede kumulekelela na? Jehova tembaakayeeya pe. Wakalanga kusyomeka nkwaakachita Davida kwabuumi bwakwe boonse akuti wakali kulisola azintu nzyaakachita. Eezi zyakapa kuti Jehova amulekelele Davida. Jehova wakalizi kuti Davida wakali kumuyanda alubo wakali kuyanda kuchita zintu zilikabotu. Tulamulumba Jehova nkaambo ubikkila maanu kuzintu zibotu nzituchita.​—1 Bam. 9:4; 1 Mak. 29:10, 17.

14. Niinzi chikonzya kugwasya maKristu kuti baleke kubeteka bamwi?

¹⁴ Kuti Jehova katabikkili maanu kukulubizya kwesu andiswe tulakonzya kutobelezya chikozyano chakwe kwiinda mukutabikkila maanu kukulubizya kwabakombima. Nkuuba kubikkila maanu kukulubizya kwabamwi akutalika kubasola. Muntu uutobelezya chikozyano chaJehova ubeleka kabotu abamwi nikuba kazi kulubizya kwabo. Kuti dayimondi kalitanagwisigwa doti lilakonzya kubonekaanga talibeleki pe pesi muntu uuchenjede ulizi kuti lilakonzya kubota kuti lyagwisigwa doti. Mbuli Jehova aJesu, tweelede kubona buntu bubotu mbubalaabo bamwi kutali kubona kulubizya kwabo.

15. Kubikkila maanu kuzyiimo zyabamwi nga kulatugwasya biyeni kuti tutababeteki?

¹⁵ Twabona kuti tweelede kulanga zintu zibotu nzibachita bamwi pesi niinzi zimwi zikonzya kutugwasya kuti tutababeteki? Yezya kumvwisisisya zyiimo zyabo. Atubone chikozyano chitobela. Limwi zuba Jesu kali kutempele wakabona mukamufu wakali kufwaba kali kubikka tukkobili tubili tutakwe  ambutubede pe muzibikkilo zyamali. Pesi Jesu taakwe naakayeeya kuti: “Nkamboonzi mukamufu ooyu naatabikka mali nyingi?” Jesu taakabikkila maanu kumali njaakagwisya mukamufu ooyu, pesi wakabikkila maanu kumakanze azyiimo zyakwe alubo wakamulumbayizya akaambo kakupa nkwaakachita.​—Lk. 21:1-4.

16. Wayiyaanzi kuzwa kuchikozyano chaVeronica?

¹⁶ Kuti tubone mbukuyandikana kumvwisisisya zyiimo zyabamwi atubone chikozyano chamuchizi uutegwa Veronica. Mumbungano njaakali kunjila mwakali muchizi wakali aamwana mulombe. Veronica wakaamba kuti: “Ndakali kubonaanga muchizi ooyu amwanaakwe teebakali kuchita kabotu muzintu zyabukombi. Akaambo kazeezi, ndakaba aamaboneno aatali kabotu atala ambabo. Pesi limwi zuba ndakazoozwaamwi amuchizi ooyu mumulimu wakukambawuka. Wakandibuzya atala abuyumu-yumu mbwaswaana bwakulangania mwanaakwe uuchiswa boongo. Mbukunga muchizi ooyu taakalikwe mulumi pe wakali kubeleka changuzu kuti ajane ziyandikana akuti bakkale kabali aabweenzinyina buli kabotu aJehova. Akaambo kachiimo eechi, aali chimwi chiindi wakali kusala kunjila miswaangano ayimwi mbungano.” Veronica wakazoomaninsya kwaamba kuti: “Teendakazi pe kuti muchizi ooyu wakali kuswaanana aabuyumu-yumu buli boobu. Lino ndaabumuyanda loko muchizi ooyu alubo ndilamulemeka akaambo kakubeleka changuzu nkwachita kuti abelekele Jehova.”

17. Lugwalo lwa Jakobo 2:8, lutusungwaazya kuti tuchiteenzi alubo nga tulazichita biyeni?

 ¹⁷ Niinzi nzitweelede kuchita kuti twabona kuti tulikubeteka mukombima? Tweelede kuyeeya kuti Bbayibbele litusungwaazya kuti tuyande bakombima. (Bala Jakobo 2:8.) Tweelede kukomba kuli Jehova kazizwa aansi aamoyo katumukumbila kuti atugwasye kuti tuleke kubeteka bamwi. Tulakonzya kuchita kweendelana anzitwakombela kwiinda mukubweza ntaamu yakuti tujane chiindi chakuba aamuntu ooyo. Eezi zilatugwasya kuti tumuzibe kabotu. Tulakonzya kumukumbila kuti tuzwaamwi mumulimu wakukambawuka naakuti kumutamba kuti tuzoolye aamwi. Kuti twamuziba kabotu muntu ooyo kulatuubila kuti tutobelezye chikozyano chaJehova aJesu kwiinda mukulanga zintu zibotu nzyachita. Alubo nga tulikuswiilila mulawu ngutwakapegwa aamweembezi mubotu wakuti tuleke kubeteka.

18. Nga tulatondeezya biyeni kuti tulaliswiilila jwi lyamweembezi wesu?

¹⁸ Mbuli mbelele mbuziswiilila jwi lyamweembezi wazyo mbukubede abatobeli baJesu, balaliswiilila jwi lyakwe. Kuti twabeleka changuzu kuti tutakataazikani azintu zyakumubili akuti tuleke kubeteka bamwi, Jehova aJesu bayootulongezya. Toonse atuzumanane kuswiilila jwi lyamweembezi wesu mubotu kazitakwe ndaba kuti tuli ‘katanga kaniini’ na naakuti tuliba “mbelele zimbi.” (Lk. 12:32; Joh. 10:11, 14, 16) Muchiiyo chitobela, tuyoobona zintu zibili Jesu nzyaakabuzya batobeli bakwe kuti bazichite.