1-3. (a) Niinzi chiyootugwasya kuti tukkale katusyomekede kumazubaano aakumamanino? (b) Tuyoolanga-langaanzi muchiiyo eechi?

MAZUBAANO aakumamanino, basizibi ‘balikumena mbuuli bwizu.’ (Int. 92:7) Nkinkaako tazitugambyi pe kuti bantu biingi tabachilijati kabotu. Kujana twachita biyeni kuti ‘tube bana kumakani aabubi’ akuti tube ‘bantu bapati kumakani aabusongo’?—1 Kor. 14:20.

² Nsandulo twiijana muchipanzi chalugwalo luzulwida chiiyo chesu chiti: “Basikuyandaula Jehova balamvwisya,” chaamba kuti balamvwisisisya zintu nzyayanda Leza. (Tus. 28:5) Eezi zileendelana amajwi ajanika muli Tusimpi 2:7, 9, aakuti Jehova “ulayobweda baluleme maanu.” Eezi zipa kuti baluleme bakonzye ‘kumvwisisisya bululami, nkukuti zintu zyoonse zilikabotu.’

³ Nowa, Daniyele aJobu bakalimuzi Leza. (Ezk. 14:14) Nikuba bakombi baLeza mazubaano mbubabede. Kutegwani anduwe, ulimuzi na Leza? ‘Ulazimvwisisisya’ na zintu nzyayanda Jehova? Chiyandikana nkuba aluzibo lwakasimpe atala aJehova. Atulange-lange  (1) Nowa, Daniyele aJobu mbubakamuziba Leza, (2) mbukwakabagwasya kuba aluzibo (3) ambutukonzya kubatobelezya.

4. Nowa wakamuziba biyeni Jehova alubo kuba aluzibo lwakasimpe kwakamugwasya biyeni?

⁴ Nowa wakamuziba biyeni Jehova? Kuzwa bantu nibakalengwa, baalumi abanakazi basyomeka bakiiya atala aJehova kwiinda mukulangisisya zintu zyakalengwa, kulibamwi bakali kukomba Leza akukubona bubotu mbubali kujana akaambo kakupona kweendelana amilawu amalayilile aaLeza. (Is. 48:18) Kulangisisisya zintu zyakalengwa kwakagwasya Nowa kuti abe achoonzyo chakuti Leza mpali akuti azibe bube bwaJehova buswaanizya “inguzu zyakwe abu-Leza bwakwe zitamani.” (Rom. 1:20) Nowa taakagolela akuziba Jehova luzutu pesi wakaba aalusyomo lusimide.

5. Nowa wakaaziba biyeni makanze aaLeza atala abantu?

⁵ Lusyomo ‘lulaba kuti muntu wamvwa mulumbe.’ (Rom. 10:17) Niinzi chakagwasya Nowa kuti azibe Jehova? Wakiiya zyiingi kuzwa kuzibbululu zyakwe. Bantu aaba baswaanizya Lamekki wakali kukomba Jehova alubo wakapona aamwi aAdamu. (Langa chifanikisyo chili kumatalikilo achiiyo.) Alubo wakayiya kuzwa kuli syaanyinakulu Metusela aJaredi wakali mupati kuli nguwe aminyaka iili 366.  * (Lk. 3:36, 37) Kulakonzeka kuti Nowa wakiiya zyiingi kubaalumi aaba akubakayintu babo atala akulengwa kwabantu, makanze aLeza aakuti bantu bazuzye nyika akuti mapenzi ngaakabona kalikuchitika akeetwa akaambo kakupapila kwakachitika mumuunda waEdeni. (Matl. 1:28; 3:16-19, 24) Zintu nzyaakiiya zyakamusika aamoyo mpawo zyakapa kuti akombe Leza.—Matl. 6:9.

6, 7. Kuba abulangilizi kwakalusimya biyeni lusyomo lwaNowa?

⁶ Bulangilizi bulalusimya lusyomo. Yeeya mbakalimvwa Nowa naakamvwa kuti zina lyakwe lyakali kwaamba kuti “Kulyookezya, naakuti Kuumbulizya.” (Matl. 5:29) Lamekki kalikuzulwidwa amuuya uusalala wakati: “Oyu mwana [Nowa] nguukonzya kutuumbulizya mumilimo yesu akutulemununa makataazyo ngaajana maanza esu nkaambo kanyika Jehova njaatukide.” Nowa wakali kulangilila kuli Leza. Mbuuli Abbelo aInokki, Nowa wakali kusyoma kuti kwakali kuyooba ‘lunyungu’ lwakali kuyoovwinyuna mutwe wanzoka.—Matl. 3:15.

