Ndakazyalwa mu1937, kupulazi lili afwiifwi akudolopo litegwa Tokmok, kuKyrgyzstan. Tuli maKyrgyz alubo twaambuula chiKyrgyz. Bazyali bangu bakali kubeleka kumapulazi kuzwa nilyapasuka kusika nilyabbila. Bantu bakali kubeleka kumapulazi bakali kufozegwa chakulya pesi mali bakali kwiifozegwa kamwi amunyaka. Baama bakali kuzwa zitukuta kuti batulanganie amuchizi wangu. Ndakayiya kwaminyaka iili musanu luzutu mpawo ndakasaanguna kubeleka kupulazi.

Nkutwakali kukkala bantu bakali kufwaba nkinkaako kuti bantu bajane zintu ziyandikana mumpuli, bakeelede kubeleka changuzu. Kandichili mukubusi, teendakali kuyeeya pe atala azintu zyakali kuyoochitika kunembo. Alubo, teendakali kuyeeyela pe kuti kasimpe kali atala aJehova amakanze aakwe kakali kukonzya kuchincha buumi bwangu. Kasimpe kakasaalila kuKyrgyzstan munzila iigambya. Kakasaangunina nkutwakali kukkala, kubbazu lyakunyika lyakuKyrgyzstan.

Bantu bakuKyrgyzstan bakatalika kumvwa kasimpe atala aJehova mu1951. Bantu bakuKyrgyzstan bakali bayiisigwa kuti bapapile mfulumende pesi achiindi eechi bakeelede kubeleka changuzu kuti bamvwisisisye kasimpe. Nkamboonzi? Nkaambo Kyrgyzstan, yakali kweendelezegwa aUnion of Soviet Socialist Republics (USSR). Chiindi chaUSSR, Bakamboni baJehova bakazumanana kutatola  lubazu mutwaambo twanyika. (Joh. 18:36) Alubo, bakali kupenzegwa akupegwa mulandu wakupapila mfulumende. Nikuba boobo, taakwe chintu chikonzya kukachizya bantu kuti biiye kasimpe kamuBbayibbele. Zintu zyakachitika mubuumi bwangu zyakandigwasya kubona kuti “zintu zyoonse zilakonzeka” kuli Jehova!—Mk. 10:27.

Kupenzegwa kwaBakamboni baJehova kwakapa kuti bantu biingi bazibe kasimpe kuKyrgyzstan. Zyakachitika biyeni eezyo? Mfulumende yaUSSR yakali kweendelezya akuSiberia alubo kuSiberia kwakali kutolwa bantu bapapila mfulumende kuti bakabe bazike. Bazike biingi nibakaangununwa bakaza kuKyrgyzstan alubo bakeeta kasimpe. Umwi wakali muzike wakali kutegwa Emil Yantzen wakazyalilwa kuKyrgyzstan mu1919. Emil wakatoledwe kuntolongo kuSiberia mpawo wakakubonana aBakamboni. Wakiiya kasimpe alubo wakabweeda kumuunzi mu1956. Emil wakali kukkala kuSokuluk, afwiifwi ankutwakali kukkala. Mu1958, kwakaba mbungano yakusaanguna muKyrgyzstan yakali kuSokuluk.

Nikwakiinda munyaka, Victor Vinter wakalongela kuSokuluk. Mukwesu ooyu wakaswaana mapenzi miingi. Wakaangwa tubili kaambilwa minyaka iili 3 muntolongo akaambo kakutatola lubazu mutwaambo twanyika, wakali muntolongo kwaminyaka iili 10 alubo wakakkala minyaka iili 5 kali kubuzike. Nikuba boobo, kupenzegwa kwaBakamboni teekwakakachizya kuti bantu biiye kasimpe.

