1. Nkaakali kamwi kaambo kapa kuti bakombi baJehova bajatane?

TULABOTELWA kuba mumpuli yaJehova. Nkamboonzi nitujisini alubo nituli aaluumuno? Kamwi kaambo nkakuti tubeleka changuzu kuti tulemeke mabambe aabusilutwe Jehova ngabikkide. Kuti twamvwisisisya kuti nkamboonzi Jehova naakabikka mabambe aabusilutwe zilapa kuti tubelekelaamwi alubo tujatane.

2. Njiili mibuzyo njitutasandule muchiiyo eechi?

² Muchiiyo eechi, tulalanga-langa kuti mbaani beelede kuzulwida mumbungano. Alubo tulasandula mibuzyo yakuti: Nguuli mulimu ngubalaawo bachizi mumbungano? Kuti kuli mukwesu zyaamba kuti ulimutwe wabachizi boonse na? Manguzu aapedwe baalu aakuzulwida alikozyenie na amanguzu aapedwe mitwe yampuli? Kwalino, atubone kuti tweelede kubabona biyeni bachizi.

3. Niinzi chikonzya kutugwasya kuti tubabone kabayandikana loko bachizi?

³ Tulabalumba bachizi nkaambo babeleka changuzu kuti balanganie mpuli zyabo, bakambawuke makani mabotu akugwasya bamwi mumbungano. Kulanga-langa atala anzila Jehova aJesu njibababonaayo bachizi kulapa kuti andiswe tubabone kabayandikana loko. Alubo chimwi chikonzya kutugwasya nkulanga-langa nzila mwaapostolo Pawulu njaakali kubabonaayo bantu bachanakazi.

4. Bbayibbele litondeezya biyeni kuti Jehova ubabona kabayandikana boonse baalumi abanakazi?

 ⁴ Bbayibbele litondeezya kuti Jehova ubabona kabayandikana boonse baalumi abanakazi. Muchikozyano, Bbayibbele litondeezya kuti mumwaanda wamunyaka wakusaanguna, Jehova wakapa baalumi abanakazi muuya uusalala alubo wakabapa manguzu aakuti bachite milimu iigambya mbuli kwaambuula milaka iisiyene-siyene. (Mil. 2:1-4, 15-18) Leza wakananika bamwi baalumi abanakazi kuti bazooyendelezye kabalaamwi aKristu. (Gal. 3:26-29) Boonse baalumi abanakazi bazoojana buumi butamani aanyika. (Ciy. 7:9, 10, 13-15) Alubo baalumi abanakazi bapedwe mulimu wakukambawuka makani mabotu. (Mt. 28:19, 20) Bbuku lyaMilimo lyaambuula atala amuchizi uutegwa Pulisila wakabelekaamwi amulumaakwe Akkwila kuti bagwasye mwaalumi uutegwa Apolo kuti akamvwisisisye kabotu kasimpe.—Mil. 18:24-26.

5. Lugwalo lwa Luka 10:38, 39, 42, lutondeezya kuti Jesu wakali kubabona biyeni banakazi?

⁵ Jesu wakali kubalemeka bantu bachanakazi. Jesu taakwe naakatobelezya zyakali kuchitwa aabaFarisi. BaFarisi bakali kubalangilaansi bantu bachanakazi zyakuti teebakali kwaambuulaabo pe kunembo lyabantu nikuba kwaambuula aambabo atala azili muMagwalo. Pesi Jesu wakazumizya kuti boonse baalumi abanakazi babewo chiindi naakali kupandulula Magwalo. * (Bala Luka 10:38, 39, 42.) Jesu wakazumizya banakazi kuti beendaamwi anguwe mumulimu wakukambawuka. (Lk. 8:1-3) Alubo chiindi naakabusigwa wakatuma bamwi banakazi kuti bakabuzye baapostolo bakwe kuti wakali wabusigwa.—Joh. 20:16-18.

6. Mwaapostolo Pawulu wakatondeezya biyeni kuti wakali kubalemeka bantu bachanakazi?

⁶ Mwaapostolo Pawulu wakabuzya Timoteyo kuti alemeke bantu bachanakazi. Wakamubuzya kuti abone ‘bamakaintu bapati mbuli bayina alubo basimbi mbuli bacizyi bakwe.’ (1 Tim. 5:1, 2) Nikuba kuti Pawulu wakagwasya Timoteyo kuti abe muKristu uusimide pesi wakazumina kuti teenguwe pe aalikke wakagwasya Timoteyo nkaambo wakaamba kuti bayinakulu abayina mbabo bakamuyiisya “malembe aasalala” kuzwa kachili muniini. (2 Tim. 1:5; 3:14, 15) Alubo Pawulu wakajuzya bachizi amazina aabo mulugwalo lwakwe ndwaakalembela maKristu bakuRoma. Pawulu wakaamba milimu mibotu njibakachita bachizi aaba alubo wakabalumba akaambo kamilimu eeyo.—Rom. 16:1-4, 6, 12; Flp. 4:3.