⁷ Nikuba kuti Nowa taakali kubumvwisisisya pe businsimi buli muli Matalikilo 3:15, pesi wakali achoonzyo chakuti bantu bayoowangununwa. Alubo chisyomezyo chili muli Matalikilo 3:15 chileendelana amulumbe ngwaakali kwaambilizya Inokki wakali atala akubetekwa kwabantu bakali kuchita zintu zibi. (Jud. 14, 15) Nikuba kuti mulumbe wakali kwaambilizigwa aInokki uyoozuzikizigwa muchiindi chaArmagedoni pesi wakalusimya lusyomo lwaNowa.

8. Luzibo lwakasimpe lwakamugwasya biyeni Nowa?

⁸ Luzibo lwakasimpe lwakamugwasya biyeni Nowa? Lwakamugwasya kuti abe alusyomo abusongo, zyakapa kuti atanyonganyi bweenzinyina mbwaakali aabo aLeza. Muchikozyano “kweenda a-Leza,” kwakagwasya Nowa kuti ataliswaanizyi abantu bakali kuchita zintu zibi. Taakazumina kweenwa abangelo bakalichincha kuba bantu, bakali amanguzu alubo bakali kuchita zintu zigambya. (Matl. 6:1-4, 9) Nowa  wakalizi kuti bantu bakapedwe malayilile aakuti bazyalane bazuzye nyika. (Matl. 1:27, 28) Wakalizi kuti bangelo bakabisya nibakakwata banakazi. Eezi zyakazooba antanganana akaambo kabana bakazyalwa. Mukuya kwachiindi, Jehova wakachenjezya Nowa kuti wakali kuyooyeta zambangulwe. Akaambo kakuti Nowa wakali alusyomo wakayaka bwaato bwakali kuzoobafutula.—Heb. 11:7.

9, 10. Kujana wachitobelezya biyeni chikozyano chaNowa?

⁹ Kujana twachita biyeni kuti tube alusyomo mbuuli Nowa? Tweelede kubala Bbayibbele, kumvwisisisya nzitubala akuzibelesya mubuumi bwesu. (1 Pet. 1:13-15) Lusyomo abusongo ziyootugwasya kuti tuteenwi amuuya wanyika. (2 Kor. 2:11) Muuya ooyu usumpula kulwana akuchita bwaamu. Alubo usungwaazya bantu kuti bayandisye zintu zyakumubili. (1 Joh. 2:15, 16) Ulakonzya kupa kuti bantu batasimide muzintu zyabukombi balube kuti buzuba bwaJehova bwaba afwiifwi. Jesu naakali kukozyanisya mazuba ngitupona amazuba aaNowa, wakabikkila maanu kuzintu zikonzya kunyongania bweenzuma mbutulaabo aJehova kutali kukulwana akuchita bwaamu.—Bala Matayo 24:36-39.

¹⁰ Libuzye kuti, ‘Nzila njindiponaayo itondeezya kuti ndilimuzi na Jehova? Lusyomo ndundilaalo lupa kuti ndipone kweendelana azyeelelo zyaJehova na akuti ndibuzye bamwi atala anzizyo?’ Nsandulo zyako kumibuzyo eeyi ziyookugwasya kubona kuti ‘ulikweenda aLeza’ na.

11. (a) Kusyomeka kwaDaniyele kutondeezyaanzi atala abazyali bakwe? (b) Mbuubuli bube bwaDaniyele mbuyanda kutobelezya?

¹¹ Daniyele wakamuziba biyeni Jehova? Daniyele wakayiisigwa abazyali bakwe kuyanda Jehova aJwi lyakwe Bbayibbele. Daniyele wakazumanana kukomba Jehova kwabuumi bwakwe boonse. Nikuba naakachembaala wakali kwaabala Magwalo. (Dan. 9:1, 2) Nkombyo ilembedwe muli Daniyele 9:3-19 itondeezya kuti Daniyele wakamwizi kabotu Leza anzila njaakali kubajataayo maIsrayeli. Ulakonzya kubala akuyeeyesesya atala ankombyo eeyi kuti umuzibe kabotu Daniyele akuti ubone mbukonzya kutobelezya chikozyano chakwe.

12-14. (a) Daniyele wakatondeezya biyeni kuti wakali abusongo? (b) Leza wakamulongezya biyeni Daniyele?