Mu1963, kwakali Bakamboni bali 160 kuKyrgyzstan alubo biingi bakali kuzwa kuGermany, kuUkraine akuRussia. Akati kabo kwakali Eduard Varter wakali muzike, wakabbabbatizigwa mu1924 kuGermany. Mu1941, basilumamba bamaNazi bakamutola kuntolongo alubo minyaka miche yakatobela, bantu bakali kulubazu lwaUSSR bakamutola kubuzike. Mu1961, mukwesu ooyu wakalongela kudolopo lyaKant, lili afwiifwi ankutwakali kukkala.

Elizabeth Fot wakali Kamboni waJehova alakwe wakali kukkala kuKant. Wakali kubeleka mulimu wakusuma zigogo. Wakakwizi loko kusuma nkinkaako bantu balemekwa mbuuli madokotela abayiisi bakali kuula zigogo kulinguwe. Umwi mukayintu wakali kuula zigogo kulinguwe wakali kutegwa Aksamai Sultanalieva alubo wakakwetwe awumwi mwaalumi wakali kubeleka kunkuta. Aksamai naakaza kuzoowula zigogo kuli Elizabeth, wakabuzya mibuzyo myiingi iili atala amakanze abuumi achiimo chabantu bafwide. Elizabeth wakasandula mibuzyo yakwe kabelesya Bbayibbele. Mukuya kwachiindi, Aksamai wakazooba mukambawusi uusungweete.

Muchiindi eechi, Nikolai Chimpoesh wakali kuzwa kuMoldova, wakasalwa kuba mulangizi wabbazu alubo wakabeleka kwaminyaka iili 30. Nikolai wakali kuswaya mbungano akubona kuti mbungano zilikujana mabbuku kuchiindi cheelede. Balupati-pati bamfulumende bakali kuzibona zyoonse nzyaakali kuchita. Eduard Varter wakabuzya Nikolai kuti: “Beendelezi bakubuzisisya atala amabbuku eesu, weelede kubabuzya kuti twaajana kumawofesi mapati aali kuBrooklyn. Weelede kubalanga kumeso maKGB. Utabayoowi pe.”—Matt. 10:19.

Nikwakiinda mazuba mache kali wabuzigwa majwi aaya, Nikolai wakakumbilwa kuti akaswaye mbungano zyakuKant kwakali mawofesi mapati amaKGB. Wakati: “Umwi mupati wamaKGB wakabuzya  kuti twaajana kuli mabbuku eesu. Ndakamubuzya kuti azwa kuBrooklyn. Wakabula lyakwaamba. Wakandibuzya kuti ndiinke.” Bakamboni aaba bakatali kuyoowa bakagwasya bantu bakubbazu lyakunyika lyakuKyrgyzstan kuti bazibe kasimpe. Bamumpuli yesu bakasaanguna kwiiya kasimpe mu1981 alubo mukayintu wangu nguwe wakasaanguna kukamvwa.

Mairambubu uzwa kubbooma lyakuNaryn iili kuKyrgyzstan. Ndakasaanguna kumubona naakaswaya muchizi wangu muAugust 1974. Nindakamubona ndakamuyanda. Mubuzuba mbuboobo twakakwatana.

MuJanuary 1981, mukayintu wangu wakali mubbaasi kaya kumusika, naakamvwa majwi ngindaamba kumasaangunino. Mukayintu wangu wakali kuyanda kuziba zyiingi nkinkaako wakabuzya mwanakazi ooyo zina ankwakkala. Wakamubuzya kuti nguApun, pesi taakamubuzya nkwakkala nkaambo muminyaka yakuma1980, mulimu waBakamboni wakali kukasigwa. Apun wakabweza adilesi yakubusena nkutwakali kukkala. Mukayintu wangu wakasika kung’anda kaboteledwe.

Mukayintu wangu wakati: “Ndamvwa makani mabotu. Umwi mwanakazi wandibuzya kuti, lino-lino lufu luyoomana. Nikuba banyama bamusokwe tabanooyoosyi pe.” Ndakamvwaanga ndwaano mpawo ndakamusandula kuti: “Atulindile, tuzoomvwa zyiingi naasika mwanakazi ooyo.”