7. Njiili mibuzyo njitutasandule?

⁷ Mbuli mbutwabona mumafuka aayinda, Magwalo atondeezya kuti toonse tulayandikana kuli Jehova kazitakwe ndaba pe kuti tuli bachizi naakuti tuli bakwesu. Bachizi bayandikana loko mumbungano akaambo kakuti batondeezya bamwi luyando, balapa alubo baalu balangilila kuti bachizi babagwasye kuti kube luumuno akujatana mumbungano. Kwalino, atusandule mibuzyo yakuti: Nkamboonzi Jehova nayanda kuti bachizi basunge nduku chiindi nibachita imwi milimu? Mbukunga bakwesu mbabo basalwa kuba baalu ababelesi babelekela, eezi zyaamba kuti, kuti kuli mukwesu ulimutwe wabachizi boonse na?

8. Kweendelana alugwalo lwa Baefeso 5:23, kuti kuli mukwesu zyaamba kuti ulimutwe wabachizi boonse na? Pandulula.

⁸ Kuti kuli mukwesu zyaamba kuti ulimutwe wabachizi boonse na? Nsandulo njakuti peepe! Kristu nguumutwe wambungano.  (Bala Baefeso 5:23.) Nichoonzyo kuti mumpuli, mwaalumi nguumutwe wamwanakazi wakwe pesi mwana mulombe uubbabbatizidwe teemutwe wabayina pe. (Ef. 6:1, 2) Alubo manguzu ngibapedwe baalu aakuzulwida bakwesu abachizi mumbungano ali aampagolela. (1 Tes. 5:12; Heb. 13:17) Bachizi batakwetwe bakkala aabalikke balabalemeka bazyali babo nikuba baalu. Nikuba boobo, bali aansi aaJesu mutwe wambungano mbuli bakwesu boonse.

9. Nkamboonzi Jehova nayanda kuti bachizi basunge nduku chiindi nibachita imwi milimu?

⁹ Jehova wakapa bakwesu luzutu mulimu wakuti bayiisye akuzulwida mumbungano. (1 Tim. 2:12) Nkamboonzi? Nkaambo uyanda kuti zintu zyeende munzila iibambikene mumbunga yakwe. Kuti muchizi wachita milimu yeelede kuchitwa amukwesu, mpimpawo Jehova mpayanda kuti muchizi asunge nduku chiindi nachita milimu eeyo. * (1 Kor. 11:4-7) Mulawu ooyu Jehova ngwapede bachizi teewakubadyaaminina pe pesi ubapa mweenya wakuti batondeezye kuti balaalemeka mabambe aabusilutwe. Katuchili aamuzeezo ooyu, atusandule mubuzyo wakuti: Manguzu aakuzulwida aapedwe baalu alikozyenie na amanguzu aapedwe mitwe yampuli?

10. Niinzi chikonzya kupa kuti mwaalu abonaanga uli aamanguzu akubikkila bakwesu abachizi milawu?

¹⁰ Baalu balamuyanda Kristu alubo balaziyanda mbelele nzibakapegwa aJehova aJesu kuti bazilanganie. (Joh. 21:15-17) Akaambo kakuti mwaalu unooli ulabayanda bakwesu abachizi bali mumbungano, eezi zilakonzya kupa kuti abonaanga weelede kuchita  mbuli muzyali wabo. Ulakonzya kuyeeya kuti, kuti mutwe wampuli kali aamanguzu aakubikkila mpuli yakwe milawu kuti abakwabilile, zyaamba kuti anguwe ulaamanguzu akubikkila bakwesu abachizi bamumbungano milawu njabonaanga ilabakwabilila. Bamwi bakwesu abachizi balakonzya kupa kuti mwaalu abonaanga mutwe wabo kwiinda mukukkala kabamukumbila kuti abasalile zyakuchita. Pesi nichoonzyo na kuti manguzu aakuzulwida aapedwe baalu alikozyenie amanguzu aapedwe mitwe yampuli?

11. Manguzu aakuzulwida ngibalaawo baalu amitwe yampuli ayendelana biyeni?

¹¹ Mwaapostolo Pawulu wakatondeezya kuti kuli kumwi kweendelana kuliwo aakati kamanguzu aakuzulwida ngibalaawo baalu amitwe yampuli. (1 Tim. 3:4, 5) Muchikozyano, Jehova uyanda kuti bana baswiilile mawisi alubo mwanakazi aswiilile mulumaakwe. (Kol. 3:20) Nzimwi biyo amumbungano, uyanda kuti bakwesu abachizi baswiilile baalu. Jehova uyanda kuti mitwe yampuli abaalu bagwasye bantu mbibazulwida muzintu zyamubukombi. Boonse baalu amitwe yampuli beelede kubayanda bantu mbibazulwida. Mbuli mitwe yampuli, baalu beelede kuba aachoonzyo chakuti bantu mbibazulwida bajana lugwasyo chiindi nibali mumapenzi. (Jak. 2:15-17) Kuyungizya aali zeezi, baalu amitwe yampuli beelede kugwasya bantu mbibazulwida kuti  baswiilile milawu yaJehova pesi ‘bataindilili zintu zilembedwe’ muBbayibbele.—1 Kor. 4:6.