¹² Luzibo lwakasimpe lwakamugwasya biyeni Daniyele? Kwakali kuyumu kukkala kuBbabbiloni nkaambo bantu bamuchisi eechi bakali kukomba baleza bakubeja. Muchikozyano, Jehova wakabuzya maJuda kuti: “Amuyandaule luumuno lwamunzi wacisi ooko nkondamutola mubuzike.” (Jer. 29:7, NW) Nikuba boobo, Jehova wakali kuyanda kuti bakombe nguwe alikke. (Kul. 34:14) Niinzi chakagwasya Daniyele kuti akkale kasyomeka kuli Jehova akubeendelezi bakuBbabbiloni? Busongo mbwakalaabo bwakamugwasya kuti azibe mpakeelede kugolela kumakani akulibombya kubeendelezi. Makani aaya akazoowambwa aaJesu, naakali aanyika.—Lk. 20:25.

¹³ Atubone nzyaakachita Daniyele chiindi mwaami nakaamba kuti taakwe muntu wakeelede kukomba leza uumbi kwamazuba aali 30. (Bala Daniele 6:7-10.) Daniyele wakali kukonzya kulibuzya kuti: ‘Ndilajana buleka kukomba Jehova kwamazuba aali 30 pesi aayinda ndizoomukomba.’ Pesi taakazumizya kuti mulawu wamwaami unyonganie bubambe bwakwe bwakukomba buzuba-abuzuba. Wakali kukonzya kusala  kukomba chakusisikizya. Nikuba boobo, wakalizi kuti nzyaakali kuchita lubbe zyakali zibinkene. Daniyele taakaleka kukomba Leza nikuba kuti wakalizi kuti kwakali kuyoomunjizya mumapenzi.

¹⁴ Jehova wakamulongezya Daniyele akaambo kakusala kwakwe akutayoowa nkwaakatondeezya alubo wakamukwabilila kuti atalumwi abalavu. Eezi zyakapa kuti zina lyaJehova lilemekwe kuswaanizya abantu bakali kweendelezegwa amwaami wamaMede amaPersiya!—Dan. 6:25-27.

15. Kujana twachita biyeni kuti tube alusyomo mbuuli Daniyele?

¹⁵ Kujana twachita biyeni kuti tube alusyomo mbuuli Daniyele? Kuti tube alusyomo lusimide tweelede kubala Jwi lyaLeza ‘akulimvwisisisya.’ (Mt. 13:23) Kuti tubone zintu mbuuli mbazibona Jehova, tweelede kwaamvwisisisya malayilile aamuBbayibbele. Tweelede kuyeeyesesya atala azintu nzitwiiya. Kukomba kulakonzya kutugwasya kapati nituli mumapenzi anituswaana zyiimo zisunka lusyomo lwesu. Kuti twakomba katukumbila busongo, Jehova uyoozisandula nkombyo zyesu.—Jak. 1:5

16, 17. Jobu wakamuziba biyeni Jehova?

¹⁶ Jobu wakamuziba biyeni Jehova? Jobu taakali muIsrayeli. Wakali chibbululu chaAbrahamu, Izaka aJakkobo alubo baalumi aaba bakalimuzi Jehova amakanze ngaakalaawo atala anyika. Nikuba kuti tazyaambidwe kuti Jobu wakakaziba biyeni kasimpe pesi wakazi zyiingi atala aJehova. (Job. 23:12) Wakati: “Ndakalimvwide amatwi buyo anduwe.” (Job. 42:5) Majwi ngakaamba Jobu, Jehova wakabona kuti ngachoonzyo.—Job. 42:7, 8.

¹⁷ Jobu wakiiya atala abube bwaJehova kuzwa kuzintu zyakalengwa. (Job. 12:7-9, 13) Elihu aJehova nibakali kwaambuula aJobu, bakabelesya zintu zyakalengwa kuti bamugwasye kubona mbali mupati Leza kwiinda bantu boonse. (Job. 37:14; 38:1-4) Majwi aaJehova akamusika aamoyo Jobu mpawo wakati: ‘Ndilizi kuti ulakonzya kuchita zyoonse, kuti zintu nzukanza tazikukachili. . . . Ndeempwa mukasuko amudyota.’—Job. 42:2, 6.

18, 19. Jobu wakatondeezya biyeni kuti wakalimuzi Jehova?

