Mwakaamvwisisisya na makani aaNgaziyakulinda zyakiinda? Kujana mwayisandula biyeni mibuzyo iitobela?

Lugwalo lwa Jakobo 5:11 lutupa choonzyo chanzi chiindi nilwaamba kuti “Jehova ulaalubomba kapati aluse”?

Akaambo kakuti Jehova uli aaluse ulilibambilide kutulekelela. Lugwalo lwa Jakobo 5:11 lutugwasya kubona kuti Jehova ulatuyanda alubo ulilibambilide kutugwasya. Tulakonzya kutobelezya chikozyano chakwe.​—w21.01, p. 21.

Nkamboonzi Jehova naakapa bamwi mulimu wakuti bazulwide?

Wakachita oobo akaambo kakuti uli aaluyando. Mabambe aaya apa kuti mumpuli yakwe mube luumuno akuti zintu zyeende kabotu. Muntu woonse uuli mumpuli uuswiilila mabambe aaya ulizi kuti ngwani weelede kusala zyakuchita akuti ngwani weelede kubelesya zintu zyasalwa.​—w21.02, p. 3.

MuKristu weelede kuchenjelelaanzi chiindi nabelesya nzila zisumpukide zyakusendelana mameseji?

Kuti muntu wasala kubelesya nzila eezi, weelede kusala bantu balikabotu mbatanowambuulaabo. Pesi kuchita oobo nkuyumu kuti wasala kujoyina magroup aali aabantu biingi. (1 Tim. 5:13) Alubo kuli mapenzi aakonzya kuba kuti muntu waamba makani ngatakwe choonzyo pe atala angawo akuti wabelesya mweenya wakuzibana aabakombinyina kayili nzila yakuti ajane mali.​—w21.03, p. 31.

Ntuutuli tumwi twaambo twakapa kuti Leza azumizye Jesu kuti apenzegwe akuti afwe?

Kakusaanguna, Jesu wakeelede kugankaminwa aachisamu chakupenzezya kuti aangunune maJuda bakali batukwa. (Gal. 3:10, 13) Kachibili, Jehova wakali kuyanda kuyiisya Jesu mulimu mupati ngwaakali kuyanda kuzoochita kali Mupayizi Mupati. Alubo kachitatu, kusyomeka nkwaakachita Jesu kusikila kulufu kwakali kutondeezya kuti bantu balakonzya kusyomeka kuli Leza nikuba kabali mumapenzi. (Job. 1:9-11)​—w21.04, pp. 16-17.

Niinzi nzukonzya kuchita kuti ukambawukile bantu batajaniki pe mumaanda?

Ulakonzya kuyanduula bantu aabo chiindi nibajanika mumaandaabo. Ulakonzya kukambawukila mundawu zisiyene-siyene. Alubo ulakonzya kubelesya nzila zyakukambawuka zisiyene-siyene mbuli kulemba magwalo.​—w21.05, pp. 15-16.

Mwaapostolo Pawulu wakali kwambaanzi chiindi naakaamba kuti: “Kwiinda mumulawo ndakafwa kumulawo”? (Gal. 2:19)

Mulawu waMozesi wakapa kuti zibi zyabantu zilibonye akuzulwida malsrayeli kusikila kuli Kristu. (Gal. 3:19, 24) Eezi zyakapa kuti Pawulu atambule Kristu. Naakachita oobo Pawulu ‘wakafwa kumulawo,’ taakachili kweendelezegwa aamulawu pe.​—w21.06, p. 31.

Niinzi Jehova nzyalikuchita zitondeezya kuti ulikulisimya?

Jehova ulikulisimya kukusampawulwa kwazina lyakwe, kukazigwa kwabweendelezi bwakwe, kupapila kwabamwi bana bakwe, kumanwa aaSaatani, kupenzegwa kwabakombi bakwe, kufwidwa aabakombi bakwe, kuvula kwamapenzi akunyonyoona nyika nkubalikuchita bantu.​—w21.07, pp. 9-12.

Josefa wakatondeezya biyeni kuti uli aamoyo mulamfu?

Wakalisimya chiindi bakulana bakwe nibakatali kumujata kabotu. Eezi zyakapa kuti atamikizigwe mulandu ngwaakatachita pe akubikkwa mujele kuEgepita kwaminyaka.​—w21.08, p. 12.

Nkuukuli kuzungaanisigwa kwanyika kwakukozyanisya kwakaambilizigwa mulugwalo lwa Hagai 2:6-9, 20-22?

Bantu bayookaka kuswiilila mulumbe waBwaami pesi bantu biingi bayooza mukasimpe. Lino-lino zisi ziyoozungaanisigwa kamamanino niziyoonyonyoonwa.​—w21.09, pp. 15-19.

Nkamboonzi nituteelede kumana manguzu chiindi nituchita mulimu wakukambawuka?

Jehova ulakubona kubeleka changuzu nkutuchita alubo zilamubotezya. Kuti teetwaleka naakuti teetwatyompwa tuyoojana buumi butamani.​—w21.10, pp. 25-26.

Levitiko chaandaano 19 itugwasya biyeni kuti tubelesye malayilile aakuti: “Amusalale mubukkale bwanu boonse”? (1 Pet. 1:15)

Kweelede kuti majwi aaya akazubululwa mulugwalo lwa Levitiko 19:2. Chaandaano eechi chili aazikozyano zyiingi zikonzya kutugwasya kuti tubelesye malayilile aali muli 1 Petro 1:15 mubuumi bwesu.​—w21.12, pp. 3-4.