Apun wakazootuswaya nikwakiinda myeezi iitatu. Muchizi ooyu wakali kutuswaya alubo twakabonana aBakamboni bakusaanguna bachiKyrgyz. Bachizi aaba bakatubuzya kasimpe atala aJehova amakanze aakwe. Bakatuyiisya Bbayibbele kababelesya bbuku litegwa From Paradise Lost to Paradise Regained. * Kwakali bbuku limwi biyo kuTokmok, nkinkaako twakalilembela lyesu.

Chimwi chintu nchitwakiiya kumasaangunino, bwakali businsimi buli muli Matalikilo 3:15. Businsimi oobu buyoozuzikizigwa kwiinda muli Jesu Mwaami waBwaami bwaLeza. Bantu boonse beelede kwaamvwa makani aaya! Andiswe tweelede kubuzya bamwi atala amakani aaya. (Mt. 24:14) Kasimpe kamuBbayibbele kakasaanguna kuchincha buumi bwesu.

Umwi Kamboni wakali kukkala kuTokmok  wakatutamba kumuchado. Twakabona kuti Bakamboni balisiyene abamwi. Teekwakalikwe bukande pe alubo zintu zyoonse zyakali bambikene. Zyakasiyene kule loko ayimwi michado njitwakali kwiinka nkaambo bantu ngabakolwa, kabatalijati kabotu akwaambuula majwi aatali kabotu.

Twakali kunjila miswaangano yachiKristu kuTokmok. Miswaangano eeyi yakali kuchitilwa musokwe kuti bwiime bwakunze kabuli kabotu. Bakwesu bakalizi kuti mapulisa bakali kutuyanduula, nkinkaako bakachita mabambe aakuti kube mulindi. Chiindi champeyo, twakali kuchitila miswaangano mung’anda. Chiindi chiingi, mapulisa bakali kusika kung’anda kabayanda kuziba nzitwakali kuchita. Ime amukayintu wangu twakabbabbatizigwa muJuly 1982, muMulonga waChüy, kuzwa waawo, twakeelede kubelesya bupampu. (Mt. 10:16) Twakabungana musokwe mpawo kuti bakwesu basike kubusena nkutwakali kuyooswaanana teebakeelede kweenda kabali kabunga pe. Twakiimba nyimbo yaBwaami mpawo kwakapegwa nkani yakubbabbatizigwa.

Mu1987, umwi mukwesu wakandikumbila kuti ndikaswaye muntu wakali achiyandisyo wakali kukkala kuBalykchy. Kuti tukasike nkuko, twakeenda ma-awa aali 4, achitima. Nitwakaba achiindi katuswaya kuBalykchy, twakabona kuti bantu biingi bakali achiyandisyo chakwiiya kasimpe. Ooyu wakali mweenya wakuti tuyungizye mulimu wesu wakukambawuka.

Ime amukayintu wangu twakali kwiinka kuBalykchy chiindi chiingi. Kumamanino amviki twakali koona nkuko, katukambawuka akuchita miswaangano yachiKristu. Bantu biingi bakali kwaayanda mabbuku eesu. Twakali kutola mabbuku kuzwa kuTokmok katubelesya masaka abikkilwa magwili ategwa ma-mishok. Masaka aabili amabbuku ngitwakali kutola mweezi amweezi, akali mache. Nikuba bantu mbitwakali kujana muchitima nituya kuBalykchy, twakali kubakambawukila.

Mu1995, kakwiindide minyaka iili 8, kuzwa nitwakasaanguna kuswaya kuBalykchy kwakaba mbungano yakusaanguna. Kuzwa kuTokmok kuya kuBalykchy kwakali kuyanda mali nyingi. Teetwakalikwe mali nyingi, pesi twakali kwiinka. Umwi mukwesu wakali kutupa mali yakugadya. Jehova wakabona chiyandisyo nchitwakalaacho chakuyungizya mulimu wesu, mpawo wakatujulila ‘milyango yakujulu.’ (Malk. 3:10) Nisimpe, zintu zyoonse zilakonzeka kuli Jehova!