 ¹⁸ Luzibo lwakasimpe lwakamugwasya biyeni Jobu? Jobu wakali kwaamvwisisisya malayilile aaLeza. Wakatondeezya kuti wakalimuzi Jehova kwiinda mukutobelezya malayilile aakwe. Muchikozyano, Jobu wakalizi kuti kuyanda Leza kuswaanizya kubajata kabotu bamwi. (Job. 6:14) Taakali kulisumpula pe alubo wakali kubayanda bantu boonse, bafwaba abanotede. Wakati: “Sa mulengi wangu nguwakalenga alakwe muzike? Teewakatucita katweelene mucizyalilo?” (Job. 31:13-22) Zili antanganana kuti Jobu taakazumizya kuti zintu nzyaakali aazyo kumasaangunino zimupe kuti abalangile aansi bamwi. Mazubaano bantu balaazyuuno zilaajulu abanotede, tabachiti mbuuli mbaakali kuchita pe Jobu.

¹⁹ Jobu taakwe naakakomba baleza bakubeja nikuba mumoyo wakwe. Wakalizi kuti bukombi bwakubeja akubikkila maanu kuzintu zyakumubili zyakali kuyoomukachizya kukomba “Leza uuli mujulu.” (Bala Jobu 31:24-28.) Wakalizi kuti lukwatano lulasalala. Wakachita chizuminano ameso aakwe kuti atalangi musimbi chakumumenena mate. (Job. 31:1) Muchiindi nchaakali kupona Jobu, Jehova wakali kukuzumizya kwaalika. Nikuli Jobu wakali kuyanda, wakali kunookwata mwanakazi wachibili. * Pesi wakakwata mwanakazi uumwi kweendelana abubambe bwaJehova atala alukwatano. (Matl. 2:18, 24) Nikwakiinda minyaka iili 1 600, Jesu wakayiisya kuti mwaalumi weelede kuba amukayintu uumwi akuti bantu bakwetene batachiti bumambe.—Mt. 5:28; 19:4, 5.

20. Luzibo lwakasimpe amalayilile aamuBbayibbele kujana zyatugwasya biyeni kuti tusale beenzuma azyakulikondelezya zilikabotu?

²⁰ Kujana twachita biyeni kuti tube alusyomo mbuuli Jobu? Chiyandikana nkuba aluzibo lwakasimpe akubelesya malayilile aamuBbayibbele mubuumi bwesu. Muchikozyano, sintembawuzyo Davida wakati Jehova ‘ulabasula basinkondo’ alubo wakatondeezya kuti kuliswaanizya ‘abasilweeno’ takuli kabotu. (Bala Intembauzyo 11:5; 26:4.) Lugwalo oolu lutondeezya kuti Jehova uzibona biyeni zintu? Kujana waabelesya biyeni malayilile aaya nusala zintu nzweelede kubikka mubusena bwakusaanguna, mbuyelede kubelesya Intaneti, mbuyelede kusala beenzinyokwe azyakulikondelezya? Nsandulo zyako kumibuzyo eeyi ziyookugwasya kubona kuti ulimuzi na Jehova. Kuti tukkale katutakwe nikuba kabala munyika eeyi, tweelede kuyiisya ‘miyeeyo’ yesu kuti tukonzye kusiyanisya zibotu azibi akuti tusale chabusongo.—Heb. 5:14; Ef. 5:15.

21. Niinzi chikonzya kutugwasya kuti ‘tumvwisisisye’ zintu nzyayanda Taateesu uuli kujulu Jehova?

²¹ Jehova wakagwasya Nowa, Daniyele aJobu kuti bamuzibe nkaambo bakamuyanduula aamoyo woonse. Wakabagwasya kuti ‘bamvwisisisye’ zintu nzyaakali kuyanda. Bakaba zikozyano zilikabotu alubo bakapona buumi bulikabotu. (Int. 1:1-3, NW) Libuzye kuti, ‘Ndizi Jehova mbuuli mbubakamuzi na baNowa, Daniyele aJobu?’ Tulakonzya kumuziba kabotu nkaambo mazubaano tuzi zintu zyiingi kwiinda nzibakazi. (Tus. 4:18) Bala alubo uyanduulisisye muJwi lyaLeza. Yeeyesesya atala nzubala. Alubo komba ukumbile muuya uusalala kuti ukugwasye. Eezi ziyoopa kuti uswene afwiifwi aNdeende wesu uuli kujulu. Alubo tuyootondeezya kuba abusongo munyika eeyi yeendelezegwa aaSaatani.—Tus. 2:4-7.