12-13. Kweendelana alugwalo lwa Baroma 7:2, manguzu aakuzulwida aapedwe baalu amitwe yampuli asiyene biyeni?

¹² Nikuba boobo, kuli musiyano mupati uuliwo aakati kamanguzu aakuzulwida ngibalaawo baalu amitwe yampuli. Muchikozyano, Jehova wakapa baalu manguzu aakubeteka amanguzu akugwisya basizibi batayandi kuchincha mumbungano.—1 Kor. 5:11-13.

¹³ Kuli lumwi lubazu, Jehova wakapa mitwe yampuli manguzu ngaatapede baalu. Muchikozyano, wakapa mutwe wampuli manguzu aakuti abikkile mpuli yakwe milawu akubona kuti bayitobelezya. (Bala Baroma 7:2.) Alubo mutwe wampuli nguwe uuli aamanguzu aakubikkila bana bakwe chiindi nchibeelede kusika aang’anda. Mutwe wampuli ulaamanguzu akululamika bana bakwe kuti teebatobelezya mulawu ooyo. (Ef. 6:1) Nikuba boobo, mutwe wampuli uuli aaluyando usaanguna kumvwa maboneno aamwanakazi wakwe katanasala zyakuchita mbukunga kabali babili “mubili omwe.” *—Mt. 19:6.

14. (a) Kweendelana alugwalo lwa Marko 10:45, nkamboonzi Jehova naakasala Jesu kuti abe mutwe wambungano? (b) Nguuli mulimu ngubalaawo bamuKabunga Keendelezya? (Langa kabbokesi kati, “ Mulimu Ngubalaawo bamuKabunga Keendelezya.”)

¹⁴ Jehova wakabelesya chinunuzyo kuchitila kuti anunune bantu boonse bali mumbungano kuswaanizya abaabo bayanda kwiiya atala anguwe. (Bala Marko 10:45; Mil. 20:28; 1 Kor. 15:21, 22) Mbukunga Jesu wakapa buumi bwakwe kuti bube chinunuzyo  nkinkaako, Jehova wakasala nguwe kuti abe mutwe wambungano. Jesu ulaamanguzu aakubikka milawu yeelede kutobelezegwa aawumwi awumwi wesu, mumpuli amumbungano nkaambo nguumutwe wesu. (Gal. 6:2) Pesi kuli zyiingi Jesu nzyachita kutali kubikka milawu luzutu. Utupa chakulya chamubukombi alubo ulatuyanda.—Ef. 5:29.

15-16. Wayiyaanzi kuli zyakaambwa aamuchizi Marley amukwesu Benjamin?

¹⁵ Bachizi batondeezya kuti balamuyanda Kristu kwiinda mukuswiilila bakwesu bazulwida mumbungano. Muchizi uutegwa Marley uukkala kuUnited States wakaamba maboneno ngibalaawo bachizi biingi. Wakaamba kuti: “Ndilabotelwa amilimu njindichita mumpuli amumbungano. Ndiyanda kubeleka changuzu kuti ndikkale kandilemeka mabambe aabusilutwe Jehova ngaakabikka. Mulumaangu abakwesu bali mumbungano balikupa kuti kunduubile kutobelezya mabambe aaya nkaambo balandilemeka alubo balandilumba akaambo kamilimu njindichita.”

¹⁶ Bakwesu batondeezya kuti balamvwisisisya mbaabeleka mabambe aabusilutwe kwiinda mukulemeka bachizi. Mukwesu uutegwa Benjamin uukkala kuEngland wakaamba kuti: “Ndakayiya zyiingi loko kuzwa kunsandulo zipegwa aabachizi kumiswaangano yambungano alubo ndakagwasigwa loko anzila nzibakandibuzya nzibabelesya mumulimu wakukambawuka. Bachizi bachita mulimu uuyandikana loko.”

17. Nkamboonzi nitweelede kulemeka mabambe aabusilutwe?

¹⁷ Kuti toonse mumbungano kuswaanizya baalumi, banakazi, mitwe yampuli abaalu twamvwisisisya mbaabeleka mabambe aabusilutwe akwaalemeka tuyoopa kuti mumbungano mube luumuno. Kwiinda zyoonse, ngatuli kutembawula Taateesu wakujulu, Jehova.—Int. 150:6.