Mu1992, ndakaba mwaalu wakusaanguna wachiKyrgyz kuKyrgyzstan. Mumbungano yakulindiswe kuTokmok, kwakaba nzila zipya zyakukambawuka. Twakali kwiiya Bbayibbele abachikula biingi bachiKyrgyz bakali kwiiya chikolo. Umwi uuchikula ngutwakiiyaawe ulikubeleka kali muKkomiti yaMutabi alubo bamwi babili mapayona ayandikana. Alubo twakali kugwasya bantu bakali kusika kumiswaangano. Mu1990, twakali kubelesya mabbuku achiRussia, katuchita miswaangano mumulaka nguyooyo. Pesi bantu biingi bakali kunjila miswaangano bakali kwaambuula chiKyrgyz. Nkinkaako, ndakali kutolekela nkani kuti bamvwisisisye kasimpe.

 Muchiindi nchicheecho, twakali kukomezya bana. Twakali kwiinka abana besu kukukambawuka akumiswaangano yambungano. Mwaneesu musimbi uutegwa Gulsayra, wakasaanguna kukambawukila bantu bakali kwiinda mumugwagwa kali aminyaka iili 12. Alubo bana besu bakali kwaajata amutwe Magwalo. Eezi zyakapa kuti bana besu abazukulu basale kukomba Jehova. Akati kabana besu bali 9, abazukulu bali 11, bali 16 mbabo balikubelekela Jehova naakuti baliinka kumiswaangano abazyali babo.

Kaansinga bakwesu abachizi bakasaanguna mulimu wakukambawuka kulindiswe kuma1950 bachipona, balikunoogamba akaambo kazintu zyiingi zyachitika. Kuzwa mu1991, twakaba alwaangunuko lwakukambawuka akunjila miswaangano mipati.

Mu1991, twakanjila muswaangano wabbooma wakusaanguna kuAlma-Ata, lino yiitwa kuti Almaty, iili kuKazakhstan. Alubo mu1993, kwakaba muswaangano wabbooma wakusaanguna kuKyrgyzstan, wakachitilwa kuSpartak Stadium iili kuBishkek. Basikupupulula bakasalazya busena oobo kakuchisyeede mviki kuti muswaangano uchitwe. Kubeleka nkutwakachita kwakapa kuti mupati-pati wabusena oobo atubuzye kuti tuchite muswaangano katutabbadali pe.

Mu1994, kuli chimwi chintu chakachitika. Mabbuku eesu akasaanguna kusandululwa mumulaka wachiKyrgyz. Lino kuli basanduluzi babelekela kuwofesi yamutabi iili kuBishkek. Alubo mu1998, mulimu waBakamboni wakalembesegwa zili mumulawu muKyrgyzstan. Lino kuli Bakamboni biingi basika ku5 000. Alubo kuli mbungano zili 83 atubunga tuli 25 twachiChinese, Chikuwa, Kyrgyz, Russian, Russian Sign Language, Turkish, Uighur, achiUzbek. Bakwesu abachizi aaba bazwa kuzisi zisiyene-siyene babelekela Jehova kabajisini. Jehova nguwe wakapa kuti zintu zichinche munzila iigambya oobu.

Jehova wakandigwasya kuti ndichinche buumi bwangu. Ndakakomenena mumpuli iifwaba alubo ndakiiya kwaminyaka iili 5 luzutu. Nikuba boobo, Jehova wakapa kuti ndibe mwaalu akuti ndiyiisye kasimpe kubantu bayiide loko kwiinda ndime. Nisimpe kuti kuli Jehova taakwe chintu chikachila pe. Nzindakabona mubuumi bwangu zipa kuti ndizumanane kukomba Jehova nkaambo “zintu zyoonse zilakonzeka” kulinguwe.—Mt. 19:26.